ഹജ്ജ്-2026- ന്റെ നടത്തിപ്പും ഹജ്ജ്-2027-ന്റെ പ്രവർത്തനപദ്ധതിയും വിലയിരുത്താൻ ന്യൂഡൽഹിയിലെ ഡോ. അംബേദ്കർ അന്താരാഷ്ട്ര കേന്ദ്രത്തിൽ ജൂൺ 18ന് ഹജ്ജ് അവലോകന യോഗം ചേർന്നു. ന്യൂനപക്ഷകാര്യ-പാർലമെന്ററി കാര്യ മന്ത്രി കിരൺ റിജിജുവിന്റെ അധ്യക്ഷതയിലായിരുന്നു യോഗം. ഹജ്ജ്-2026-ൽ ഏകദേശം ഒരു ലക്ഷത്തി എഴുപത്തയ്യായിരം ഇന്ത്യൻ തീർഥാടകർ ഹജ്ജ് നിർവഹിച്ചതായി യോഗം വിലയിരുത്തി.

ന്യൂനപക്ഷകാര്യ മന്ത്രാലയം, വിദേശകാര്യ മന്ത്രാലയം, വ്യോമയാനം, ആരോഗ്യം, ആഭ്യന്തരകാര്യ വകുപ്പുകൾ എന്നിവയിലെ ഉദ്യോഗസ്ഥരും ഹജ്ജ് കമ്മിറ്റി പ്രതിനിധികളും യോഗത്തിൽ പങ്കെടുത്തു. സൗദി അറേബ്യയിലെ ഹജ്ജ്-ഉംറ മന്ത്രാലയം ഇന്ത്യൻ ഹജ്ജ് ദൗത്യത്തിന് ആദ്യമായി രണ്ട് ലബ്ബയ്തും പുരസ്‌കാരങ്ങൾ നൽകി. ഹജ്ജ് ഏകോപനത്തിലും ആശയവിനിമയത്തിലും മികച്ച പ്രവർത്തനത്തിനാണ് അംഗീകാരം ലഭിച്ചത്. മീനയിൽ സോഫാ-കിടക്ക സൗകര്യം, മക്കയിൽ നിന്ന് മദീനയിലേക്കുള്ള അതിവേഗ റെയിൽ യാത്ര, ഹോട്ടൽ മാതൃകയിലെ താമസം, ഇരുപത് ദിവസത്തെ ഹ്രസ്വ ഹജ്ജ് പദ്ധതി തുടങ്ങിയ സൗകര്യങ്ങളും നടപ്പാക്കി. സാങ്കേതിക സംവിധാനങ്ങളുടെ സഹായത്തോടെ പരാതിപരിഹാര സംവിധാനവും യാത്രാ ക്രമീകരണങ്ങളും കൂടുതൽ ശക്തമാക്കിയതായും യോഗം വിലയിരുത്തി.

പ്രദേശത്തെ ഭൗമരാഷ്ട്രീയ സാഹചര്യങ്ങൾ നിലനിന്നിട്ടും നാനൂറ് വിമാന സർവീസുകളുടെ സഹായത്തോടെ ഹജ്ജ് പ്രവർത്തനങ്ങൾ വിജയകരമായി പൂർത്തിയാക്കിയതായി വിലയിരുത്തൽ യോഗത്തിൽ ചൂണ്ടിക്കാട്ടി. ഭാവിയിൽ കൃത്രിമബുദ്ധി അടിസ്ഥാനമാക്കിയുള്ള സേവനങ്ങൾ, ബഹുഭാഷാ ശബ്ദസഹായ സംവിധാനം, രേഖാ പരിശോധന, പരാതികളുടെ തത്സമയ നിരീക്ഷണം തുടങ്ങിയവ ഘട്ടംഘട്ടമായി നടപ്പാക്കാനാണ് പദ്ധതി. ഹജ്ജ്-2027 നുള്ള ക്വാട്ട, ആരോഗ്യ മാനദണ്ഡങ്ങൾ, താമസം, ഗതാഗതം, ചികിത്സാ ഒരുക്കങ്ങൾ എന്നിവയ്ക്ക് മുൻഗണന നൽകി തയ്യാറെടുപ്പുകൾ ഉടൻ തുടങ്ങാൻ മന്ത്രി നിർദേശം നൽകി. ഹജ്ജ്-2027 നയം ഉടൻ പ്രഖ്യാപിക്കുമെന്നും തുടർന്ന് അപേക്ഷകൾ ക്ഷണിക്കുമെന്നും അദ്ദേഹം അറിയിച്ചു.