രാഷ്ട്രപതി ദ്രൗപദി മുർമു ജൂൺ പതിനെട്ട് മുതൽ ഇരുപത്തിരണ്ട് വരെ മധ്യപ്രദേശും ഒഡീഷയും സന്ദർശിക്കും. ജൂൺ പതിനെട്ടിന് മധ്യപ്രദേശിലെ ബേതൂളിൽ നടക്കുന്ന ആദിവാസി സമൂഹ ശാക്തീകരണ പരിപാടിയിൽ അവർ പങ്കെടുക്കും. ജൂൺ പത്തൊൻപതിന് ഓംകാരേശ്വറിൽ നടക്കുന്ന അന്താരാഷ്ട്ര സിക്കിൾ സെൽ ദിനാചരണത്തിലും പങ്കെടുക്കും. അതേ ദിവസം ഒഡീഷയിലെ റൈരംഗ്പൂരിൽ വിവിധ വികസന പദ്ധതികളും സൗകര്യങ്ങളും രാഷ്ട്രപതി ഉദ്ഘാടനം ചെയ്യും.

ഭുവനേശ്വറിലെ അഖിലേന്ത്യാ വൈദ്യശാസ്ത്ര സ്ഥാപനത്തിന്റെ നേതൃത്വത്തിലുള്ള മെഡിക്കൽ ക്യാമ്പ്, ഖനനബാധിത ഗ്രാമങ്ങൾക്കായുള്ള ജലവിതരണ പദ്ധതി, മാതൃശക്തി ഭവൻ, പ്രത്യേക സർക്യൂട്ട് ഹൗസ്, പൊലീസ് ജില്ല എന്നിവയാണ് ഉദ്ഘാടനം ചെയ്യുക. ജൂൺ ഇരുപതിന് പ്രധാനമന്ത്രി നരേന്ദ്ര മോദിക്കൊപ്പം പഹാഡ്പൂരിലെ സ്കൂളും നൈപുണ്യ കേന്ദ്രവും ഉൾപ്പെടെയുള്ള സ്ഥലങ്ങൾ സന്ദർശിക്കും. ഗുണഭോക്താക്കളുമായും കുട്ടികളുമായും സംവദിക്കുമെന്നും അറിയിച്ചിട്ടുണ്ട്. തുടർന്ന് റൈരംഗ്പൂരിൽ പൊതുപരിപാടിയിലും പങ്കെടുക്കും.

ജൂൺ ഇരുപത്തിയൊന്നിന് ജബൽപൂരിൽ നടക്കുന്ന അന്താരാഷ്ട്ര യോഗ ദിനാചരണത്തിൽ രാഷ്ട്രപതി പങ്കെടുക്കും. അതേ ദിവസം റാണി ദുർഗാവതി സർവകലാശാലയുടെ മുപ്പത്തിയാറാമത് ബിരുദദാനച്ചടങ്ങിലും സാന്നിധ്യമറിയിക്കും. ജൂൺ ഇരുപത്തിരണ്ടിന് കുനോ ദേശീയോദ്യാനത്തിൽ സഹരിയ ഗോത്രവിഭാഗാംഗങ്ങൾ, ചീറ്റ നിരീക്ഷകർ, വിനോദസഞ്ചാര മാർഗദർശകർ, കുനോ സംഘാംഗങ്ങൾ എന്നിവരുമായി കൂടിക്കാഴ്ച നടത്തും.

.