ഹരിപ്പാട്, 2026 ജൂൺ 17 –

വീയപുരത്ത് 15 വയസുകാരിയായ പത്താം ക്ലാസ് വിദ്യാർഥിനിയെ വിവിധ സാഹചര്യങ്ങളിൽ പീഡിപ്പിച്ച സംഭവത്തിൽ നാല് പേർക്കെതിരെ വീയപുരം പൊലീസ് പോക്സോ കേസ് രജിസ്റ്റർ ചെയ്തു. കേസുമായി ബന്ധപ്പെട്ട് പെൺകുട്ടിയുടെ ആൺസുഹൃത്തായ ചെറുതന സ്വദേശി അഭിജിത്തിനെയും സഹോദരീഭർത്താവായ മന്നാർ സ്വദേശി അമ്പാടിയെയും പൊലീസ് അറസ്റ്റ് ചെയ്തു. സ്കൂളിലേക്ക് പോയ പെൺകുട്ടിയെ കാണാതായതിനെ തുടർന്ന് മാതാവ് നൽകിയ പരാതിയിലാണ് അന്വേഷണം ആരംഭിച്ചത്. തുടർന്ന് മണ്ണാറശാലയിൽ നിന്ന് പെൺകുട്ടിയെ പൊലീസ് കണ്ടെത്തി.

സ്റ്റേഷനിൽ എത്തിച്ച് നടത്തിയ പ്രാഥമിക ചോദ്യം ചെയ്യലിലാണ് ആൺസുഹൃത്തായ അഭിജിത്തിനെക്കുറിച്ചുള്ള വിവരങ്ങൾ ലഭിച്ചത്. തുടർന്ന് കസ്റ്റഡിയിലെടുത്ത് ചോദ്യം ചെയ്തപ്പോഴാണ് പീഡനവിവരങ്ങൾ പുറത്തുവന്നത്. ഹരിപ്പാട്ടെ ഒരു വ്യാപാര സ്ഥാപനത്തിൽ സെയിൽസ്മാനായി ജോലി ചെയ്യുന്ന അഭിജിത് വിവാഹിതനും രണ്ട് കുട്ടികളുടെ പിതാവുമാണ്. ലഭിച്ച വിവരങ്ങളുടെ അടിസ്ഥാനത്തിലാണ് പൊലീസ് അറസ്റ്റ് രേഖപ്പെടുത്തിയത്.

പെൺകുട്ടിക്ക് നടത്തിയ വിശദമായ കൗൺസിലിങ്ങിലാണ് മറ്റ് പീഡനവിവരങ്ങളും പുറത്തുവന്നത്. എട്ടാം ക്ലാസിൽ പഠിക്കുന്ന കാലം മുതൽ സഹോദരിയുടെ ഭർത്താവായ അമ്പാടി തന്നെ നിരന്തരം പീഡിപ്പിച്ചിരുന്നതായി പെൺകുട്ടി മൊഴി നൽകിയതായി പൊലീസ് അറിയിച്ചു. ഇതിന്റെ അടിസ്ഥാനത്തിലാണ് അമ്പാടിയെയും അറസ്റ്റ് ചെയ്തത്. നിലവിൽ അറസ്റ്റിലായവർക്കു പുറമെ അടുത്ത ബന്ധു ഉൾപ്പെടെ രണ്ട് പേർ കൂടി വിവിധ സമയങ്ങളിൽ പീഡിപ്പിച്ചതായി പെൺകുട്ടി മൊഴി നൽകിയിട്ടുണ്ട്. ഇവർക്കെതിരെയും പോക്സോ വകുപ്പുകൾ ചുമത്തിയിട്ടുണ്ട്. വിശദമായ മൊഴി, മെഡിക്കൽ പരിശോധനാ റിപ്പോർട്ട്, ഡിജിറ്റൽ തെളിവുകൾ എന്നിവ പരിശോധിച്ച ശേഷമായിരിക്കും തുടർനടപടികളിലേക്ക് കടക്കുക.