ന്യൂഡൽഹി :ജൂൺ 17

അമേരിക്ക ആസ്ഥാനമായുള്ള ക്രെഡിറ്റ് ഇൻഫർമേഷൻ, റിസ്ക് അനലിറ്റിക്സ് സ്ഥാപനമായ TransUnion പ്രസിദ്ധീകരിച്ച “H1 2026 Update: Top Fraud Trends Report” എന്ന ആഗോള പഠന റിപ്പോർട്ടാണ്. ഈ റിപ്പോർട്ട് 2026 ഏപ്രിൽ 16-ന് പുറത്തിറക്കിയതാണ്. ലോകത്തിന്റെ വിവിധ രാജ്യങ്ങളിലെ കോടിക്കണക്കിന് ഡിജിറ്റൽ ഇടപാടുകളുടെ വിശകലനവും ഉപഭോക്തൃ സർവേകളും സ്ഥാപനങ്ങളുടെ തട്ടിപ്പ്-നിരീക്ഷണ ഡാറ്റയും അടിസ്ഥാനമാക്കിയാണ് റിപ്പോർട്ട് തയ്യാറാക്കിയത്. ഇന്ത്യ ഉൾപ്പെടെ നിരവധി രാജ്യങ്ങളിലെ ഡിജിറ്റൽ തട്ടിപ്പ് പ്രവണതകളെ ഇത് താരതമ്യം ചെയ്യുന്നു

ലോക ശരാശരിയെക്കാൾ ഇരട്ടിപേർ ഇന്ത്യയിൽ തട്ടിപ്പിനിരയാവുന്നു

ഇന്ത്യയെക്കുറിച്ച് റിപ്പോർട്ട് ശ്രദ്ധയിൽപ്പെടുത്തിയ പ്രധാന കണ്ടെത്തൽ, 2025-ൽ ഇന്ത്യയിലെ സംശയാസ്പദ ഡിജിറ്റൽ തട്ടിപ്പ് നിരക്ക് 7.1% ആയിരുന്നു എന്നതാണ്. ഇത് ആഗോള ശരാശരിയായ 3.8 ശതമാനത്തിന്റെ ഏകദേശം ഇരട്ടിയാണ്. ഇന്ത്യൻ ഉപഭോക്താക്കൾക്ക് സംഭവിച്ച സാമ്പത്തിക നഷ്ടം ആഗോള ശരാശരിയേക്കാൾ 36 ശതമാനം കൂടുതലാണെന്നും റിപ്പോർട്ട് കണ്ടെത്തി. തട്ടിപ്പുകാർ പുതിയ അക്കൗണ്ടുകൾ സൃഷ്ടിക്കുന്നതിലുപരി നിലവിലുള്ള അക്കൗണ്ടുകളിലേക്കുള്ള നുഴഞ്ഞുകയറ്റം, അക്കൗണ്ട് ടേക്ക്‌ഓവർ, ഐഡന്റിറ്റി മോഷണം, എഐ അധിഷ്ഠിത സോഷ്യൽ എൻജിനിയറിങ് തട്ടിപ്പുകൾ എന്നിവയിലേക്ക് കൂടുതൽ ശ്രദ്ധ കേന്ദ്രീകരിക്കുന്നതായും റിപ്പോർട്ട് ചൂണ്ടിക്കാട്ടുന്നു. ആഗോളതലത്തിൽ 2025-ൽ ഏറ്റവും കൂടുതൽ തട്ടിപ്പ് സാധ്യത കണ്ടെത്തിയ ഘട്ടം അക്കൗണ്ട് സൃഷ്ടിക്കൽ (Account Creation) ആയിരുന്നു. ഈ വിഭാഗത്തിൽ 8.3% ശ്രമങ്ങളും സംശയാസ്പദമായി കണ്ടെത്തിയതായി റിപ്പോർട്ട് പറയുന്നു.

ട്രാൻസ്‌യൂണിയൻ 2026-ൽ പുറത്തിറക്കിയ ‘ടോപ്പ് ഫ്രോഡ് ട്രെൻഡ്സ്’ റിപ്പോർട്ട് പ്രകാരം, ഇന്ത്യയിലെ ഡിജിറ്റൽ തട്ടിപ്പ് നിരക്ക് ആഗോള ശരാശരിയുടെ ഇരട്ടിയോട് അടുത്താണ്. ലോകത്തിലെ ഏറ്റവും വേഗത്തിൽ വളരുന്ന ഡിജിറ്റൽ സമ്പദ്‌വ്യവസ്ഥകളിലൊന്നായ ഇന്ത്യ, അതേ വേഗത്തിൽ വളരുന്ന സൈബർ കുറ്റകൃത്യ ശൃംഖലകളുടെയും ലക്ഷ്യമായി മാറുകയാണെന്നാണ് റിപ്പോർട്ടിന്റെ മുന്നറിയിപ്പ്.”

ഫിഷിങ്: വ്യാജ സന്ദേശങ്ങളുടെ കെണി

ഏറ്റവും വ്യാപകമായ ഡിജിറ്റൽ തട്ടിപ്പ് ഫിഷിങ് (Phishing) ആണ്. ബാങ്ക്, യുപിഐ സേവനദാതാക്കൾ, ഇ-കൊമേഴ്‌സ് കമ്പനികൾ, സർക്കാർ ഏജൻസികൾ എന്നിവയുടെ പേരിൽ വ്യാജ എസ്‌എംഎസുകൾ, ഇമെയിലുകൾ, വാട്‌സ്ആപ്പ് സന്ദേശങ്ങൾ എന്നിവ അയച്ച് ഉപഭോക്താക്കളിൽ നിന്ന് പാസ്‌വേഡുകൾ, ഒടിപികൾ, ബാങ്ക് വിവരങ്ങൾ എന്നിവ തട്ടിയെടുക്കുന്നതാണ് രീതി. യഥാർഥ വെബ്‌സൈറ്റുകളെ അനുകരിക്കുന്ന വ്യാജ വെബ്‌സൈറ്റുകളിലേക്കാണ് ഇരകളെ നയിക്കുന്നത്. ഇന്ന് ആർട്ടിഫിഷ്യൽ ഇന്റലിജൻസ് ഉപയോഗിച്ച് ഇത്തരം സന്ദേശങ്ങൾ കൂടുതൽ വിശ്വസനീയമായി നിർമ്മിക്കപ്പെടുന്നതിനാൽ സാധാരണ ഉപയോക്താക്കൾക്ക് വ്യാജവും യഥാർഥവും തിരിച്ചറിയാൻ പ്രയാസമാണ്.

ഡീപ്‌ഫേക്ക് തട്ടിപ്പുകൾ: ശബ്ദവും മുഖവും ഇനി തെളിവല്ല

ഏറ്റവും അപകടകരമായി വളരുന്ന മേഖല ഡീപ്‌ഫേക്ക് തട്ടിപ്പുകളാണ്. കൃത്രിമബുദ്ധിയുടെ സഹായത്തോടെ ബന്ധുക്കളുടെയോ സുഹൃത്തുക്കളുടെയോ ഉദ്യോഗസ്ഥരുടെയോ ശബ്ദം അനുകരിച്ച് അടിയന്തര സാമ്പത്തിക സഹായം ആവശ്യപ്പെടുന്ന കോളുകൾ വർധിക്കുകയാണ്. ചില കേസുകളിൽ വീഡിയോ കോളുകളിലും വ്യാജ മുഖങ്ങളും ശബ്ദങ്ങളും ഉപയോഗിക്കപ്പെടുന്നു. ഇന്ത്യയിൽ ഇത്തരം എഐ ശബ്ദ തട്ടിപ്പുകൾക്ക് ഇരയായവരിൽ ഭൂരിഭാഗം പേർക്കും സാമ്പത്തിക നഷ്ടമുണ്ടായതായി പഠനങ്ങൾ വ്യക്തമാക്കുന്നു. മുമ്പ് വ്യാജരേഖകൾ ഉപയോഗിച്ചാണ് തട്ടിപ്പുകൾ നടന്നിരുന്നതെങ്കിൽ ഇന്ന് മനുഷ്യരുടെ വിശ്വാസം തന്നെ സാങ്കേതികവിദ്യ ഉപയോഗിച്ച് ഹാക്ക് ചെയ്യപ്പെടുകയാണ്.

ഡിജിറ്റൽ അറസ്റ്റ്, നിക്ഷേപ തട്ടിപ്പുകൾ, ക്രിപ്‌റ്റോ കെണികൾ

സമീപകാലത്ത് ഇന്ത്യയിൽ വൻതോതിൽ റിപ്പോർട്ട് ചെയ്യപ്പെടുന്ന മറ്റൊരു തട്ടിപ്പാണ് “ഡിജിറ്റൽ അറസ്റ്റ്”. സിബിഐ, എൻഫോഴ്‌സ്‌മെന്റ് ഡയറക്ടറേറ്റ്, പൊലീസ്, കസ്റ്റംസ് തുടങ്ങിയ ഏജൻസികളുടെ പേരിൽ വിളിച്ച് ഇരകളെ മണിക്കൂറുകളോളം വീഡിയോ കോളിൽ പിടിച്ചിരുത്തി പണം കൈമാറാൻ നിർബന്ധിതരാക്കുന്ന രീതിയാണിത്. ഇതിന് പുറമെ ഉയർന്ന ലാഭം വാഗ്ദാനം ചെയ്യുന്ന വ്യാജ ഓഹരി നിക്ഷേപ പദ്ധതികൾ, ക്രിപ്‌റ്റോകറൻസി നിക്ഷേപങ്ങൾ, ഓൺലൈൻ ട്രേഡിങ് പ്ലാറ്റ്‌ഫോമുകൾ എന്നിവയും ആയിരക്കണക്കിന് ആളുകളെ വഞ്ചിക്കുന്നുണ്ട്. ലോകമെമ്പാടും ഏറ്റവും കൂടുതൽ സാമ്പത്തിക നഷ്ടമുണ്ടാക്കുന്ന ഓൺലൈൻ കുറ്റകൃത്യങ്ങളിൽ നിക്ഷേപ തട്ടിപ്പുകൾ മുൻനിരയിലാണെന്ന് വിവിധ പഠനങ്ങൾ വ്യക്തമാക്കുന്നു.

ക്യൂആർ കോഡിൽ നിന്ന് പാർസൽ തട്ടിപ്പിലേക്ക്

ഇന്ന് തട്ടിപ്പുകാരുടെ ലക്ഷ്യം ബാങ്ക് അക്കൗണ്ടുകൾ മാത്രമല്ല. വ്യാജ പാർസൽ ഡെലിവറി സന്ദേശങ്ങൾ, ക്യൂആർ കോഡ് സ്കാനിങ് തട്ടിപ്പുകൾ, വ്യാജ കസ്റ്റമർ കെയർ നമ്പറുകൾ, ജോലി വാഗ്ദാനങ്ങൾ, ഓൺലൈൻ വാടക തട്ടിപ്പുകൾ, റൊമാൻസ് സ്കാമുകൾ, സോഷ്യൽ മീഡിയ അക്കൗണ്ട് ഹാക്കിങ്, സെക്സ്റ്റോർഷൻ തുടങ്ങിയ നിരവധി രൂപങ്ങളിലേക്ക് ഡിജിറ്റൽ കുറ്റകൃത്യങ്ങൾ വ്യാപിച്ചുകഴിഞ്ഞു. സാധാരണ ഉപയോക്താക്കളുടെ ദൈനംദിന ജീവിതവുമായി ബന്ധപ്പെട്ട ഇടപെടലുകളെ അനുകരിക്കുന്നതിനാൽ ഇവ തിരിച്ചറിയുന്നത് കൂടുതൽ ബുദ്ധിമുട്ടാകുന്നു. പല തട്ടിപ്പുകളും അരമണിക്കൂറിനുള്ളിൽ പൂർത്തിയാകുന്നതായും പഠനങ്ങൾ കാണിക്കുന്നു.

സാങ്കേതിക പോരാട്ടത്തിന്റെ പുതിയ ഘട്ടം

ഡിജിറ്റൽ തട്ടിപ്പുകൾ ഇന്ന് വ്യക്തിഗത സാമ്പത്തിക നഷ്ടത്തിന്റെ പ്രശ്നം മാത്രമല്ല; ഡിജിറ്റൽ സമ്പദ്‌വ്യവസ്ഥയിലുള്ള ജനങ്ങളുടെ വിശ്വാസത്തെയും ബാധിക്കുന്ന വെല്ലുവിളിയാണ്. രാജ്യത്ത് ലക്ഷക്കണക്കിന് സിം കാർഡുകളും ആയിരക്കണക്കിന് തട്ടിപ്പ് അക്കൗണ്ടുകളും അധികൃതർ ഇതിനകം തടഞ്ഞിട്ടുണ്ട്. 1930 ഹെൽപ്‌ലൈൻ, ദേശീയ സൈബർ ക്രൈം റിപ്പോർട്ടിങ് പോർട്ടൽ, ബാങ്കുകളുടെ തത്സമയ നിരീക്ഷണ സംവിധാനങ്ങൾ തുടങ്ങിയവ ശക്തിപ്പെടുത്തിയിട്ടുണ്ടെങ്കിലും കുറ്റവാളികൾ എഐയും ഓട്ടോമേഷനും ഉപയോഗിച്ച് പുതിയ തന്ത്രങ്ങൾ വികസിപ്പിക്കുകയാണ്. വിദഗ്ധരുടെ അഭിപ്രായത്തിൽ, സാങ്കേതിക സുരക്ഷാ സംവിധാനങ്ങൾ മാത്രം പോര; ഓരോ ഉപയോക്താവും സംശയാസ്പദ സന്ദേശങ്ങളെയും കോളുകളെയും തിരിച്ചറിയാനുള്ള ഡിജിറ്റൽ സാക്ഷരത നേടുന്നതാണ് ഈ യുദ്ധത്തിലെ ഏറ്റവും വലിയ പ്രതിരോധം.