എടക്കര, 2026 ജൂൺ 15 –
പുഞ്ചക്കൊല്ലിയിലെ ആദിവാസി കുടുംബങ്ങൾക്ക് ഇത്തവണയും പുന്നപ്പുഴ മുറിച്ചുകടക്കാൻ ചങ്ങാടം തന്നെയാണ് ആശ്രയം. കഴിഞ്ഞ നിലമ്പൂർ ഉപതിരഞ്ഞെടുപ്പ് പ്രചാരണ വേളയിൽ പ്രദേശം സന്ദർശിച്ച പട്ടികജാതി-വർഗ വികസന മന്ത്രി ഒ. ആർ. കേളു പുഴയ്ക്ക് കുറുകെ പാലം നിർമ്മിക്കുമെന്ന് ഉറപ്പ് നൽകിയിരുന്നെങ്കിലും പദ്ധതി ഇതുവരെ നടപ്പായിട്ടില്ല. നിലവിൽ പാലം നിർമാണം മണ്ണ് പരിശോധന ഘട്ടത്തിൽ തന്നെ തുടരുകയാണ്.
മന്ത്രിയുടെ സന്ദർശനത്തിനിടെ പുന്നപ്പുഴ കടക്കുമ്പോൾ ചങ്ങാടത്തിന്റെ നിയന്ത്രണം തെറ്റി പുഴയിൽ കുടുങ്ങിയ സംഭവത്തെ തുടർന്നാണ് അടിയന്തരമായി പാലം നിർമിക്കുമെന്ന പ്രഖ്യാപനം ഉണ്ടായത്. എന്നാൽ പുഞ്ചക്കൊല്ലി, അളയ്ക്കൽ ആദിവാസി നഗറുകളിലെ ജനങ്ങൾക്ക് ഇപ്പോഴും മഴക്കാലത്ത് ചങ്ങാടത്തെ ആശ്രയിക്കേണ്ട സ്ഥിതിയാണ്. 2019ലെ പ്രളയത്തിൽ പുന്നപ്പുഴയ്ക്ക് കുറുകെയുണ്ടായിരുന്ന പാലം ഒലിച്ചുപോയതോടെയാണ് ഈ ദുരിതം ആരംഭിച്ചത്.
അഞ്ഞൂറോളം ആദിവാസികൾ താമസിക്കുന്ന ഈ മേഖലയിൽ പുറംലോകവുമായി ബന്ധപ്പെടാനുള്ള പ്രധാന മാർഗമാണ് പുഴ കടക്കൽ. തിരഞ്ഞെടുപ്പ് കാലങ്ങളിൽ നേതാക്കൾ പാലം വാഗ്ദാനം ചെയ്യാറുണ്ടെങ്കിലും അത് നടപ്പാകാറില്ലെന്നാണ് നാട്ടുകാരുടെ പരാതി. ഇത്തവണ പുഞ്ചക്കൊല്ലി വനസംരക്ഷണ സമിതിയാണ് ചങ്ങാടത്തിന്റെ ചെലവ് വഹിച്ചത്. വനവകുപ്പ് ഉദ്യോഗസ്ഥരുടെ മേൽനോട്ടത്തിൽ നാട്ടുകാരുടെ നേതൃത്വത്തിലാണ് ചങ്ങാടം നിർമ്മിച്ചത്.
