ഗാന്ധിനഗർ, 2026 ജൂൺ 15 –
ഗുജറാത്തിലെ ഗാന്ധിനഗറിൽ പത്താം ക്ലാസ് വിദ്യാർഥിനിക്കെതിരായ ലൈംഗികാതിക്രമ പരാതിയിൽ സ്കൂൾ പ്രിൻസിപ്പലിന്റെ മകനെതിരെ പൊലീസ് കേസ് രജിസ്റ്റർ ചെയ്തു. സ്കൂൾ ഹോസ്റ്റലിൽ താമസിച്ചിരുന്ന വിദ്യാർഥിനിക്കെതിരെയാണ് അതിക്രമം നടന്നതെന്നാണ് പരാതി. സെക്ടർ-21 പൊലീസ് സ്റ്റേഷനിലാണ് കേസ് രജിസ്റ്റർ ചെയ്തിരിക്കുന്നത്.
പോക്സോ നിയമപ്രകാരവും എസ്സി-എസ്ടി അതിക്രമനിരോധന നിയമപ്രകാരവുമുള്ള വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്. പത്താം ക്ലാസ് ബോർഡ് പരീക്ഷയ്ക്കായി ഹോസ്റ്റലിൽ താമസിച്ചിരുന്ന വിദ്യാർഥിനിയുമായി പ്രതി സൗഹൃദം സ്ഥാപിച്ച ശേഷം പലതവണ ലൈംഗികമായി പീഡിപ്പിച്ചെന്നാണ് പരാതിയിൽ പറയുന്നത്. ഹോസ്റ്റൽ വിട്ട് വീട്ടിലേക്ക് മടങ്ങിയ ശേഷവും ഫോൺ വഴി ബന്ധപ്പെടുകയും സമ്മർദം ചെലുത്തുകയും ചെയ്തതായും കുടുംബം ആരോപിക്കുന്നു.
തുടർച്ചയായ പീഡനങ്ങൾ കുട്ടിയുടെ മാനസികാരോഗ്യത്തെയും പഠനത്തെയും ഗുരുതരമായി ബാധിച്ചതായാണ് പരാതിയിൽ പറയുന്നത്. കുട്ടിയുടെ പെരുമാറ്റത്തിൽ വന്ന മാറ്റങ്ങൾ ശ്രദ്ധയിൽപ്പെട്ടതിനെ തുടർന്ന് കുടുംബാംഗങ്ങൾ കാര്യങ്ങൾ അന്വേഷിച്ചപ്പോഴാണ് സംഭവം പുറത്തറിയുന്നത്. തുടർന്ന് കുടുംബം പൊലീസിനെ സമീപിക്കുകയും പ്രാഥമിക പരിശോധനകൾക്ക് ശേഷം സെക്ടർ-21 പൊലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിക്കുകയുമായിരുന്നു.
