ഭിന്നശേഷിക്കാരിയായ യുവതിയെ ലൈംഗികമായി പീഡിപ്പിച്ചെന്ന പരാതി; 77കാരൻ അറസ്റ്റിൽ

കോഴിക്കോട്, 2026 ജൂൺ 14 –

ഭിന്നശേഷിക്കാരിയായ 19കാരിയെ ലൈംഗികമായി പീഡിപ്പിച്ചെന്ന പരാതിയിൽ 77കാരനെ ബാലുശ്ശേരി പോലീസ് അറസ്റ്റ് ചെയ്തു. കുറുമ്പൊയിൽ സ്വദേശി മണ്ടോത്തുമൂലയിൽ കേളനെയാണ് കേസിൽ അറസ്റ്റ് ചെയ്തത്. ബാലുശ്ശേരിയിലാണ് സംഭവം നടന്നത്.

ബഡ്‌സ് സ്കൂൾ വിദ്യാർഥിനിയായിരുന്ന യുവതി കഴിഞ്ഞ ദിവസം സ്കൂൾ ബസിൽ നിന്ന് ഇറങ്ങി വീട്ടിലേക്ക് പോകുന്നതിനിടെയാണ് സംഭവം ഉണ്ടായതെന്ന് പോലീസ് പറഞ്ഞു. ബലപ്രയോഗത്തിലൂടെ യുവതിയെ ആളൊഴിഞ്ഞ വീട്ടിലേക്ക് കൊണ്ടുപോയി ഉപദ്രവിച്ചെന്നാണ് പരാതി. തുടർന്ന് യുവതി വീട്ടിലെത്തി വിവരം അറിയിച്ചതോടെ രക്ഷിതാക്കൾ പോലീസിൽ പരാതി നൽകുകയായിരുന്നു.

പരാതിയെ തുടർന്ന് ഇരയുടെ മൊഴി രേഖപ്പെടുത്തിയ പോലീസ് പ്രതിക്കെതിരെ ലൈംഗികാതിക്രമവുമായി ബന്ധപ്പെട്ട വകുപ്പുകൾ ചുമത്തി അറസ്റ്റ് ചെയ്തു. സംഭവത്തിൽ കൂടുതൽ അന്വേഷണം തുടരുകയാണെന്ന് പോലീസ് അറിയിച്ചു.