ഹിമാചൽ പ്രദേശിലെ മണ്ഡി ഹെഡ് പോസ്റ്റ് ഓഫീസിനും റെഹർധാർ ബ്രാഞ്ച് പോസ്റ്റ് ഓഫീസിനും ഇടയിൽ ഡ്രോൺ അധിഷ്ഠിത തപാൽ, പാഴ്സൽ കൈമാറ്റ സേവനം ആരംഭിച്ചു. ജൂൺ 12 മുതൽ സേവനം പ്രാബല്യത്തിൽ വന്നു. ഏകദേശം 12 കിലോമീറ്റർ ദൂരമുള്ള ഈ റൂട്ടിൽ സാധാരണ സംവിധാനങ്ങളിലൂടെ രണ്ട് മണിക്കൂറിലധികം എടുത്തിരുന്ന യാത്ര ഇനി ഏഴ് മിനിറ്റിനുള്ളിൽ പൂർത്തിയാക്കാനാകും.

കേന്ദ്ര വാർത്താവിനിമയ മന്ത്രിയായ ജ്യോതിരാദിത്യ എം. സിന്ധ്യയുടെ നേതൃത്വത്തിലാണ് തപാൽ വകുപ്പ് പദ്ധതി നടപ്പാക്കിയത്. ഗ്രാമീണ തപാൽ സേവകരുമായും തപാൽ ജീവനക്കാരുമായും നടത്തിയ കൂടിക്കാഴ്ചകളിൽ ദുർഘട പ്രദേശങ്ങളിലെ വേഗമേറിയ ബന്ധത്തിന്റെ ആവശ്യം ഉയർന്നതിനെ തുടർന്നാണ് നടപടി. സാങ്കേതികവിദ്യയുടെ സഹായത്തോടെ തപാൽ സേവനങ്ങൾ കൂടുതൽ ശക്തമാക്കുക എന്ന ലക്ഷ്യത്തോടെയാണ് പദ്ധതി മുന്നോട്ടുകൊണ്ടുപോകുന്നത്. കുന്നിൻപ്രദേശങ്ങളിലെ ഭൂപ്രകൃതി സൃഷ്ടിക്കുന്ന വെല്ലുവിളികൾ മറികടക്കാനും തത്സമയ നിരീക്ഷണം ഉറപ്പാക്കാനും പരിസ്ഥിതി സൗഹൃദ ഗതാഗത മാർഗം ഒരുക്കാനുമാണ് ഈ സംവിധാനം സഹായിക്കുന്നത്.

ഹിമാചൽ പ്രദേശിലും അസമിലുമായി തിരിച്ചറിഞ്ഞിട്ടുള്ള ഏകദേശം 150 റൂട്ടുകളിൽ അടുത്ത രണ്ടുമുതൽ മൂന്നുമാസത്തിനുള്ളിൽ ഡ്രോൺ അധിഷ്ഠിത തപാൽ കൈമാറ്റം വ്യാപിപ്പിക്കാനാണ് തപാൽ വകുപ്പിന്റെ പദ്ധതി. അതിൽ ആദ്യമായി പ്രവർത്തനം ആരംഭിച്ച റൂട്ടാണ് മണ്ഡി-റെഹർധാർ. ഈ നീക്കം ദുർഘടവും മലനിരകളുള്ള പ്രദേശങ്ങളിലുമുള്ള തപാൽ സേവന വിതരണം മെച്ചപ്പെടുത്തുമെന്നും പ്രാദേശിക ജനങ്ങൾക്ക് അത്യാവശ്യ തപാൽ സേവനങ്ങളിലേക്കുള്ള പ്രവേശനം എളുപ്പമാക്കുമെന്നും അധികൃതർ പ്രതീക്ഷിക്കുന്നു.