ർ
തിരുവനന്തപുരം, 2026 ജൂൺ 13 –
തലസ്ഥാന നഗരത്തിൽ ബംഗ്ലാദേശി കുടിയേറ്റക്കാരുടെ സാന്നിധ്യം തടയാൻ കർശന നടപടികൾ സ്വീകരിക്കുമെന്ന് മേയർ വി.വി. രാജേഷ് അറിയിച്ചു. പശ്ചിമ ബംഗാളിൽ ഭരണ മാറ്റം വന്നതോടെ നിരവധി ബംഗ്ലാദേശി കുടിയേറ്റക്കാർ മടങ്ങിപ്പോയെങ്കിലും, ഇതര സംസ്ഥാന തൊഴിലാളികളുടെ മറവിൽ ചിലർ ഇപ്പോഴും തലസ്ഥാനത്ത് തുടരുന്നതായി വിവരം ലഭിച്ചതായി അദ്ദേഹം വാർത്താസമ്മേളനത്തിൽ പറഞ്ഞു.
നുഴഞ്ഞുകയറ്റക്കാർ രാജ്യത്തിന്റെ സുരക്ഷയ്ക്ക് ഭീഷണിയാണെന്നും വിഷയത്തിൽ കൂടുതൽ വിവരങ്ങൾ ശേഖരിക്കാൻ ലേബർ കോൺട്രാക്ടർമാരുടെയും കരാറുകാരുടെയും അടിയന്തര യോഗം വിളിക്കുമെന്നും മേയർ അറിയിച്ചു. ഇതര സംസ്ഥാനങ്ങളിൽ നിന്ന് എത്തി ജോലി ചെയ്യുന്നവർ കൈവശം സൂക്ഷിക്കേണ്ട രേഖകൾ യോഗത്തിൽ പരിശോധിക്കും. തൊഴിലാളികളെ സംബന്ധിച്ച വിവരശേഖരണവും ശക്തമാക്കും.
ലേബർ ക്യാമ്പുകളിലും ഇതര സംസ്ഥാന തൊഴിലാളികൾ ജോലി ചെയ്യുന്ന സ്ഥലങ്ങളിലും കോർപറേഷൻ ആരോഗ്യവിഭാഗത്തിന്റെ നേതൃത്വത്തിൽ കർശന പരിശോധനകൾ നടത്തുമെന്നും മേയർ വ്യക്തമാക്കി. കോർപറേഷന് സ്വീകരിക്കാനാകുന്ന നടപടികൾ സ്വീകരിക്കുമെന്നും, മറ്റ് കാര്യങ്ങൾ പൊലീസിന്റെ ശ്രദ്ധയിൽപ്പെടുത്തുമെന്നും അദ്ദേഹം പറഞ്ഞു. ഇതര സംസ്ഥാന തൊഴിലാളികൾക്ക് ആവശ്യമായ എല്ലാ സംരക്ഷണവും ഉറപ്പാക്കുന്നതിനൊപ്പം മറ്റ് രാജ്യങ്ങളിൽ നിന്നുള്ളവർ അനധികൃതമായി എത്തി പ്രശ്നങ്ങൾ സൃഷ്ടിക്കുന്നത് തടയുന്നതിനാണ് നടപടികളെന്നും മേയർ വിശദീകരിച്ചു.
