ആർപ്പൂക്കരയുടെ സ്വപ്നം യാഥാർഥ്യമാകുന്നു; കോട്ടയത്തിന്റെ ആദ്യ ജനകീയ ചുണ്ടൻവള്ളം നീരണിയാൻ ഒരുങ്ങുന്നു

ഏറ്റുമാനൂർ, 2026 ജൂൺ 12 –

സ്വന്തമായി ഒരു ചുണ്ടൻവള്ളം എന്ന ആർപ്പൂക്കര ഗ്രാമവാസികളുടെ ദീർഘകാല സ്വപ്നം യാഥാർഥ്യമാകുകയാണ്. നാടൊന്നാകെ കൈകോർത്ത ജനകീയ മുന്നേറ്റത്തിന്റെ ഭാഗമായി കോട്ടയത്തിന്റെ ആദ്യ ജനകീയ ചുണ്ടൻവള്ളമായ ആർപ്പൂക്കര ചുണ്ടൻ നിർമ്മാണത്തിന്റെ അവസാന ഘട്ടത്തിലാണ്. ജൂലൈ മധ്യത്തോടെ വള്ളം നീറ്റിലിറക്കാനാണ് ആർപ്പൂക്കര ചുണ്ടൻവള്ള സമിതിയുടെ ശ്രമം. ഈ വർഷത്തെ നെഹ്റു ട്രോഫി വള്ളംകളിയിൽ ചുണ്ടൻവള്ളം മത്സരത്തിനിറങ്ങുമെന്ന പ്രതീക്ഷയിലാണ് നാട്ടുകാർ.

മധ്യകേരളത്തിൽ നിന്ന് ആദ്യമായാണ് ബഹുജന പങ്കാളിത്തത്തോടെ ഒരു ചുണ്ടൻവള്ളം ജലോത്സവ ലോകത്തേക്ക് എത്തുന്നതെന്ന് സമിതി അവകാശപ്പെടുന്നു. 500 കുടുംബങ്ങൾക്കാണ് ആർപ്പൂക്കര ചുണ്ടനിൽ പങ്കാളിത്തമുള്ളത്. 60 ലക്ഷം രൂപ ചെലവഴിച്ചാണ് നിർമ്മാണം. ആഞ്ഞിലിത്തടിയിലാണ് വള്ളം നിർമ്മിക്കുന്നത്. പാല, തൊടുപുഴ മേഖലകളിൽ നിന്നാണ് ഇതിനായി തടികൾ ശേഖരിച്ചത്. കഴിഞ്ഞ സെപ്റ്റംബറിലാണ് നിർമ്മാണം ആരംഭിച്ചത്.

എടത്വ കോയിൽമുക്ക് സാബു നാരായണൻ ആചാരിയാണ് മുഖ്യശില്പി. 128 അടി നീളമുള്ള ചുണ്ടനിൽ മത്സരസമയത്ത് 83 തുഴച്ചിൽക്കാരും അഞ്ച് അമരക്കാരും ഏഴ് താളക്കാരും ഉൾപ്പെടെ 95 പേർ ഉണ്ടാകും. ഫാ. ഡോ. ജയിംസ് മുള്ളശേരി സി.എം.ഐയുടെ നേതൃത്വത്തിലുള്ള 20 അംഗ ബോർഡാണ് പദ്ധതിക്ക് നേതൃത്വം നൽകുന്നത്. കുമരകം ഇമ്മാനുവൽ ബോട്ട് ക്ലബ്ബാണ് ആർപ്പൂക്കര ചുണ്ടൻ തുഴയുക.