കല്ലറ, 2026 ജൂൺ 10 –
കല്ലറയിലെ ഒരു പെട്രോൾ പമ്പിൽ സിഗരറ്റ് കത്തിക്കാൻ ശ്രമിച്ചത് തടഞ്ഞ ജീവനക്കാരെ ആക്രമിച്ച് പരിക്കേൽപ്പിച്ച സംഭവത്തിൽ രണ്ട് യുവാക്കളെ കല്ലറ പോലീസ് കസ്റ്റഡിയിലെടുത്തു. മുണ്ടാർ സ്വദേശികളായ യുവാക്കളാണ് പിടിയിലായത്. ഇന്നലെ വൈകുന്നേരം ആറുമണിയോടെ കല്ലറ ശാലിനി ഫ്യൂവൽസിലായിരുന്നു സംഭവം.
ബൈക്കിലെത്തിയ യുവാക്കൾ പെട്രോൾ നിറച്ച ശേഷം വാഹനം മാറ്റി നിർത്തി സിഗരറ്റ് കത്തിക്കാൻ ശ്രമിക്കുകയായിരുന്നു. ഇത് ശ്രദ്ധയിൽപ്പെട്ട ജീവനക്കാരൻ പമ്പിൽ സിഗരറ്റ് കത്തിക്കരുതെന്ന് പറഞ്ഞതോടെ കൈയിലുണ്ടായിരുന്ന ഹെൽമറ്റ് ഉപയോഗിച്ച് ഇയാളെ മർദിച്ചതായി പറയുന്നു. തടയാൻ എത്തിയ മറ്റ് ജീവനക്കാരെയും യുവാക്കൾ ആക്രമിച്ചതായി പമ്പുടമ അരുൺ പറഞ്ഞു.
സംഭവത്തെ തുടർന്ന് പോലീസ് സ്ഥലത്തെത്തി ഇരുവരെയും കസ്റ്റഡിയിലെടുത്തു. ആക്രമണത്തിൽ പരിക്കേറ്റ പമ്പിലെ മൂന്ന് ജീവനക്കാരെ വൈക്കം താലൂക്ക് ആശുപത്രിയിൽ പ്രവേശിപ്പിച്ചു. ആക്രമണം നടത്തിയവർക്ക് ക്രിമിനൽ പശ്ചാത്തലമുണ്ടെന്ന് പോലീസ് അറിയിച്ചു.
