കൽക്കരി മന്ത്രാലയം ജൂൺ 11ന് ഹൈദരാബാദിൽ കൽക്കരി, ലിഗ്നൈറ്റ് വാതകവത്കരണ പദ്ധതികളെക്കുറിച്ചുള്ള റോഡ് ഷോ സംഘടിപ്പിക്കും. ന്യൂഡൽഹിയിൽ നടന്ന സമാന പരിപാടിക്ക് ലഭിച്ച മികച്ച പ്രതികരണത്തിന്റെ തുടർച്ചയായാണ് ഈ പരിപാടി നടക്കുന്നത്. ഈ മേഖലയിൽ ഉയർന്നുവരുന്ന അവസരങ്ങളും പങ്കാളികളുടെ വർധിച്ച വിശ്വാസവും പരിപാടിയിലൂടെ വീണ്ടും ചർച്ചയാകും.

കേന്ദ്ര കൽക്കരി-ഖനി മന്ത്രി ജി. കിഷൻ റെഡ്ഡി മുഖ്യാതിഥിയായി പങ്കെടുക്കും. സഹമന്ത്രി സതീഷ് ചന്ദ്ര ദുബെ വിശിഷ്ടാതിഥിയായിരിക്കും. കൽക്കരി മന്ത്രാലയ സെക്രട്ടറി വിക്രം ദേവ് ദത്ത്, അഡീഷണൽ സെക്രട്ടറി സനോജ് കുമാർ ഝാ, കേന്ദ്ര-സംസ്ഥാന സർക്കാർ പ്രതിനിധികൾ, കൽക്കരി-ലിഗ്നൈറ്റ് കമ്പനികൾ, സാങ്കേതിക സേവനദാതാക്കൾ, വ്യവസായ സംഘടനകൾ, നിക്ഷേപകർ തുടങ്ങി വിവിധ മേഖലകളിലെ പ്രധാന പങ്കാളികളും പങ്കെടുക്കും. നയപിന്തുണ, സാങ്കേതിക നവീകരണം, നിക്ഷേപ സാധ്യതകൾ, പദ്ധതി നടപ്പാക്കൽ മാർഗങ്ങൾ എന്നിവയാണ് പ്രധാന ചർച്ചാവിഷയങ്ങൾ.

കൽക്കരിയെ വിവിധ വ്യാവസായിക ഉൽപ്പന്നങ്ങൾ നിർമ്മിക്കാൻ ഉപയോഗിക്കാവുന്ന വാതകമാക്കി മാറ്റുന്ന സാങ്കേതിക വിദ്യയാണ് കൽക്കരി വാതകവത്കരണം. ഊർജസുരക്ഷ വർധിപ്പിക്കാനും ഇറക്കുമതി ആശ്രയം കുറയ്ക്കാനും ആഭ്യന്തര കൽക്കരി വിഭവങ്ങളുടെ ഉപയോഗം വൈവിധ്യവത്കരിക്കാനുമായി സർക്കാർ ഇതിനായി വിവിധ നയങ്ങളും പ്രോത്സാഹന നടപടികളും സ്വീകരിച്ചിട്ടുണ്ട്. ഈ റോഡ് ഷോ പങ്കാളിത്തങ്ങൾ ശക്തിപ്പെടുത്താനും രാജ്യത്ത് ശക്തമായ വാതകവത്കരണ സംവിധാനത്തിന് അടിത്തറ ഒരുക്കാനും സഹായിക്കുമെന്നാണ് പ്രതീക്ഷ.