തിരുവനന്തപുരം, 2026 ജൂൺ 8 –
വെടിവച്ചാംകോവിൽ കൊലപാതക കേസിലെ എല്ലാ പ്രതികളെയും പൊലീസ് പിടികൂടി. കഴിഞ്ഞ ദിവസം രാത്രി ഒമ്പത് മണിയോടെയാണ് സംഭവം നടന്നത്. പെരിങ്ങമല സ്വദേശികളായ അഞ്ചംഗ സംഘം രണ്ട് ബൈക്കുകളിലായി പുന്നമൂട് പ്രദേശത്ത് എത്തി. അവിടെ ഉണ്ടായിരുന്ന ശിവസൂര്യയെ ലക്ഷ്യമിട്ടാണ് സംഘം എത്തിയതെന്ന് പൊലീസ് പറയുന്നു.
ഒരു വർഷം മുൻപ് ഫുട്ബോൾ കളിക്കിടെ ശിവസൂര്യയുടെ സംഘവും മറ്റൊരു സംഘവും തമ്മിലുണ്ടായ തർക്കത്തിന്റെ തുടർച്ചയായിരുന്നു ആക്രമണമെന്ന് അന്വേഷണത്തിൽ കണ്ടെത്തി. എതിർ സംഘത്തിലെ ഒരാളെ തുറിച്ചുനോക്കിയെന്ന് ആരോപിച്ചാണ് യുവാക്കൾ ശിവസൂര്യയെ ആക്രമിച്ചത്. കയ്യാങ്കളിക്കിടെ സമീപത്തെ കടയുടെ മുൻവശത്തെ ചില്ല് വാതിലിലേക്ക് ശിവസൂര്യ തെറിച്ചുവീണു. ചില്ലുകൾ ശരീരത്തിലേക്ക് തുളച്ചുകയറിയതിനെ തുടർന്ന് ഗുരുതരമായി പരിക്കേറ്റു എന്ന് പ്രതികൾ പറയുന്നു
ആക്രമണത്തിന് ശേഷം മർദിച്ചവർ തന്നെ ശിവസൂര്യയെ ബൈക്കിൽ ആശുപത്രിയിലെത്തിച്ചു. ആദ്യം ശാന്തിവിള ആശുപത്രിയിലും പിന്നീട് മെഡിക്കൽ കോളേജിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. സംഭവത്തെ തുടർന്ന് പൊലീസ് അന്വേഷണം ശക്തമാക്കുകയും കേസിലെ എല്ലാ പ്രതികളെയും പിടികൂടുകയും ചെയ്തു.
