ഇടുക്കി, 2026 ജൂൺ 8 –
വന്യജീവി ആക്രമണങ്ങളിലെ നഷ്ടപരിഹാര തുക വർധിപ്പിക്കുമെന്ന് വനം മന്ത്രി ഷിബു ബേബി ജോൺ അറിയിച്ചു. ഇടുക്കി ചിന്നക്കനാലിൽ കാട്ടാന ആക്രമണത്തിൽ പരിക്കേറ്റ് ചികിത്സയിൽ കഴിയുന്ന 11 വയസുകാരന് സർക്കാർ സംരക്ഷണം ഉറപ്പാക്കുമെന്നും മന്ത്രി പറഞ്ഞു.
പരിക്കേറ്റ കുട്ടിക്കായി പ്രത്യേക സഹായ പദ്ധതി തയ്യാറാക്കാൻ വനം വകുപ്പ് ഉദ്യോഗസ്ഥർക്ക് നിർദേശം നൽകിയിട്ടുണ്ട്. വന്യജീവി ആക്രമണങ്ങൾ തടയുന്നതിനുള്ള പ്രവർത്തനങ്ങൾക്ക് ഫണ്ടിന്റെ അപര്യാപ്തതയുണ്ടെന്നും മന്ത്രി വ്യക്തമാക്കി. സംയോജിത പ്രതിരോധ സംവിധാനം ഒരുക്കുന്നതിനായി നടപടികൾ സ്വീകരിക്കുമെന്നും അദ്ദേഹം പറഞ്ഞു. അപകട ഇൻഷുറൻസ് ട്രിബ്യൂണൽ മാതൃകയിൽ പുതിയ നഷ്ടപരിഹാര പദ്ധതി കൊണ്ടുവരുന്നതും പരിഗണനയിലുണ്ട്.
ചിന്നക്കനാലിന് സമീപം ഇന്ന് രാവിലെ കാട്ടാന ആക്രമണത്തിൽ ഒരു യുവതി കൊല്ലപ്പെട്ട സംഭവത്തിന്റെ പശ്ചാത്തലത്തിലാണ് മന്ത്രി നിലപാട് വ്യക്തമാക്കിയത്. വിഷയവുമായി ബന്ധപ്പെട്ട് ഇന്ന് രാത്രി എട്ടിന് മുഖ്യമന്ത്രി വി.ഡി. സതീശനുമായി ചർച്ച നടത്തുമെന്നും മന്ത്രി അറിയിച്ചു.
