അൻസിബയുടെ പരാതി: പുതിയ തർക്കപരിഹാര സമിതി രൂപീകരിച്ച് ‘അമ്മ’

കൊച്ചി, 2026 ജൂൺ 6 –

നടി അൻസിബ ഹസന്റെ പരാതി പരിഗണിക്കുന്നതിനായി താരസംഘടനയായ ‘അമ്മ’ പുതിയ തർക്കപരിഹാര സമിതി രൂപീകരിച്ചു. രമേഷ് പിഷാരടി, പൊന്നമ്മ ബാബു, മുത്തുമണി എന്നിവരാണ് സമിതിയിലെ അംഗങ്ങൾ. പ്രസിഡൻറ് ശ്വേത മേനോനും സെക്രട്ടറി കുക്കു പരമേശ്വരനും സമിതിയുടെ ഭാഗമാണ്. അൻസിബയുടെ പരാതിയിൽ സംഘടനാതല അന്വേഷണം നടത്തുന്നതിനായാണ് പുതിയ സമിതി രൂപീകരിച്ചത്.

തന്റെ പരാതി കേൾക്കാൻ രമേഷ് പിഷാരടി, ധ്യാൻ ശ്രീനിവാസൻ, മാല പാർവതി എന്നിവർ ഉൾപ്പെടുന്ന പ്രത്യേക സമിതി വേണമെന്ന് അൻസിബ നേതൃത്വത്തോട് ആവശ്യപ്പെട്ടിരുന്നു. എന്നാൽ പുതുതായി രൂപീകരിച്ച സമിതിയിൽ അൻസിബ ആവശ്യപ്പെട്ടവരിൽ രമേഷ് പിഷാരടി മാത്രമാണ് ഉൾപ്പെട്ടത്. അതേസമയം, അൻസിബ പോലീസിൽ നൽകിയ പരാതികളിൽ പ്രാഥമിക അന്വേഷണം ആരംഭിച്ചിട്ടുണ്ട്. നടൻ ടിനി ടോമിക്കെതിരായ പരാതിയിൽ കടവന്ത്ര പൊലീസ് അന്വേഷണം തുടങ്ങി. തിങ്കളാഴ്ച അൻസിബയുടെ മൊഴി രേഖപ്പെടുത്തും.

നടി ലക്ഷ്മിപ്രിയയ്ക്കെതിരെയായിരുന്നു അൻസിബ ആദ്യം പരാതി നൽകിയത്. ലക്ഷ്മിപ്രിയ നൽകിയ പരാതിയെ തുടർന്ന് തൃപ്പൂണിത്തുറ സ്റ്റേഷനിൽ വിളിച്ചുവരുത്തി മൂന്ന് മണിക്കൂറിലേറെ സ്റ്റേഷനിൽ ഇരുത്തി വനിത എസ്‌ഐ രേഷ്മയും ലക്ഷ്മിപ്രിയയും ചേർന്ന് മാനസികമായി പീഡിപ്പിച്ചുവെന്നാണ് അൻസിബയുടെ പരാതി. ഈ പരാതിയിൽ തൃക്കാക്കര അസിസ്റ്റന്റ് കമ്മീഷണറുടെ ഓഫീസിൽ ലക്ഷ്മിപ്രിയയും എസ്‌ഐ രേഷ്മയും മൊഴി നൽകിയിട്ടുണ്ട്. പരാതികളുമായി ബന്ധപ്പെട്ട അന്വേഷണം വിവിധ തലങ്ങളിൽ പുരോഗമിക്കുകയാണ്.