കൽപ്പറ്റ, 2026 ജൂൺ 6 –
കർഷക കടാശ്വാസ കമ്മീഷൻ നിർദേശിച്ച വിഹിതം അടച്ചിട്ടും വയനാട്ടിലെ വിവിധ സഹകരണ ബാങ്കുകൾ ആധാരങ്ങൾ തിരികെ നൽകുന്നില്ലെന്ന് പരാതി. ജില്ലയിൽ ഭൂമി പണയപ്പെടുത്തി വായ്പയെടുത്ത 3,000ലധികം കർഷകരാണ് ഇതുമൂലം പ്രതിസന്ധിയിലായത്. എട്ടുവർഷം മുമ്പ് വിഹിതം അടച്ചവരും ഇക്കൂട്ടത്തിലുണ്ട്. സർക്കാർ വിഹിതമായി നിശ്ചയിച്ച തുക ലഭിച്ച ശേഷമേ ആധാരങ്ങൾ തിരികെ നൽകൂ എന്ന നിലപാടിലാണ് ബാങ്കുകൾ.
ആധാരങ്ങൾ തിരിച്ചുകിട്ടാത്തതിനാൽ ഭൂമി നിയമപരമായി കൈമാറാനോ വിവാഹം, ചികിത്സ തുടങ്ങിയ അടിയന്തര ആവശ്യങ്ങൾക്കായി വീണ്ടും പണയപ്പെടുത്തി വായ്പ എടുക്കാനോ കർഷകർക്ക് കഴിയുന്നില്ല. കാർഷിക പ്രതിസന്ധി മൂലം വായ്പകൾ കുടിശികയായവരാണ് കടാശ്വാസ കമ്മീഷനെ സമീപിച്ചത്. കുടിശികയുടെ 50 ശതമാനമോ രണ്ട് ലക്ഷം രൂപ വരെയോ ആണ് കമ്മീഷൻ ഇളവായി അനുവദിക്കുന്നത്. കർഷകൻ തന്റെ വിഹിതം അടച്ചാൽ ബാങ്കുകൾ ആധാരം തിരികെ നൽകണമെന്നാണ് വ്യവസ്ഥ. എന്നാൽ സർക്കാർ വിഹിതം കൂടി ലഭിച്ച ശേഷമേ രേഖകൾ നൽകൂവെന്നാണ് ബാങ്കുകളുടെ നിലപാട്.
ഇതിനിടെ ചില സഹകരണ ബാങ്കുകൾ വായ്പ കുടിശികയുടെ പേരിൽ റിക്കവറി നടപടികളും തുടരുകയാണ്. ഭൂമി അളന്നുതിരിക്കുന്നതും വീടുകളിൽ നിന്ന് ഒഴിപ്പിക്കുമെന്ന് ഭീഷണിപ്പെടുത്തുന്നതും പതിവാകുകയാണെന്ന് കർഷകർ ആരോപിക്കുന്നു. ഈ സാഹചര്യത്തിൽ റിക്കവറി നടപടികൾ നിർത്തിവയ്ക്കണമെന്നും വിഹിതം അടച്ച കർഷകർക്ക് ഉടൻ ആധാരം തിരികെ നൽകണമെന്നും ആവശ്യപ്പെട്ട് ഫാർമേഴ്സ് റിലീഫ് ഫോറവും ഹരിതസേനയും സംയുക്ത സമരത്തിന് ഒരുങ്ങുകയാണ്. ജൂൺ ഒമ്പതിന് കൽപ്പറ്റയിലെ കാർഷിക വികസന ബാങ്ക് ശാഖയ്ക്ക് മുന്നിൽ ധർണ നടത്തും.
