കണ്ണൂർ, 2026 ജൂൺ 6 –

ഉത്തരാധുനിക മലയാള കവിതാരംഗത്തെ ശ്രദ്ധേയ സാന്നിധ്യവും അധ്യാപകനും സാംസ്കാരിക പ്രവർത്തകനുമായ എ.സി. ശ്രീഹരി അന്തരിച്ചു. പയ്യന്നൂർ കോളേജിലെ ഇംഗ്ലീഷ് വിഭാഗം അധ്യാപകനായിരുന്ന അദ്ദേഹം വടക്കേ മലബാറിന്റെ സാംസ്കാരിക മുഖങ്ങളിലൊരാളായി അറിയപ്പെട്ടിരുന്നു. സാഹിത്യം, അക്കാദമിക് രംഗം, സാംസ്കാരിക പ്രവർത്തനം എന്നിവയിൽ ഒരുപോലെ സജീവമായിരുന്നു ശ്രീഹരി.

1969 നവംബർ 24ന് കണ്ണൂർ ജില്ലയിലെ പയ്യന്നൂരിനടുത്തുള്ള ആലപ്പടമ്പ് ഗ്രാമത്തിൽ എ.സി. ദാമോദരൻ നമ്പൂതിരിയുടെയും സാവിത്രി അന്തർജ്ജനത്തിന്റെയും മകനായാണ് ശ്രീഹരി ജനിച്ചത്. കുറുവേലി വിഷ്ണുശർമ്മ എ.എൽ.പി. സ്കൂൾ, മാത്തിൽ ഗവൺമെന്റ് ഹയർസെക്കൻഡറി സ്കൂൾ, നെഹ്റു ആർട്സ് ആൻഡ് സയൻസ് കോളേജ് കാഞ്ഞങ്ങാട് എന്നിവിടങ്ങളിലായിരുന്നു വിദ്യാഭ്യാസം. പയ്യന്നൂർ കോളേജിൽ നിന്ന് ഇംഗ്ലീഷിൽ ബിരുദവും ദേവഗിരി സെന്റ് ജോസഫ്സ് കോളേജിൽ നിന്ന് ബിരുദാനന്തര ബിരുദവും നേടി. മഹാത്മാഗാന്ധി സർവകലാശാലയിൽ നിന്ന് എം.ഫിലും കരസ്ഥമാക്കി. 2015ൽ കണ്ണൂർ സർവകലാശാലയിൽ നിന്ന് “മലയാള ജനപ്രിയ കലാസിനിമയിലെ ആണത്തനിർമ്മാണം” എന്ന വിഷയത്തിൽ ഗവേഷണം പൂർത്തിയാക്കി.

ഡി.സി. ബുക്സ് പ്രസിദ്ധീകരിച്ച “യുവകവിതക്കൂട്ടം”, സാഹിത്യ പ്രവർത്തക സഹകരണ സംഘം പ്രസിദ്ധീകരിച്ച “കവിതയുടെ നൂറ്റാണ്ട്” എന്നീ സമാഹാരങ്ങളിൽ അദ്ദേഹത്തിന്റെ കവിതകൾ ഉൾപ്പെട്ടിട്ടുണ്ട്. കേരളത്തിലെ സർവകലാശാലകളിൽ ശ്രീഹരിയുടെ കവിതകൾ പാഠപുസ്തകമായും പഠിപ്പിക്കുന്നുണ്ട്. “ആൻഡ്രോയ്ഡ് കുഞ്ഞപ്പൻ പതിപ്പ് 5.25” എന്ന ചിത്രത്തിലെ “ഓമൽ പൂവേ പോരൂ ആരും കാണാത് ഓൺലൈൻ ചാറ്റിൻ കാറ്റിൽ…” എന്ന ഗാനത്തിന്റെ രചയിതാവും ശ്രീഹരിയാണ്. എൻ.എൻ. കക്കാട് അവാർഡ്, വി.ടി. കുമാരൻ അവാർഡ്, വൈലോപ്പിള്ളി അവാർഡ് എന്നിവ നേടി സാഹിത്യരംഗത്ത് വ്യക്തിമുദ്ര പതിപ്പിച്ച വ്യക്തിയായിരുന്നു അദ്ദേഹം.