കോഴിക്കോട്, 2026 ജൂൺ 5 –
2018 ൽ കോഴിക്കോട് നടന്ന ദേശീയ സീനിയർ വോളിബോൾ ചാംപ്യൻഷിപ്പുമായി ബന്ധപ്പെട്ട് ഒരു കോടിയിലേറെ രൂപയുടെ സാമ്പത്തിക ക്രമക്കേട് നടന്നെന്ന കേസിൽ അഞ്ചുപേർക്കെതിരെ നടക്കാവ് പൊലീസ് കേസ് രജിസ്റ്റർ ചെയ്തു. സിപിഎം കോഴിക്കോട് ജില്ലാ സെക്രട്ടറി എം. മെഹബൂബ്, ചാംപ്യൻഷിപ്പിന്റെ ജനറൽ കൺവീനറായിരുന്ന നാലകത്ത് ബഷീർ, പെരിന്തൽമണ്ണ മുനിസിപ്പാലിറ്റിയിലെ മുസ്ലിം ലീഗ് കൗൺസിലർ സി. സത്യൻ, അഹമ്മദ് കുട്ടി എന്ന ബാപ്പു ഹാജി, കെ.കെ. മൊയ്തീൻ കോയ എന്നിവരാണ് പ്രതിപ്പട്ടികയിലുള്ളത്. സ്വത്ത് അപഹരണവും വിശ്വാസവഞ്ചനയും ഉൾപ്പെടെയുള്ള കുറ്റങ്ങളാണ് ചുമത്തിയിരിക്കുന്നത്.
2018 ഫെബ്രുവരിയിൽ കോഴിക്കോട് എരഞ്ഞിപ്പാലം ട്രേഡ് സെന്ററിൽ നടന്ന ദേശീയ സീനിയർ വോളിബോൾ ചാംപ്യൻഷിപ്പിനായി വിവിധ സ്രോതസുകളിൽ നിന്ന് 1.24 കോടിയിലേറെ രൂപ സമാഹരിച്ചെന്നാണ് അന്വേഷണത്തിൽ കണ്ടെത്തിയത്. ലഭിച്ച പണത്തിന്റെയും ചെലവഴിച്ച തുകയുടെയും കൃത്യമായ കണക്കുകൾ സൂക്ഷിച്ചില്ലെന്നും വ്യാജ വൗച്ചറുകൾ ഉപയോഗിച്ചെന്നും വിജിലൻസ് കണ്ടെത്തി. താമസം, ഭക്ഷണം, യാത്ര എന്നിവയ്ക്കായി കാണിച്ച ചെലവുകളിലും ഗുരുതര ക്രമക്കേടുകൾ കണ്ടെത്തിയതായാണ് അന്വേഷണ റിപ്പോർട്ട്.
മുൻ ദേശീയ വോളിബോൾ താരം ജിമ്മി ജോർജിന്റെ സഹോദരൻ സെബാസ്റ്റ്യൻ ജോർജ് നൽകിയ പരാതിയെ തുടർന്നാണ് അന്വേഷണം ആരംഭിച്ചത്. ആദ്യം ക്രൈംബ്രാഞ്ചും പിന്നീട് വിജിലൻസും അന്വേഷണം നടത്തി. വിജിലൻസ് റിപ്പോർട്ടിന്റെ അടിസ്ഥാനത്തിൽ കേസ് എടുക്കാൻ നിർദേശം ഉണ്ടായിരുന്നെങ്കിലും നടപടി വൈകിയിരുന്നു. തുടർന്ന് വീണ്ടും പരാതി നൽകിയതോടെയാണ് നടക്കാവ് പൊലീസ് കേസ് രജിസ്റ്റർ ചെയ്ത് തുടർനടപടികൾ ആരംഭിച്ചത്.
