‘ഓപ്പറേഷൻ തൂഫാൻ’ ലഹരിവേട്ട: 104 കേസുകൾ, 137 പേർ പിടിയിൽ

തിരുവനന്തപുരം, 2026 ജൂൺ 4 –

ചൊവ്വാഴ്ച ആരംഭിച്ച ‘ഓപ്പറേഷൻ തൂഫാൻ’ എന്ന പ്രത്യേക ലഹരിവേട്ടയിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നായി 104 കേസുകൾ രജിസ്റ്റർ ചെയ്യുകയും 137 പേരെ പിടികൂടുകയും ചെയ്തു. 37 കിലോഗ്രാം കഞ്ചാവും 500 ഗ്രാം എം.ഡി.എം.എയും പിടിച്ചെടുത്തു. പൊലീസ് ആസ്ഥാനത്ത് നടന്ന വാർത്താസമ്മേളനത്തിലാണ് ഈ വിവരങ്ങൾ പുറത്തുവന്നത്.

പൊലീസ് മേധാവി റവാഡ ചന്ദ്രശേഖറാണ് നടപടികളുടെ വിശദാംശങ്ങൾ അറിയിച്ചത്. കൊച്ചി, മലപ്പുറം, കോഴിക്കോട് എന്നിവിടങ്ങളിൽ നിന്ന് വാണിജ്യാടിസ്ഥാനത്തിൽ സൂക്ഷിച്ചിരുന്ന ലഹരിവസ്തുക്കൾ കണ്ടെത്തി. ഇടത്തരം അളവിൽ ലഹരിവസ്തുക്കൾ സൂക്ഷിച്ചതിന് എട്ട് കേസുകളും ചെറുകിട അളവിൽ സൂക്ഷിച്ചതിന് 93 കേസുകളും എടുത്തു. ലഹരിയുപയോഗത്തിന്റെ ദൂഷ്യഫലങ്ങൾ കുട്ടികൾക്ക് മനസിലാക്കി അവരെ അതിൽ നിന്ന് പിന്തിരിപ്പിക്കാനുള്ള നടപടികളും സ്വീകരിക്കുമെന്ന് പൊലീസ് അറിയിച്ചു.

കഴിഞ്ഞ രണ്ട് വർഷത്തിനിടെ രജിസ്റ്റർ ചെയ്ത അരലക്ഷത്തോളം കേസുകളുടെ അന്വേഷണത്തിൽ നിന്ന് ലഭിച്ച വിവരങ്ങളാണ് ഇപ്പോഴത്തെ ലഹരിവേട്ടയ്ക്ക് ഉപയോഗിക്കുന്നത്. ക്രമസമാധാന ചുമതലയുള്ള എ.ഡി.ജി.പി എച്ച്. വെങ്കടേശും ഓപ്പറേഷൻ തൂഫാന്റെ നോഡൽ ഓഫീസർ ഐ.ജി പുട്ട വിമലാദിത്യയും വാർത്താസമ്മേളനത്തിൽ പങ്കെടുത്തു.