ബസിനെ മറികടക്കുന്നതിനിടെ അപകടം; പ്ലസ് ടു വിദ്യാർഥി മരിച്ചു
കുമ്പളങ്ങി | മേയ് 29
കുമ്പളങ്ങിയിൽ ബസിനെ മറികടക്കാൻ ശ്രമിക്കുന്നതിനിടെ ബൈക്ക് ബസിനടിയിൽപ്പെട്ടുണ്ടായ അപകടത്തിൽ പ്ലസ് ടു വിദ്യാർഥി മരിച്ചു. എഴുപുന്ന പന്നപ്പിള്ളി ജോൺ ജേക്കബിന്റെ മകൻ ജോൺ ജോയൽ ആണ് മരിച്ചത്. സഹപാഠിയും സുഹൃത്തുമായ ആഷ്മെൻ ആശുപത്രിയിൽ ചികിത്സയിലാണ്.
ഇന്നലെ രാവിലെയാണ് അപകടം നടന്നത്. എറണാകുളത്തേക്ക് പോകുകയായിരുന്ന ബസിനെ മറികടക്കാൻ ശ്രമിക്കുന്നതിനിടെയാണ് കുമ്പളങ്ങി ബെവറേജസ് ഷോപ്പിന് സമീപത്ത് അപകടമുണ്ടായത്. ബൈക്കിന്റെ പിൻസീറ്റിലിരുന്ന ജോൺ ജോയൽ ബസിന്റെ അടിയിലേക്ക് വീഴുകയായിരുന്നു.
പരിക്കേറ്റ ഇരുവരെയും ഉടൻ കുമ്പളങ്ങി പ്രാഥമികാരോഗ്യ കേന്ദ്രത്തിൽ എത്തിച്ചെങ്കിലും ജോൺ ജോയലിന്റെ ജീവൻ രക്ഷിക്കാനായില്ല. അപകടത്തിൽ പരിക്കേറ്റ ആഷ്മെൻ ഇപ്പോഴും ചികിത്സയിൽ തുടരുകയാണ്.
പ്ലസ് ടു പരീക്ഷയുടെ ഇംപ്രൂവ്മെന്റ് അപേക്ഷ നൽകാനായി കുമ്പളങ്ങി ഒഎൽഎഫ് സ്കൂളിലേക്ക് പോകുന്നതിനിടെയായിരുന്നു അപകടം. പരീക്ഷാ കാര്യത്തിനായി ഒരുമിച്ച് യാത്രതിരിച്ച സുഹൃത്തുക്കൾക്കുണ്ടായ ദുരന്തം പ്രദേശത്ത് വലിയ ദുഃഖമായി മാറിയിരിക്കുകയാണ്.
പോസ്റ്റ്മോർട്ടത്തിനുശേഷം ജോൺ ജോയലിന്റെ സംസ്കാരം ഇന്ന് വൈകുന്നേരം എഴുപുന്ന അമലോത്ഭവ മാതാ പള്ളിയിൽ നടക്കും. അമ്മ: സിന്ധു ജോൺ. സഹോദരി: അന്ന.
