കുന്നംകുളം സിപിഐയിൽ കൂട്ടരാജി: ബ്രാഞ്ച് കമ്മിറ്റി സെക്രട്ടറിയുൾപ്പെടെ 11 പേർ പാർട്ടി വിട്ടു

എരുമപ്പെട്ടി | മേയ് 25

കുന്നംകുളം മണ്ഡലത്തിലെ സിപിഐ കടങ്ങോട് മിൽ ബ്രാഞ്ച് കമ്മിറ്റിയിൽ നിന്ന് സെക്രട്ടറിയുൾപ്പെടെ 11 പേർ കൂട്ടരാജി നൽകി. മണ്ഡലം കമ്മിറ്റി നേതൃത്വത്തിന്റെ തെറ്റായ നടപടികളിൽ പ്രതിഷേധിച്ചാണ് രാജിയെന്നാണ് നേതാക്കളുടെ വിശദീകരണം. സംഭവത്തോടെ പ്രദേശത്തെ സിപിഐയിൽ ആഭ്യന്തര ഭിന്നത കൂടുതൽ രൂക്ഷമായിരിക്കുകയാണ്.

സിപിഐ കടങ്ങോട് മിൽ ബ്രാഞ്ച് കമ്മിറ്റി സെക്രട്ടറി കൂടിയായ കെ.കെ. ശശി, അസിസ്റ്റന്റ് സെക്രട്ടറി കെ.ജി. സുധാകരൻ എന്നിവരടക്കമുള്ള ബ്രാഞ്ച് കമ്മിറ്റി അംഗങ്ങളാണ് പാർട്ടി ബന്ധം ഉപേക്ഷിച്ചത്. പി.എ. ശ്രീധരൻ, കെ.കെ. വേലായുധൻ, കെ.കെ. സുബീഷ്, ഒ.ആർ. സന്തോഷ്, പി.എ. പ്രകാശൻ, ഗിരിജ സുരേന്ദ്രൻ, ഗീത ശശി, ശോഭന വേലായുധൻ, ഒ.എസ്. സൂരജ് എന്നിവരും രാജിവച്ചവരിൽപ്പെടുന്നു.

പാർട്ടിയിലെ വനിതാ പ്രവർത്തകയ്ക്കെതിരെ അതിക്രമം നടത്തിയ മണ്ഡലം കമ്മിറ്റി അംഗത്തെയും സാമ്പത്തിക ക്രമക്കേട് നടത്തിയ മുൻ ലോക്കൽ കമ്മിറ്റി സെക്രട്ടറിയെയും മണ്ഡലം നേതൃത്വം സംരക്ഷിക്കുകയാണെന്നാണ് രാജിവച്ചവരുടെ ആരോപണം. വനിതാ നേതാവിനെതിരായ പരാതിയിൽ പൊലീസ് കേസ് എടുത്തിട്ടും ബന്ധപ്പെട്ട നേതാവിനെതിരെ സംഘടനാതല നടപടി ഉണ്ടായില്ലെന്ന വിമർശനവും ഉയരുന്നുണ്ട്.

ദിവസങ്ങൾക്ക് മുമ്പ് എരുമപ്പെട്ടി ചിറ്റണ്ട ബ്രാഞ്ചിലും സമാന രീതിയിൽ കൂട്ടരാജി നടന്നിരുന്നു. ഇതോടെ കുന്നംകുളം മണ്ഡലത്തിലെ സിപിഐയിൽ വലിയ സംഘടനാപ്രതിസന്ധിയാണെന്ന വിലയിരുത്തലും ശക്തമാണ്.

വരും ദിവസങ്ങളിൽ കൂടുതൽ നേതാക്കളും പ്രവർത്തകരും രാജിവയ്ക്കാൻ സാധ്യതയുണ്ടെന്ന സൂചനകളും പുറത്തുവരുന്നുണ്ട്. ആരോപണങ്ങളിൽ പാർട്ടി നേതൃത്വം എന്ത് നിലപാട് സ്വീകരിക്കുമെന്നതാണ് ഇനി ശ്രദ്ധേയമാകുന്നത്.