“ഭഗവന്ത് മാൻ ഐഎസ്ഐ ഏജൻ്റ്”; പഞ്ചാബ് മുഖ്യമന്ത്രിക്കെതിരെ രൂക്ഷ ആരോപണവുമായി കേന്ദ്രമന്ത്രി രവ്നീത് ബിട്ടു

ചണ്ഡീഗഡ്, മേയ് 20: പഞ്ചാബ് മുഖ്യമന്ത്രി ഭഗവന്ത് മാൻ രാജ്യത്തിൻ്റെ പ്രവർത്തനങ്ങൾക്ക് തടസം സൃഷ്ടിക്കുകയാണെന്നും അദ്ദേഹം ഐഎസ്ഐ ഏജൻ്റിനെപ്പോലെയാണ് പ്രവർത്തിക്കുന്നതെന്നും കേന്ദ്ര റെയിൽവേ സഹമന്ത്രി രവ്നീത് സിങ് ബിട്ടു ആരോപിച്ചു. പ്രധാനമന്ത്രി നരേന്ദ്ര മോദിയുടെ വിദേശ സന്ദർശനങ്ങളെ വിമർശിച്ച ഭഗവന്ത് മാൻ്റെ പരാമർശങ്ങൾക്കു പിന്നാലെയാണ് ബിട്ടുവിൻ്റെ കടുത്ത പ്രതികരണം.

വേദിയിൽ നിന്നും കടുത്ത വിമർശനം

അംബാല – ചണ്ഡീഗഡ് റെയിൽപാതയ്ക്ക് സമീപം സിറക്പൂരിൽ റോഡ് അണ്ടർ ബ്രിഡ്ജിൻ്റെ ശിലാസ്ഥാപന ചടങ്ങിനിടെയായിരുന്നു ബിട്ടു മാധ്യമങ്ങളോട് സംസാരിച്ചത്. ഭഗവന്ത് മാൻ്റെ പ്രവർത്തനങ്ങൾ രാജ്യസുരക്ഷയെ പോലും ബാധിക്കാമെന്ന് അദ്ദേഹം ആരോപിച്ചു.

“നിങ്ങൾ പ്രധാനമന്ത്രിയുമായി നിങ്ങളെ താരതമ്യം ചെയ്യുമോ? രാജ്യത്തിൻ്റെ പ്രധാനമന്ത്രിക്ക് ലോക രാജ്യങ്ങളിലേക്ക് പോകേണ്ടി വരും. എണ്ണയും വാതകവുമായി ബന്ധപ്പെട്ട പ്രശ്നങ്ങൾ പരിഹരിക്കാനാണ് ആ സന്ദർശനങ്ങൾ,” എന്നാണ് ബിട്ടു പറഞ്ഞത്.

“രാജ്യത്തെ അപകടത്തിലാക്കാൻ ശ്രമിക്കുന്നു”

ഭഗവന്ത് മാൻ ഐഎസ്ഐയുടെ നിർദേശപ്രകാരമാണ് പ്രവർത്തിക്കുന്നതെന്ന ഗുരുതര ആരോപണവും ബിട്ടു ഉന്നയിച്ചു. പ്രധാനമന്ത്രിയുടെ പ്രവർത്തനങ്ങളിൽ തടസം സൃഷ്ടിക്കാനാണ് ശ്രമമെന്നും അദ്ദേഹം പറഞ്ഞു. ജനങ്ങൾ മുഖ്യമന്ത്രിയുടെ പ്രവർത്തനങ്ങൾ ശ്രദ്ധിക്കണമെന്നും ബിട്ടു ആവശ്യപ്പെട്ടു.

മോദിയുടെ വിദേശയാത്രകളെ മാൻ പരിഹസിച്ചിരുന്നു

പ്രധാനമന്ത്രി നരേന്ദ്ര മോദി ,ജനങ്ങളോട്  വിദേശയാത്രകൾ ഒഴിവാക്കണമെന്ന്  പറയുമ്പോൾ, സ്വയം തുടർച്ചയായി വിദേശ സന്ദർശനം നടത്തുകയാണെന്നായിരുന്നു ഭഗവന്ത് മാൻ്റെ വിമർശനം. “ആദ്യം പ്രധാനമന്ത്രി സ്വന്തം വിദേശയാത്ര നിർത്തണം,” എന്നും മാൻ പറഞ്ഞിരുന്നു.

ഇതിന് മറുപടിയായാണ് ബിട്ടു പ്രധാനമന്ത്രിയുടെ വിദേശ സന്ദർശനങ്ങളെ ന്യായീകരിച്ചത്. യു.എ.ഇ ഉൾപ്പെടെയുള്ള രാജ്യങ്ങളിലേക്കുള്ള സന്ദർശനങ്ങൾ രാജ്യത്തിൻ്റെ ഊർജസുരക്ഷക്കും എണ്ണവിതരണ പ്രശ്നങ്ങൾ പരിഹരിക്കാനുമാണെന്ന് അദ്ദേഹം പറഞ്ഞു.

ഇന്ധനവില വർധനയിലും കേന്ദ്രത്തിനെതിരെ മാൻ

ചൊവ്വാഴ്ചയും കേന്ദ്രസർക്കാരിനെതിരെ ഭഗവന്ത് മാൻ രംഗത്തെത്തിയിരുന്നു. പശ്ചിമേഷ്യയിലെ സംഘർഷത്തെ ചൂണ്ടിക്കാട്ടി സ്വന്തം സാമ്പത്തികവും വിദേശനയപരവുമായ പരാജയങ്ങൾ മറച്ചുവയ്ക്കാനാണ് കേന്ദ്രം ശ്രമിക്കുന്നതെന്ന് അദ്ദേഹം ആരോപിച്ചു.

കോൺഗ്രസും രംഗത്ത്

പഞ്ചാബ് കോൺഗ്രസ് അധ്യക്ഷൻ അമരീന്ദർ സിങ് രാജ വാറിങും വിഷയത്തിൽ പ്രതികരിച്ചു. ഭഗവന്ത് മാൻ ശരിക്കും ഐഎസ്ഐ ഏജൻ്റാണെങ്കിൽ കേന്ദ്ര ആഭ്യന്തരമന്ത്രി അന്വേഷണം പ്രഖ്യാപിക്കാത്തത് എന്തുകൊണ്ടാണെന്ന് അദ്ദേഹം ചോദിച്ചു.

ബിജെപിയും ആം ആദ്മി പാർട്ടിയും തമ്മിൽ രഹസ്യ ധാരണയുണ്ടെന്നും പരസ്പരം ആരോപണം ഉന്നയിച്ച് ജനശ്രദ്ധ തിരിക്കാനാണ് ശ്രമമെന്നും വാറിങ് ആരോപിച്ചു.

“ഫ്രണ്ട്ലി ഫയർ” രാഷ്ട്രീയമെന്ന് ആരോപണം

മുമ്പ് പഞ്ചാബിലുണ്ടായ ബോംബ് സ്ഫോടനങ്ങളിൽ ബിജെപിക്ക് പങ്കുണ്ടെന്ന് ഭഗവന്ത് മാൻ ആരോപിച്ചിരുന്നുവെന്നും എന്നാൽ ഒരു നടപടിയും ഉണ്ടായില്ലെന്നും വാറിങ് ചൂണ്ടിക്കാട്ടി. ഇപ്പോൾ ബിട്ടു മുഖ്യമന്ത്രിയെ ഐഎസ്ഐ ഏജൻ്റെന്ന് വിളിക്കുന്നതും അതേ രീതിയിലുള്ള രാഷ്ട്രീയ നാടകമാണെന്നും അദ്ദേഹം വിമർശിച്ചു.

റെയിൽവേ പദ്ധതിയും പ്രഖ്യാപനം

അതേസമയം സിറക്പൂരിലെ ബൽടാന ലെവൽ ക്രോസിംഗിന് സമീപം 12.80 കോടി രൂപ ചെലവിൽ നിർമ്മിക്കുന്ന റോഡ് അണ്ടർ ബ്രിഡ്ജ് പദ്ധതിയെക്കുറിച്ചും ബിട്ടു വിശദീകരിച്ചു. ഇന്ത്യൻ റെയിൽവെയും ചണ്ഡീഗഡ് ഭരണകൂടവും 50:50 അനുപാതത്തിൽ ചെലവ് വഹിച്ചാണ് പദ്ധതി നടപ്പാക്കുന്നത്.

ദിവസേന ഒമ്പത് ലക്ഷത്തിലധികം വാഹനങ്ങൾ കടന്നുപോകുന്ന മേഖലയായതിനാൽ പദ്ധതി പൂർത്തിയായാൽ ഗതാഗതക്കുരുക്കിന് വലിയ ആശ്വാസമാകുമെന്നാണ് പ്രതീക്ഷ.