മണിപ്പൂരിൽ നാഗ വനിതകളുടെ വൻ പ്രതിഷേധം

“ആറ് നാഗക്കാരെ ഉടൻ മോചിപ്പിക്കണം”; കുക്കി സംഘടനകളുമായുള്ള കരാർ റദ്ദാക്കണമെന്നും ആവശ്യം

ഗുവാഹത്തി, മേയ് 20: മണിപ്പൂരിൽ കുക്കി സായുധസംഘങ്ങൾ തട്ടിക്കൊണ്ടുപോയതായി ആരോപിക്കുന്ന ആറു നാഗക്കാരെ ഉടൻ മോചിപ്പിക്കണമെന്നാവശ്യപ്പെട്ട് നാഗ വനിതകളുടെ വൻ പ്രതിഷേധം നടന്നു. കേന്ദ്രസർക്കാർ കുക്കി വിമതസംഘങ്ങളുമായി ഒപ്പുവെച്ച സസ്പെൻഷൻ ഓഫ് ഓപ്പറേഷൻസ് കരാർ റദ്ദാക്കണമെന്നും പ്രതിഷേധക്കാർ ആവശ്യപ്പെട്ടു.

നിരവധി ജില്ലകളിൽ പ്രതിഷേധം

നാഗ വിമൻസ് യൂണിയൻ്റെ നേതൃത്വത്തിലായിരുന്നു പ്രതിഷേധം. നാഗകൾ കൂടുതലായി താമസിക്കുന്ന സെനാപതി, ഉക്രുൾ, ചന്ദേൽ, താമെംഗ്ലോങ്, കാംജോങ്, നോനേ ജില്ലകളിലായിരുന്നു പ്രതി,ഷേധം നടന്നത്. പ്രതിഷേധത്തിനിടെ പ്രധാനമന്ത്രി നരേന്ദ്ര മോദിക്ക് സംഘടന നിവേദനവും നൽകി.

 സംഘടന പറയുന്നത്

രണ്ട് വ്യത്യസ്ത സംഭവങ്ങളിലായി കുക്കി സായുധസംഘങ്ങൾ 20 നാഗ സാധാരണക്കാരെ തട്ടിക്കൊണ്ടുപോയെന്നാണ് നാഗ സംഘടനകളുടെ ആരോപണം. പിന്നാലെ ബന്ദി കൈമാറ്റത്തിൻ്റെ ഭാഗമായി 14 പേരെ വിട്ടയച്ചുവെന്നും ഇപ്പോഴും ആറുപേർ കുക്കി സംഘങ്ങളുടെ കസ്റ്റഡിയിലാണെന്നും സംഘടന പറയുന്നു.

റെവ് ഡോ. മനു തിയുമൈ, പാസ്റ്റർ ഹെൻപിബൗ, ഫെൻറോങ്വിബൗ, ഫെൻറിങ്ലുങ്ബൗ, ദിലീപ്, കാലിവാങ്ബൗ എന്നിവരെയാണ് ഇപ്പോഴും കാണാതായവരായി സംഘടന തിരിച്ചറിഞ്ഞിരിക്കുന്നത്.

സ്ത്രീകളും കുട്ടികളും ഉൾപ്പെട്ട തട്ടിക്കൊണ്ടുപോക്കെന്ന് ആരോപണം

കുക്കി ഗ്രാമമായ ലെയ്ലോൺ വൈഫെയിൽ വെച്ചാണ് സ്ത്രീകളും കുട്ടിയും പാസ്റ്റർമാരും ഉൾപ്പെടെയുള്ള നാഗക്കാരെ പകൽ സമയത്ത് തന്നെ തട്ടിക്കൊണ്ടുപോയതെന്നാണ് നാഗ വിമൻസ് യൂണിയൻ്റെ ആരോപണം. സംഭവത്തിൽ പങ്കെടുത്തവരെ ഉടൻ അറസ്റ്റ് ചെയ്ത് നിയമനടപടി സ്വീകരിക്കണമെന്നും സംഘടന ആവശ്യപ്പെട്ടു.

കൊല്ലപ്പെട്ട നാഗ യുവാവിന് നീതി വേണം

നോനേ ജില്ലയിൽ കൊല്ലപ്പെട്ട വില്സൺ താംഗ എന്ന നാഗ യുവാവിന് നീതി ലഭ്യമാക്കണമെന്നും, മോചിതരായ സ്ത്രീകൾക്ക് സുരക്ഷയും പുനരധിവാസവും ഉറപ്പാക്കണമെന്നും സംഘടന ആവശ്യപ്പെട്ടു.

കുക്കി സംഘടനകളുമായുള്ള കരാർ റദ്ദാക്കണമെന്ന് ആവശ്യം

കേന്ദ്രസർക്കാർ കുക്കി വിമതസംഘങ്ങളുമായി ഒപ്പുവെച്ച സസ്പെൻഷൻ ഓഫ് ഓപ്പറേഷൻസ് കരാർ റദ്ദാക്കണമെന്നും പ്രതിഷേധക്കാർ ആവശ്യപ്പെട്ടു. സംസ്ഥാന സുരക്ഷാസേനയെ ശക്തിപ്പെടുത്തി നാഗ മേഖലകളിൽ സമാധാനവും സുരക്ഷയും പുനഃസ്ഥാപിക്കണമെന്നും ആവശ്യപ്പെട്ടു.

പിന്നാമ്പുറം ഇങ്ങനെ

മേയ് 13ന് കുക്കി ഭൂരിപക്ഷ മേഖലയായ കാങ്പോക്പിയിൽ മൂന്ന് ആദിവാസി സഭാ നേതാക്കളെ ആയുധധാരികൾ കൊലപ്പെടുത്തിയിരുന്നു. അതേ ദിവസം നോനേയിൽ ഒരു നാഗക്കാരനും കൊല്ലപ്പെട്ടു. പിന്നാലെ ഇരു വിഭാഗങ്ങളിലുമായി 38ലേറെ പേരെ വിവിധ സംഘങ്ങൾ തട്ടിക്കൊണ്ടുപോയെന്നാണ് റിപ്പോർട്ട്.

മേയ് 15ന് നാഗ സംഘടനകൾ 14 കുക്കി സാധാരണക്കാരെ വിട്ടയച്ചു. അതിന് പിന്നാലെ കുക്കി വിഭാഗവും 14 നാഗക്കാരെ മോചിപ്പിച്ചു. എന്നാൽ ഇനിയും ചിലർ കാണാതെയാണെന്നാണ് ഇരു വിഭാഗങ്ങളും പറയുന്നത്.

സുരക്ഷാസേനയുടെ തിരച്ചിൽ തുടരുന്നു

കാണാതായവരെ കണ്ടെത്താൻ സുരക്ഷാസേന തിരച്ചിലും രക്ഷാപ്രവർത്തനവും തുടരുകയാണെന്ന് ഔദ്യോഗിക വൃത്തങ്ങൾ അറിയിച്ചു.

മുഖ്യമന്ത്രിയുമായി കൂടിക്കാഴ്ച

ഇതിനിടെ ഉക്രുൾ ജില്ലയിലെ സിനകൈതെയ് ഗ്രാമത്തിലെ താങ്ഖുൽ നാഗ വിഭാഗം നേതാക്കൾ മണിപ്പൂർ മുഖ്യമന്ത്രി യൂംനം ഖേംചന്ദ് സിങ്ങിനെ ഇംഫാലിൽ കണ്ടു. ഗ്രാമത്തിൽ ഇന്ത്യ റിസർവ് ബറ്റാലിയൻ സേനയെ വിന്യസിക്കണമെന്ന് അവർ ആവശ്യപ്പെട്ടു. കഴിഞ്ഞ കുറച്ച് ദിവസങ്ങളായി ആയുധധാരികളുടെ ആക്രമണം കാരണം ഗ്രാമവാസികൾ ഭീതിയിലാണെന്നും അവർ പറഞ്ഞു.