വയനാട്: മുണ്ടക്കൈ – ചൂരല്മല ദുരിത ബാധിതർക്ക് കോൺഗ്രസ് വാഗ്ദാനം ചെയ്ത വീടുകൾക്ക് തറക്കല്ലിട്ടു. ലോക്സഭാ പ്രതിപക്ഷ നേതാവ് രാഹുല് ഗാന്ധി, വയനാട് എംപി പ്രിയങ്ക ഗാന്ധി എന്നിവര് ചേര്ന്നാണ് പദ്ധതിയുടെ തറക്കല്ലിടല് ചടങ്ങ് നിര്വഹിച്ചത്. ആറ് മാസത്തിനുള്ളില് 100 വീടുകള് നിര്മിച്ചു നല്കാനാണ് പദ്ധതി.
ദുരന്തത്തിനിരയായവർക്കുളള ധനസഹായം ചടങ്ങില് കൈമാറി
ഉരുള്പ്പൊട്ടല് ദുരന്തത്തില് നാശനഷ്ടങ്ങള് സംഭവിച്ചവര്ക്കുള്ള ധന സഹായവും ചടങ്ങില് കൈമാറി. 40 പേര്ക്ക് അഞ്ച് ലക്ഷം രൂപ വീതമാണ് കൈമാറിയത്. ദുരന്തത്തെ വയനാട്ടിലെ ജനങ്ങൾ ധീരതയോടെ നേരിട്ടു. ജാതി മത വ്യത്യാസമില്ലാതെ ജനങ്ങൾ ഒന്നിച്ചുനിന്നു. സമാനതകളില്ലാത്ത ധീരതയാണ് വയനാടൻ ജനത കാണിച്ചത്. പദ്ധതിക്കായി ഭൂമി കണ്ടെത്തുന്നതിൽ നിരവധി പ്രതിസന്ധികൾ ഉണ്ടായെങ്കിലും വയനാട്ടിലെ ജനങ്ങൾക്കൊപ്പം കോൺഗ്രസ് എന്നും ഉണ്ടാകുമെന്ന് രാഹുൽ ഗാന്ധി ഉറപ്പുനൽകി.
