ടെഹ്റാന്: ഇറാന്റെ പരമോന്നത നേതാവ് ആയത്തുള്ള അലി ഖമീനി ബങ്കറില് അഭയം തേടിയിരിക്കുന്നതായി റിപ്പോര്ട്ടുകള്. ഇസ്രയേലുമായുള്ള സംഘര്ഷം രൂക്ഷമായി തുടരുന്നതിനിടെ ഉണ്ടായിട്ടുളള വധഭീഷണികളെ തുടര്ന്നാണ് ഖമീനി ബങ്കറില് അഭയം തേടിയത്. ഇസ്രയേല് വ്യോമാക്രമണങ്ങളില് കൊല്ലപ്പെട്ട ഉന്നതസൈനിക ഉദ്യോഗസ്ഥര്ക്ക് പകരം പുതിയ നിയമനങ്ങള്ക്കുള്ള നടപടികള് ഖമീനി ആരംഭിച്ചതായി ഇറാനിലെ ഉന്നത ഉദ്യോഗസ്ഥരെ ഉദ്ധരിച്ച് ദ ന്യൂയോര്ക്ക് ടൈംസ് റിപ്പോര്ട്ട് ചെയ്തു. കൂടാതെ തന്റെ പിന്ഗാമിയായി മൂന്ന് പേരെ ഖമീനി നാമനിര്ദേശം ചെയ്തതായും റിപ്പോര്ട്ടുകളുണ്ട്.
പുതിയ നേതാവിനെ തിരഞ്ഞെടുക്കാനുള്ള നടപടി പൂര്ത്തിയാക്കാൻ ഖമീനി നിര്ദേശം നല്കിയതായി റിപ്പോര്ട്ട്.
ഇസ്രയേല് അല്ലെങ്കില് യുഎസ് തന്നെ വധിക്കാന് സാധ്യതയുണ്ടെന്നും അത്തരത്തില് സംഭവിക്കുകയാണെങ്കില് താന് രക്തസാക്ഷിത്വം വരിക്കുന്നതായി എണ്പത്തിയാറുകാരനായ ഖമീനി കരുതുന്നതായും ഇറാന് ഉദ്യോഗസ്ഥരെ ഉദ്ധരിച്ച് ദ ന്യൂയോര്ക്ക് ടൈംസിന്റെ റിപ്പോര്ട്ടില് പറയുന്നു. ഇറാന്റെ പരമോന്നതനേതാവിനെ തിരഞ്ഞെടുക്കുന്ന അസംബ്ലി ഓഫ് എക്സ്പെര്ട്ട്സിന് എത്രയും വേഗം പുതിയ നേതാവിനെ തിരഞ്ഞെടുക്കാനുള്ള നടപടി പൂര്ത്തിയാക്കാനുള്ള നിര്ദേശം ഖമീനി നല്കിയതായാണ് റിപ്പോര്ട്ട്.ഖമീനിയുടെ രണ്ടാമത്തെ മകന് മൊജ്താബ ഖമീനി പരമോന്നത നേതൃസ്ഥാനത്തേക്ക് എത്തിയേക്കാമെന്ന് നേരത്തെ റിപ്പോര്ട്ടുകൾ പുറത്തുവന്നിരുന്നു. എന്നാൽ അതിനെ തള്ളിയാണ് പുതിയ റിപ്പോര്ട്ടുകള്. ഖമീനി തിരഞ്ഞെടുത്ത വ്യക്തികളുടെ പട്ടികയില് മൊജ്താബയുടെ പേര് ഉള്പ്പെടുന്നില്ലെന്നാണ് സൂചന.
.
