അബൂദബി|. എ ഐ എത്തിക്സ് ഓഡിറ്റർ, മെറ്റാവേഴ്സ് എൻജിനീയർ, ക്വാണ്ടം കമ്പ്യൂട്ടിംഗ് സോഫ്റ്റ് വെയർ ഡെവലപ്പർ, ഡിജിറ്റൽ അഡിക്ഷൻ തെറാപ്പിസ്റ്റ്, ലേണിംഗ് എൻജിനീയർ എന്നിങ്ങനെ അഞ്ച് നൂതന തൊഴിലുകൾ 2030-ഓടെ രൂപപ്പെടുമെന്ന് കൃത്രിമ ബുദ്ധി പ്രവചനം. സാങ്കേതിക വിദ്യയുടെ അതിവേഗ പുരോഗതിയും സമൂഹത്തിന്റെ മാറുന്ന ആവശ്യങ്ങളും പ്രതിഫലിപ്പിക്കുന്നതാണ് ഈ തൊഴിലുകൾ.
എ ഐ എത്തിക്സ് ഓഡിറ്റർ : എ ഐ സംവിധാന ങ്ങളുടെ ധാർമികത, നീതി, സുതാര്യത എന്നിവ ഉറപ്പാക്കുന്ന വിദഗ്ധരാണ് എ ഐ എത്തിക്സ് ഓഡിറ്റർ. എ ഐയുടെ ദുരുപയോഗം തടയാനും സാമൂഹിക ഉത്തരവാദിത്തം ഉറപ്പാക്കാനും ഇവർ പ്രവർത്തിക്കും.
മെറ്റാവേഴ്സ് എൻജിനീയർ : വെർച്വൽ , ഓഗ്മെന്റഡ് റിയാലിറ്റി പ്ലാറ്റ്ഫോമുകൾ വികസിപ്പിക്കുന്നവരാണ് മെറ്റാവേഴ്സ് എൻജിനീയർമാർ. വിദ്യാഭ്യാസം, ഗെയിമിംഗ്, വ്യവസായം എന്നിവയിൽ മെറ്റാവേഴ്സിന്റെ വർധിച്ച ഉപയോഗമാണ് ഇവരെ അനിവാര്യമാക്കുന്നത്.
ക്വാണ്ടം കമ്പ്യൂട്ടിംഗ് സോഫ്റ്റ്വെയർ ഡെവലപ്പർ: നവീന സോഫ്റ്റ്വെയർ രൂപകൽപ്പന ചെയ്യുന്നവരാണ് ക്വാണ്ടം കമ്പ്യൂട്ടിംഗ് സോഫ്റ്റ്വെയർ ഡെവലപ്പർമാർ .ഡാറ്റ പ്രോസസിംഗിന്റെ വേഗതയും കാര്യക്ഷമതയും വർധിപ്പിക്കാൻ ഇവർക്ക് കഴിയും.
ഡിജിറ്റൽ അഡിക്ഷൻ.തെറാപ്പിസ്റ്റ് : സോഷ്യൽ മീഡിയ, ഗെയിമിംഗ്, ഇന്റർനെറ്റ് എന്നിവയോടുള്ള അമിതാസക്തി ചികിത്സിക്കുന്ന മനഃശാസ്ത്ര വിദഗ്ധർമാരാണ് ഡിജിറ്റൽ അഡിക്ഷൻ.തെറാപ്പിസ്റ്റ്. ഡിജിറ്റൽ ഉപകരണങ്ങളുടെ വർധിച്ച ഉപയോഗം ഇത്തരം തെറാപ്പിസ്റ്റുകളുടെ ആവശ്യകത വർധിപ്പിക്കുന്നു.
ലേണിംഗ് എൻജിനീയർ: വ്യക്തിഗത പഠന അനുഭവങ്ങൾ രൂപകൽപ്പന ചെയ്യുന്നവരാണ് ലേണിംഗ് എൻജിനീയർ. എ ഐ, ഡാറ്റ അനലിറ്റിക്സ് എന്നിവ ഉപയോഗിച്ച് വിദ്യാഭ്യാസത്തിന്റെ കാര്യക്ഷമത വർധിപ്പിക്കാൻ ഇവർ സഹായിക്കും. 2030-ഓടെ തൊഴിൽ വിപണിയിൽ വരുന്ന മാറ്റങ്ങൾക്ക് അനുസൃതമായി, വിദ്യാർഥികളെ ഭാവി ജോലികൾക്ക് സജ്ജമാക്കാൻ പദ്ധതി തയ്യാറാക്കുകയാണ് യു എ ഇയിലെ സർവകലാശാലകൾ..
എ ഐ, ഡാറ്റ വിശകലനം, സുസ്ഥിരത, സംരംഭകത്വം എന്നിവയിൽ ശ്രദ്ധ കേന്ദ്രീകരിച്ച്, വിമർശനാത്മക ചിന്തയും പ്രായോഗിക വൈദഗ്ധ്യവും വളർത്തിയെടുക്കുന്നതിന് ഈ സ്ഥാപനങ്ങൾ പ്രവർത്തിക്കുന്നു. എ ഐ, ബിഗ് ഡാറ്റ, സൈബർ സുരക്ഷ, റോബോട്ടിക്സ്, ബഹിരാകാശ ശാസ്ത്രം, പുനരുപയോഗ ഊർജം തുടങ്ങിയ മേഖലകളിൽ കോഴ്സുകൾ അവതരിപ്പിക്കുകയും വിദ്യാർഥികളിൽ വിമർശനാത്മക ചിന്ത, പ്രശ്നപരിഹാരം, ഇന്റർ ഡിസിപ്ലിനറി ലേണിംഗ്, പ്രായോഗിക പരിശീലനം എന്നിവ വളർത്തി ഭാവി ജോലികൾക്ക് സജ്ജമാക്കേണ്ടതിന്റെ ആവശ്യകതയും അവ തിരിച്ചറിയുന്നുണ്ട്.
