തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ഒറ്റപ്പെട്ടയിടങ്ങളില് ഇടിമിന്നലോടുകൂടിയ മഴയ്ക്കും കാറ്റിനും സാധ്യതയുള്ളതായി കേന്ദ്രകാലാവസ്ഥാവകുപ്പ്. 04/05/23 വ്യാഴാഴ്ച ഒറ്റപ്പെട്ടയിടങ്ങളില് ശക്തമായ മഴയ്ക്ക് സാധ്യതയുണ്ട്. ശനിയാഴ്ചയോടെ തെക്ക് കിഴക്കന് ബംഗാള് ഉള്ക്കടലില് ചുഴലിക്കാറ്റ് രൂപപ്പെടാന് സാധ്യതയുണ്ട്. ശനിയാഴ്ച രൂപപ്പെടുന്ന ചക്രവാതച്ചുഴി എട്ടിന് അതിതീവ്ര ന്യൂനമര്ദമായി മാറിയേക്കും. ഇത് പിന്നീട് ചുഴലിക്കാറ്റായി മാറാന് സാധ്യതയുണ്ട്. എന്നാല്, ചുഴലിക്കാറ്റിന്റെ സ്വാധീനപ്രദേശം, ശക്തി എന്നിവ സംബന്ധിച്ച് വ്യക്തതയായിട്ടില്ല. അതിതീവ്ര ന്യൂനമര്ദമുണ്ടായാല് മഴ സാഹചര്യം കനക്കാനാണു സാധ്യത. കേരളത്തിലടക്കം ഇതിന്റെ സ്വാധീനം ഉണ്ടായേക്കും.
കേരള – ലക്ഷദ്വീപ് പ്രദേശങ്ങളില് മണിക്കൂറില് 40 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗത്തില് ശക്തമായ കാറ്റിനും മോശം കാലാവസ്ഥക്കും സാധ്യതയുണ്ടെന്നും മത്സ്യത്തൊഴിലാളികള് കടലില് പോകരുതെന്നും കേന്ദ്ര കാലാവസ്ഥ വകുപ്പ് അറിയിച്ചു. ആറിന് തെക്ക്-കിഴക്കന് ബംഗാള് ഉള്ക്കടലിന്റെ തെക്കന് ഭാഗങ്ങളില് മണിക്കൂറില് 40 മുതല് 45 കിലോമീറ്റര് വരെ വേഗത്തിലും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗത്തില് ശക്തമായ കാറ്റിനും മോശം കാലാവസ്ഥക്കും സാധ്യത ഉണ്ട്. ഏഴിന് തെക്ക്-കിഴക്കന് ബംഗാള് ഉള്കടല് അതിനോട് ചേര്ന്നുള്ള തെക്ക്-പടിഞ്ഞാറന് ബംഗാള് ഉള്കടല് എന്നിവിടങ്ങളില് മണിക്കൂറില് 40 മുതല് 45 കിലോമീറ്റര് വരെ വേഗത്തിലും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗത്തില് ശക്തമായ കാറ്റിനും മോശം കാലാവസ്ഥക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
