കോട്ടയം: കടുത്തുരുത്തി ബ്ലോക്ക് പഞ്ചായത്തിലെ ഭിന്നശേഷി വിഭാഗക്കാർക്കുള്ള സഹായ ഉപകരണ വിതരണോദ്ഘാടനം തോമസ് ചാഴികാടൻ എം.പി. നിർവഹിച്ചു. കടുത്തുരുത്തി മിനി സിവിൽ സ്റ്റേഷൻ ഹാളിൽ നടന്ന ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് പി.വി. സുനിൽ അധ്യക്ഷത വഹിച്ചു. അഡ്വ. മോൻസ് ജോസഫ് എം.എൽ.എ. മുഖ്യപ്രഭാഷണം നടത്തി. ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി മുഖ്യാതിഥിയായി.
കേന്ദ്രസർക്കാരിന്റെ സാമൂഹിക നീതി വകുപ്പിന്റെ പാർലമെന്ററി സ്റ്റാൻഡിങ് കമ്മിറ്റിയംഗം എന്ന നിലയിൽ തോമസ് ചാഴികാടൻ എം.പി. നിർദ്ദേശിച്ച പ്രകാരം കോട്ടയം പാർലമെന്റ് മണ്ഡലത്തിലെ മുഴുവൻ ഭിന്നശേഷിക്കാർക്കും കേന്ദ്ര സർക്കാരിന്റെ എ.ഡി.ഐ.പി. പദ്ധതിയിൽ ഉൾപ്പെടുത്തിയാണ് സഹായ ഉപകരണങ്ങൾ വിതരണം ചെയ്തത്. കേന്ദ്ര സർക്കാർ സ്ഥാപനമായ അലിംകോയാണ് ഉപകരണങ്ങൾ ലഭ്യമാക്കിയത്.
കടുത്തുരുത്തി ബ്ലോക്കിലെ തിരഞ്ഞെടുത്ത 178 പേർക്കാണ് വീൽചെയർ, സി.പി. വീൽ ചെയർ, ട്രൈ സൈക്കിൾ, ബ്രെയ്‌ലി കെയിൻ, എൽബോ ക്രച്ചസ്സ്, എം.എസ്.ഐ.ഇ.ഡി. കിറ്റ്, വാക്കർ തുടങ്ങിയ സഹായ ഉപകരണങ്ങൾ വിതരണം ചെയ്തത്. കേൾവി തകരാർ ഉള്ളവർക്കായുള്ള ശ്രവണ സഹായി എത്രയും വേഗം ലഭ്യമാക്കുമെന്നും എം.പി. പറഞ്ഞു.
