തിരുവനന്തപുരം: ജൂണ് 14, 15 ശക്തമായ മഴയ്ക്കു സാധ്യതയുള്ളതിനാല് കേന്ദ്ര കാലാവസ്ഥാ വകുപ്പ് തിരുവനന്തപുരം ജില്ലയില് യെല്ലോ അലേര്ട്ട് പ്രഖ്യാപിച്ചു. 64.5 മുതല് 115 മില്ലി മീറ്റര് മഴ പെയ്യാനാണു സാധ്യത. ഇതു മുന്നിര്ത്തി എല്ലാവരും ജാഗ്രത പാലിക്കണമെന്നു ജില്ലാ കളക്ടര് ഡോ. നവ്ജ്യോത് ഖോസ അറിയിച്ചു.
അടച്ചുറപ്പില്ലാത്തതും മേല്ക്കൂര ശക്തമല്ലാത്തതുമായ വീടുകളില് താമസിക്കുന്നവര് മുന്നറിയിപ്പുകളുടെ അടിസ്ഥാനത്തില് മാറിത്താമസിക്കാന് തയാറാകണം. സ്വകാര്യ – പൊതു ഇടങ്ങളില് അപകടാവസ്ഥയില് നില്ക്കുന്ന മരങ്ങള്, പോസ്റ്റുകള്, ബോര്ഡുകള് തുടങ്ങിയവ സുരക്ഷിതമാക്കണം. മരങ്ങള് കോതി ഒതുക്കുകയും ചെയ്യണം. ദുരിതാശ്വാസ ക്യാമ്പുകളിലേക്കു മാറേണ്ട ഘട്ടമുണ്ടായാല് പൂര്ണമായും കോവിഡ് മാനദണ്ഡങ്ങള് പാലിക്കാന് തയാറാകണമെന്നും കളക്ടര് അഭ്യര്ഥിച്ചു.
