തിരുവനന്തപുരം: ബുറെവി ചുഴലിക്കാറ്റ് വെള്ളിയാഴ്ച(04/12/2020)യോടെ തിരുവനന്തപുരം മേഖലയില് എത്തുമെന്നാണ് വിദഗ്ധ പ്രവചനമെന്ന് മുഖ്യമന്ത്രി പിണറായി വിജയന്.
ഡിസംബര് നാലിന് പുലര്ച്ചെ തെക്കന് തമിഴ്നാട്ടിലും പിന്നീട് സംസ്ഥാനത്തേക്കും പ്രവേശിക്കും. തിരുവനന്തപുരം മുതല് എറണാകുളം വരെ ഏഴ് ജില്ലകളില് ശക്തമായ മഴയും കാറ്റുമുണ്ടാകും. മൂന്ന് മുതല് അഞ്ച് ദിവസം വരെയാണ് ഇത് തുടരുകയെന്നും മുഖ്യമന്ത്രി അറിയിച്ചു.
ചുഴലിക്കാറ്റിന്റെ സാന്നിധ്യം വ്യാഴാഴ്ച(03/12/2020) ഉച്ചക്ക് ശേഷം തലസ്ഥാന ജില്ലയില് അനുഭവപ്പെട്ട് തുടങ്ങുമെന്നാണ് നിലവിലെ വിലയിരുത്തല്. സംസ്ഥാനത്ത് പ്രവേശിക്കും മുമ്പ് കാറ്റിന്റെ ശക്തി കുറയുമെങ്കിലും തലസ്ഥാന ജില്ലയില് നാശ നഷ്ടങ്ങള്ക്ക് ഇടയാക്കുമെന്ന മുന്നറിയിപ്പ് കേന്ദ്ര കാലാവസ്ഥാ കേന്ദ്രം അറിയിച്ചിട്ടുണ്ട്.
തിരുവനന്തപുരം മുതല് ആലപ്പുഴ വരെയുള്ള ജില്ലകളില് വ്യാഴാഴ്ച റെഡ് അലര്ട്ട് പ്രഖ്യാപിച്ചിട്ടുണ്ട്. കനത്ത കാറ്റിന് ഒപ്പം അതി തീവ്ര മഴയും ഉണ്ടാകുമെന്ന് മുന്നറിയിപ്പ് ഉണ്ട്. 1077 എന്ന നമ്പറില് തിരുവനന്തപുരം കളക്ട്രേറ്റില് കണ്ട്രോള് റൂം തുറന്നിട്ടുണ്ട്. 0471 2330077, 0471 2333101 എന്നീ നമ്പറുകളില് തിരുവനന്തപുരം ഫയര് ഫോഴ്സ് കണ്ട്രോള് റൂമിലേക്കും വിളിക്കാം.
തീരദേശമേഖലയില് ശക്തമായ കടല് ക്ഷോഭത്തിനും സാധ്യതയുണ്ട്. മലയോര ജില്ലകളില് മണിക്കൂറില് അറുപത് കിലോമീറ്ററിന് മുകളില് കാറ്റ് വീശാന് സാധ്യതയുണ്ട്.
മലയോര മേഖലയില് മണ്ണിടിച്ചിലിനും ഉരുള്പ്പൊട്ടലിനും സാധ്യതയുണ്ട്. ചുഴലിക്കാറ്റ് സ്ഥിതി വിലയിരുത്താന് പ്രധാനമന്ത്രിയുമായി സംസാരിച്ചിരുന്നു. സംസ്ഥാനം സ്വീകരിച്ച നടപടികള് പ്രധാനമന്ത്രിയോട് വിശദീകരിച്ചിട്ടുണ്ടെന്നും മുഖ്യമന്ത്രി അറിയിച്ചു.
