ന്യൂഡൽഹി: ഓക്സ്ഫോർഡ് കോവിഡ് -19 വാക്സിൻ ആരോഗ്യ പ്രവർത്തകർക്കും പ്രായമായവർക്കും 2021 ഫെബ്രുവരി മാസം മുതലും പൊതുജനങ്ങൾക്ക് 2021 ഏപ്രിൽ മാസം മുതലും ലഭ്യമാകുമെന്ന് വാക്സിൻ നിർമാതാക്കളായ സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ സി.ഇ.ഒ അദാർ പൂനാവാല. പൊതുജനങ്ങൾക്ക് ആവശ്യമായ രണ്ട് ഡോസുകൾക്കുള്ള തുക 1,000 രൂപയായിരിക്കുമെന്നും അദ്ദേഹം സൂചന നൽകി.
2024 ഓടെ ഓരോ ഇന്ത്യക്കാരനും പ്രതിരോധ കുത്തിവയ്പ് നൽകുമെന്ന് ഹിന്ദുസ്ഥാൻ ടൈംസ് ലീഡർഷിപ്പ് സമ്മിറ്റിൽ അദ്ദേഹം പറഞ്ഞു.
“ഓരോ ഇന്ത്യക്കാരനും കുത്തിവയ്പ് എടുക്കാൻ രണ്ടോ മൂന്നോ വർഷമെടുക്കും, വിതരണ പരിമിതി കാരണം മാത്രമല്ല, ബജറ്റ്, വാക്സിൻ, ഇൻഫ്രാസ്ട്രക്ചർ എന്നിവയൊക്കെ ആവശ്യമുണ്ട്. ആളുകൾ വാക്സിൻ എടുക്കാൻ തയ്യാറാകുകയും വേണം , അദ്ദേഹം പറഞ്ഞു.
“2021 ജൂലൈ മാസത്തോടെ ഇന്ത്യയ്ക്ക് 400 ദശലക്ഷം ഡോസുകൾ ആവശ്യമായി വരും. അത്തരത്തിലുള്ള വോളിയം ഇന്ത്യയ്ക്ക് വാഗ്ദാനം ചെയ്യാൻ ഞങ്ങൾ ഒരുങ്ങുകയാണ് ” പൂനാവാല പറഞ്ഞു.
“ഞങ്ങൾ ഇപ്പോൾ ബംഗ്ലാദേശിനപ്പുറം മറ്റാരുമായും കരാർ ഒപ്പിട്ടിട്ടില്ല, പല രാജ്യങ്ങളുമായി ഇപ്പോൾ പങ്കാളിയാകാൻ ഞങ്ങൾ ആഗ്രഹിക്കുന്നില്ല, കാരണം ഞങ്ങൾക്ക് വിതരണം ചെയ്യാൻ ആവശ്യമായ സ്റ്റോക്കുകൾ ഇല്ല.
ആദ്യം ഇന്ത്യയെ മുൻ‌ഗണനയായി കൈകാര്യം ചെയ്യാനും ആഫ്രിക്കയിലേതുൾപ്പടെ മറ്റ് രാജ്യങ്ങളെ സഹായിക്കാനും ഞങ്ങൾ ആഗ്രഹിക്കുന്നു, ”അദ്ദേഹം പറഞ്ഞു.
2021 ന്റെ ആദ്യ പാദത്തോടെ 30-40 കോടി ഡോസ് ഓക്സ്ഫോർഡ് വാക്സിൻ ലഭ്യമാകുമെന്നും പൂനവല്ല പറഞ്ഞു.
