തിരുവനന്തപുരം: അറബിക്കടലില് മണിക്കൂറില് 50 മുതല് 60 കിലോമീറ്റര് വരെ വേഗത്തില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല് അടുത്ത അഞ്ച് ദിവസത്തേക്ക് കേരളതീരത്ത് മത്സ്യബന്ധനത്തിന് ആരും പോകരുതെന്ന് കേന്ദ്ര കാലാവസ്ഥാ നിരീക്ഷണ വകുപ്പ് അറിയിച്ചു. കൂടാതെ 19ന് രാത്രി 11.30 വരെയള്ള സമയത്ത് പൊഴിയൂര് മുതല് കാസര്കോട് വരെയുള്ള കേരളതീരത്ത് 2.5 മുതല് 3.8 മീറ്റര് വരെ ഉയരത്തില് തിരമാല ഉയരാനും സാധ്യതയുണ്ട്.
വലിയ തിരമാല ഉയരാന് സാധ്യതയുള്ള 19ന് രാത്രി 11.30വരെ തീരദേശവാസികള് ജാഗ്രത പാലിക്കണം. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കുകയും വേണം. മത്സ്യബന്ധന യാനങ്ങള്(ബോട്ട്, വള്ളം തുടങ്ങിയവ) ഹാര്ബറില് സുരക്ഷിതമായി കെട്ടിയിട്ട് സൂക്ഷിക്കണമെന്നും കാലാവസ്ഥാ നിരീക്ഷണ വകുപ്പ് അറിയിച്ചിട്ടുണ്ട്.
