പയ്യോളി: ഗ്യാസ് ടാങ്കറുമായി കൂട്ടിയിടിച്ച് കാര്‍ യാത്രികരായ പിതാവും മകളും മരിച്ചു. കണ്ണൂര്‍ താണ കണ്ണൂക്കര സുബൈദാസിലെ ആഷിഖ്(46), മകള്‍ ആയിശ ലിയ (19) എന്നിവരാണു മരിച്ചത്. ഇവര്‍ സഞ്ചരിച്ചിരുന്ന കാര്‍ എതിരേ വന്ന ടാങ്കര്‍ ലോറിയുമായി കൂട്ടിയിടിക്കുകയായിരുന്നു. ഇവര്‍ക്കൊപ്പം കാറിലുണ്ടായിരുന്ന ഷുഹൈബ (49), ലാസിം(14) എന്നിവരെ പരിക്കുകളോടെ കോഴിക്കോട് ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ആയിശ വടകര സഹകര ണാശുപത്രിയിലും ആഷിഖ് കൊയിലാണ്ടി താലൂക്ക് ആശുപത്രിയിലു മാണ് മരിച്ചത്.
തൊടുപുഴ അല്‍ അസര്‍ കോളജിലെ രണ്ടാംവര്‍ഷ മെഡിക്കല്‍ വിദ്യാര്‍ഥിനിയാണ് ആയിശ ലിയ . ഓണ്‍ലൈന്‍ പഠനത്തിന് ഹോസ്റ്റലില്‍നിന്ന് പുസ്തകമെടുക്കാന്‍ ശനിയാഴ്ച രാവിലെയാണ് ഇവര്‍ വീട്ടില്‍നിന്നു പുറപ്പെട്ടത്. രാത്രി 10 മണിയോടെ കൊച്ചിയിലേക്കു പോവുകയായിരുന്ന ടാങ്കര്‍ ലോറിയും ഇവര്‍ സഞ്ചരിച്ച കാറും ഇരിങ്ങലില്‍ വച്ച് കൂട്ടിയിടിക്കുകയായിരുന്നു. നിയന്ത്രണം വിട്ട ടാങ്കര്‍ നിര്‍ത്തിയിട്ട ബൈക്കില്‍ കയറിയിറങ്ങി തൊട്ടടുത്ത വീടിന്റെ ചുറ്റുമതില്‍ തകര്‍ത്താണ് നിന്നത്. രണ്ടുമണിക്കൂറോളം ദേശീയപാതയില്‍ ഗതാഗതം തടസ്സപ്പെട്ടു.
