ന്യൂഡല്‍ഹി ഏപ്രിൽ 20: കേന്ദ്ര ജീവനക്കാരുടെ ശമ്പളത്തില്‍ നിന്ന് ഒരു വിഹിതം പ്രധാനമന്ത്രിയൂടെ പ്രത്യേക ദുരിതാശ്വാസ ഫണ്ടിലേക്ക് സമാഹരിക്കാനുള്ള നടപടികള്‍ വിവിധ വകുപ്പുകളില്‍ പുരോഗമിക്കുന്നു. മാസത്തില്‍ ഒരു ദിവസത്തെ വേതനം വീതം 2021 മാര്‍ച്ച്‌ വരെ ശമ്പളത്തില്‍ നിന്ന് പിടിക്കുന്ന രീതിയിലാണ് ഇത് ആസൂത്രണം ചെയ്തിട്ടുള്ളത്.
ശമ്പള വിഹിതം നല്‍കേണ്ടത് നിര്‍ബന്ധമല്ലെന്ന് പറയുന്നുണ്ടെങ്കിലും ശമ്പളത്തില്‍ നിന്ന് നേരിട്ട് തുക പിടിക്കുന്ന രൂപത്തിലാണ് ഇത് പ്രവര്‍ത്തിക്കുക. ശമ്പള വിഹിതം നല്‍കാന്‍ ആഗ്രഹിക്കാത്താവര്‍ ബന്ധപ്പെട്ട മേലധികാരിയെ രേഖാമൂലം അറിയിക്കണമെന്ന് ആവശ്യപ്പെട്ട് ധനമന്ത്രാലയത്തിലെ റവന്യൂ വിഭാഗം എല്ലാവര്‍ക്കും സര്‍ക്കുലര്‍ അയച്ചിട്ടുണ്ട്.
മാര്‍ച്ച്‌ 28 നാണ് പി.എം.കെയേര്‍സ് എന്ന പ്രത്യേക ഫണ്ട് പ്രധാനമന്ത്രി നരേന്ദ്ര മോദി പ്രഖ്യാപിച്ചത്. ഒരാഴ്ചക്കകം ഇതിലേക്ക് 6500 കോടിയിലധികമാണ് ഒഴുകിയത്. കോര്‍പറേറ്റുകള്‍, സെലിബ്രിറ്റികള്‍, വിവിധ സ്ഥാപനങ്ങള്‍, പ്രമുഖ വ്യക്തികള്‍ തുടങ്ങിയവരെല്ലാം പി.എം. കെയേര്‍സിലേക്ക് സംഭവന നല്‍കുന്നുണ്ട്. കോര്‍പറേറ്റുകളുടെ സാമൂഹിക ഉത്തരവാദിത്വ ഫണ്ട് ഇതിലേക്ക് നല്‍കാനുള്ള അനുവാദമുണ്ട്. എന്നാല്‍, സംസ്ഥാന മുഖ്യമന്ത്രിമാരുടെ ദുരിതാശ്വാസ നിധിയിലേക്ക് കോര്‍പറേറ്റുകളുടെ സാമൂഹിക ഉത്തരവാദിത്വ ഫണ്ട് നല്‍കാനാകില്ല.
