മലപ്പുറം: ജില്ലയില് കോവിഡ് ബാധിതരാകുന്നവരുടെ എണ്ണം കുറയുന്നെങ്കിലും രോഗ വ്യാപന സാധ്യത സജീവമായി നിലനില്ക്കുന്നത് തിരിച്ചറിഞ്ഞുള്ള സമീപനമാണ് പൊതുജനങ്ങളില് നിന്നുണ്ടാകെണ്ടതെന്ന് ജില്ലാ മെഡിക്കല് ഓഫീസര് ഡോ. കെ. സക്കീന പറഞ്ഞു. ആരോഗ്യ ജാഗ്രത പാലിക്കുന്നതില് യാതൊരു വീഴ്ച്ചയുമുണ്ടാകരുത്. രോഗബാധിതരാകുന്നവരെ വിദഗ്ധ ചികിത്സ നല്കി പൊതു ജീവിതത്തിലേയ്ക്ക് തിരിച്ചെത്തിയ്ക്കുന്നതില് നിതാന്ത ജാഗ്രതയാണ് ജില്ലാ ഭരണകൂടവും ആരോഗ്യ വകുപ്പും ഇതര സര്ക്കാര് വകുപ്പുകളും ചേര്ന്ന് നടത്തുന്നത്. ഇക്കാര്യത്തില് പൊതുജന പങ്കാളിത്തവും പിന്തുണയും അനിവാര്യമാണ്. പൊതു സമ്പര്ക്കത്തിലേര്പ്പെടുന്നവര് കൂടുതല് ശ്രദ്ധ ചെലുത്തേണ്ട സാഹചര്യമാണ് നിലവിലേത്. വീടുകളില് നിരീക്ഷണത്തിലുള്ളവര് യാതൊരു കാരണവശാലും പൊതുസമ്പര്ക്കത്തിലേര്പ്പെടാതെ റൂം ക്വാറന്റീനില് കഴിയണമെന്നും ഏതെങ്കിലും വിധത്തിലുള്ള ആരോഗ്യ പ്രശ്നങ്ങളുണ്ടായാല് അടുത്തുള്ള ആരോഗ്യ കേന്ദ്രം, ജില്ലാതല കണ്ട്രോള് സെല്, ആരോഗ്യ പ്രവര്ത്തകര് എന്നിവരുമായി ഫോണില് ബന്ധപ്പെടണമെന്നും ജില്ലാ മെഡിക്കല് ഓഫീസര് അറിയിച്ചു. ആരോഗ്യ പ്രശ്നങ്ങളുണ്ടായാല് ഒരു കാരണവശാലും നേരിട്ട് ആശുപത്രികളില് പോകരുത്. ജില്ലാതല കണ്ട്രോള് സെല്ലില് വിളിച്ച് ലഭിക്കുന്ന നിര്ദേശങ്ങള് പൂര്ണമായും പാലിക്കണം. ജില്ലാതല കണ്ട്രോള് സെല് നമ്പറുകള്: 0483 2737858, 2737857, 2733251, 2733252, 2733253.
ബന്ധപ്പെട്ട രേഖ: https://keralanews.gov.in/9057/Covid-19.html
