സുക്ന (പശ്ചിമ ബംഗാൾ)  / 2026  / നവംബർ 08

പശ്ചിമ ബംഗാളിലെ സുക്നയിൽ ത്രിശക്തി കോറിന്റെ പ്രവർത്തന സജ്ജത പ്രതിരോധമന്ത്രി രാജ്‌നാഥ് സിങ് നവംബർ ഏഴിന് വിലയിരുത്തി. യഥാർഥ നിയന്ത്രണരേഖയിലെ അടിസ്ഥാനസൗകര്യ വികസനം, അത്യാധുനിക സൈനിക ഉപകരണങ്ങളുടെ വിന്യാസം, പ്രവർത്തനശേഷിയും യുദ്ധക്ഷമതയും വർധിപ്പിക്കാനുള്ള പുതിയ സാങ്കേതികവിദ്യകളുടെ ഉപയോഗം എന്നിവ ഉദ്യോഗസ്ഥർ വിശദീകരിച്ചു. കോറിന്റെ സജ്ജീകരണങ്ങളിൽ മന്ത്രി സംതൃപ്തി അറിയിച്ചു. അതിർത്തിപ്രദേശങ്ങളിലെ അടിസ്ഥാനസൗകര്യ വികസനത്തിലൂടെയും ജനക്ഷേമ പ്രവർത്തനങ്ങളിലൂടെയും രാഷ്ട്രനിർമാണത്തിന് നൽകുന്ന സംഭാവനകളെയും അദ്ദേഹം അഭിനന്ദിച്ചു. പ്രാദേശിക ജനങ്ങളുമായുള്ള ബന്ധം ശക്തമാക്കുകയാണ് ഈ പ്രവർത്തനങ്ങളുടെ ലക്ഷ്യം.

കരസേനാ മേധാവി ജനറൽ ധീരജ് സേത്ത്, കിഴക്കൻ കമാൻഡ് മേധാവി ലെഫ്റ്റനന്റ് ജനറൽ വി എം ബി കൃഷ്ണൻ, മുപ്പത്തിമൂന്നാം കോർ മേധാവി ലെഫ്റ്റനന്റ് ജനറൽ മൻ രാജ് സിങ് മാൻ എന്നിവരും മറ്റു മുതിർന്ന കരസേനാ ഉദ്യോഗസ്ഥരും പങ്കെടുത്തു.

മുൻനിരയിലെ സൈനികർക്കുള്ള അവശ്യസാധനങ്ങൾ ഉറപ്പാക്കും

ദീപാവലിത്തലേന്ന് നടന്ന ബറാഖാന കൂട്ടവിരുന്നിൽ സൈനികരെ അഭിസംബോധന ചെയ്ത രാജ്‌നാഥ് സിങ്, വെല്ലുവിളികൾ നിറഞ്ഞ സാഹചര്യങ്ങളിലും രാജ്യാതിർത്തികൾ സംരക്ഷിക്കുന്ന അവരുടെ ധൈര്യത്തെയും തൊഴിൽമികവിനെയും അചഞ്ചലമായ അർപ്പണബോധത്തെയും പ്രശംസിച്ചു. ദേശീയ സുരക്ഷയിൽ സാധനസാമഗ്രികളുടെ വിതരണത്തിനുള്ള പ്രാധാന്യവും അദ്ദേഹം ചൂണ്ടിക്കാട്ടി. മുൻനിര കേന്ദ്രങ്ങളിലേക്ക് ആയുധങ്ങൾ, ഭക്ഷണം, ചികിത്സാസാമഗ്രികൾ, മറ്റു സാധനങ്ങൾ എന്നിവ എത്തിക്കുന്നതിനും സൈനികരുടെ സഞ്ചാരത്തിനും സുക്നയും സമീപപ്രദേശങ്ങളും നിർണായക കേന്ദ്രമാണെന്ന് മന്ത്രി പറഞ്ഞു.

കിഴക്കൻ ഇന്ത്യയുടെ സുരക്ഷാസംവിധാനത്തിലെ പ്രധാന കണ്ണിയാണ് സുക്ന. ഭൂമിശാസ്ത്രപരമായി നിർണായകമായ ഈ മേഖലയിൽ രാപ്പകൽ പ്രവർത്തനസജ്ജത വേണം. പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സർക്കാർ വിതരണശൃംഖലകൾ ശക്തമാക്കാൻ തുടർച്ചയായി പ്രവർത്തിക്കുകയാണ്. മുൻനിരയിൽ വിന്യസിച്ച സൈനികർക്ക് ആവശ്യമായ എല്ലാ അവശ്യസാധനങ്ങളും ലഭ്യമാക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.

ഡ്രോണുകളും പുതിയ പരിശീലനവും; ഭാവിക്കായി സേന മാറുന്നു

റോഡുകൾ, തുരങ്കങ്ങൾ, അതിർത്തിയിലെ അടിസ്ഥാനസൗകര്യങ്ങൾ, ആധുനിക ഉപകരണങ്ങൾ എന്നിവയ്ക്കുള്ള ബജറ്റ് വിഹിതം വർധിപ്പിച്ചതായി രാജ്‌നാഥ് സിങ് പറഞ്ഞു. ആത്മനിർഭർ ഭാരത് എന്ന ലക്ഷ്യത്തിലേക്ക് രാജ്യം മുന്നേറുകയാണ്. രാജ്യത്തെ സ്റ്റാർട്ടപ്പുകളും വ്യവസായസ്ഥാപനങ്ങളും സൈനികർക്കായി ഡ്രോണുകൾ, ഡ്രോൺ പ്രതിരോധ സംവിധാനങ്ങൾ, മറ്റു അത്യാധുനിക ഉപകരണങ്ങൾ എന്നിവ നിർമിക്കുന്നുണ്ടെന്നും അദ്ദേഹം പറഞ്ഞു.

പുതിയ സാങ്കേതികവിദ്യകൾ സ്വീകരിക്കാൻ സേനകൾ സജീവമായി മുന്നോട്ടുവരുന്നത് അഭിമാനകരമാണ്. സൈനികർ ഡ്രോൺ പ്രവർത്തനം പഠിക്കുന്നു. സൈബർ സുരക്ഷയെക്കുറിച്ചുള്ള അറിവ് വർധിപ്പിക്കുന്നു. പുതിയ രീതികളിൽ പരിശീലനം നേടുകയും ചെയ്യുന്നു. ഈ മാറ്റം ഭാവിയിലെ ആവശ്യങ്ങൾ നേരിടാൻ സേനയെ സജ്ജമാക്കുമെന്ന് മന്ത്രി പറഞ്ഞു. ആധുനിക യുദ്ധം അതിർത്തിയിലെ വെടിവെപ്പിലോ പീരങ്കിയാക്രമണത്തിലോ ഒതുങ്ങുന്നില്ലെന്നും അദ്ദേഹം ഓർമിപ്പിച്ചു. പലതരം ആക്രമണരീതികൾ ചേർന്ന സങ്കരയുദ്ധം, പരോക്ഷയുദ്ധം, സൈബർ ആക്രമണം, ഡ്രോൺ നുഴഞ്ഞുകയറ്റം, വിവരയുദ്ധം എന്നിവയും സുരക്ഷാവെല്ലുവിളികളാണ്. എതിരാളികൾ സമൂഹമാധ്യമങ്ങളിലൂടെ അഭ്യൂഹങ്ങൾ പ്രചരിപ്പിക്കുകയും ഡ്രോണുകളിലൂടെ തന്ത്രപ്രധാന കേന്ദ്രങ്ങൾ നിരീക്ഷിക്കുകയും സൈബർ ആക്രമണങ്ങളിലൂടെ സൈനിക സംവിധാനങ്ങളിൽ കടന്നുകയറാൻ ശ്രമിക്കുകയും ചെയ്യുന്നു. എല്ലാ മേഖലകളിലും ദേശീയ സുരക്ഷ ഉറപ്പാക്കാൻ ജാഗ്രതയും തയ്യാറെടുപ്പും വേണമെന്ന് അദ്ദേഹം നിർദേശിച്ചു.

മനസ്സിലെ സമ്മർദം പങ്കുവയ്ക്കണം; സൈനികർക്കൊപ്പം സർക്കാർ

സൈനികരുടെ മനോവീര്യം ഉയർത്താൻ സാധ്യമായ എല്ലാ നടപടികളും സർക്കാർ സ്വീകരിക്കുമെന്ന് രാജ്‌നാഥ് സിങ് ആവർത്തിച്ചു. അവസരം ലഭിക്കുമ്പോഴെല്ലാം സൈനികർക്കൊപ്പം സമയം ചെലവഴിക്കണമെന്ന് ഉദ്യോഗസ്ഥരോട് അദ്ദേഹം ആവശ്യപ്പെട്ടു. ഇത്തരം ഇടപെടലുകൾ സൈനികരിൽ ഒരുമയും അടുപ്പവും വളർത്തും. സർക്കാരും രാജ്യം മുഴുവനും തങ്ങൾക്കൊപ്പം ഉറച്ചുനിൽക്കുന്നുവെന്ന ആത്മവിശ്വാസവും ശക്തമാക്കുമെന്ന് അദ്ദേഹം പറഞ്ഞു.

സൈനികരുടെ മാനസികാരോഗ്യത്തിനും വൈകാരിക ക്ഷേമത്തിനും പ്രാധാന്യം നൽകണമെന്നും മന്ത്രി ചൂണ്ടിക്കാട്ടി. കുടുംബത്തിൽനിന്ന് അകന്നുനിൽക്കുന്നതും ജോലിയുടെ ആവശ്യങ്ങളും സമ്മർദത്തിന് കാരണമാകാം. വികാരങ്ങൾ ഉള്ളിലൊതുക്കാതെ സഹപ്രവർത്തകരോട് തുറന്നുസംസാരിക്കണം. ആവശ്യമുള്ളപ്പോൾ പിന്തുണ തേടണമെന്നും അദ്ദേഹം നിർദേശിച്ചു.

വടക്കുകിഴക്ക് ഇന്ത്യയുടെ തുടക്കം; കൂട്ടവിരുന്നിൽ ഒരുമയുടെ സന്ദേശം

വടക്കുകിഴക്കൻ മേഖല ഇന്ത്യയുടെ അവസാന അറ്റമല്ല, ആദ്യ അറ്റമാണെന്ന് രാജ്‌നാഥ് സിങ് വിശേഷിപ്പിച്ചു. പ്രഭാതസൂര്യന്റെ ആദ്യകിരണങ്ങൾ എത്തുന്ന ഈ മേഖല രാജ്യത്തിന്റെ ഭൂമിശാസ്ത്രപരവും സാംസ്കാരികവുമായ ഭൂപ്രകൃതിയുടെ തുടക്കത്തെ പ്രതിനിധീകരിക്കുന്നു. സമ്പന്നമായ ജൈവവൈവിധ്യം, പ്രകൃതിസൗന്ദര്യം, സാംസ്കാരിക വൈവിധ്യം, തനതായ പാരമ്പര്യങ്ങൾ എന്നിവയുള്ള വടക്കുകിഴക്ക് ഇന്ത്യയുടെ വ്യക്തിത്വത്തിന്റെ അവിഭാജ്യഘടകമാണെന്നും അദ്ദേഹം പറഞ്ഞു.

സൈനികർക്കും കുടുംബാംഗങ്ങൾക്കും മന്ത്രി ദീപാവലി ആശംസകൾ നേർന്നു. അവരുടെ സുരക്ഷയും അന്തസ്സും ക്ഷേമവും ഉറപ്പാക്കാൻ സർക്കാർ പ്രതിജ്ഞാബദ്ധമാണെന്ന് അദ്ദേഹം അറിയിച്ചു. ഒരുമയുടെയും സമത്വത്തിന്റെയും പ്രതിഫലനമാണ് ബറാഖാനയെന്നും മന്ത്രി പറഞ്ഞു. പദവികളുടെയും അധികാരശ്രേണികളുടെയും വ്യത്യാസങ്ങൾക്കപ്പുറം വിവിധ പ്രദേശങ്ങളിലും സംസ്കാരങ്ങളിലും ഭാഷാപശ്ചാത്തലങ്ങളിലും നിന്നുള്ള സൈനികരെ ഇത്തരം കൂട്ടായ്മകൾ ഒരു കുടുംബമായി ഒന്നിപ്പിക്കുന്നുവെന്നും അദ്ദേഹം വ്യക്തമാക്കി.

.