ന്യൂഡൽഹി /  2026  / ഒക്ടോബർ 07

സാങ്കേതികവിദ്യ എല്ലാവരെയും ഉൾക്കൊള്ളുന്ന സുസ്ഥിര വികസനത്തിനുള്ള ഉപകരണമാകണമെന്ന് പ്രധാനമന്ത്രി നരേന്ദ്ര മോദി. ഇന്ത്യ മൊബൈൽ കോൺഗ്രസ് രണ്ടായിരത്തി ഇരുപത്തിയാറിന് മുന്നോടിയായി സേവാ തീർഥിൽ നടന്ന കൂടിക്കാഴ്ചയിൽ ആഗോള മൊബൈൽ ആശയവിനിമയ സംഘടനയായ ജിഎസ്എംഎയുടെ ബോർഡ് അംഗങ്ങളോടാണ് അദ്ദേഹം ഇക്കാര്യം പറഞ്ഞത്. സൈബർ തട്ടിപ്പുകൾ നേരിടാൻ സാങ്കേതികവിദ്യ അടിസ്ഥാനമാക്കിയ പരിഹാരങ്ങൾ വേണമെന്നും മോദി ആവശ്യപ്പെട്ടു. കേന്ദ്ര വാർത്താവിനിമയ, വടക്കുകിഴക്കൻ മേഖലാ വികസന മന്ത്രി ജ്യോതിരാദിത്യ സിന്ധ്യ, വാർത്താവിനിമയ, ഗ്രാമവികസന സഹമന്ത്രി ഡോ. പെമ്മസാനി ചന്ദ്രശേഖർ, കേന്ദ്ര സർക്കാരിലെ മുതിർന്ന ഉദ്യോഗസ്ഥർ എന്നിവർ പങ്കെടുത്തു. മൊബൈൽ സേവനദാതാക്കളെയും മൊബൈൽ മേഖലയിലും അനുബന്ധ വ്യവസായങ്ങളിലും പ്രവർത്തിക്കുന്ന സ്ഥാപനങ്ങളെയും ഒരുമിപ്പിക്കുന്ന ആഗോള സംഘടനയാണ് ജിഎസ്എംഎ.

സാങ്കേതികവിദ്യ അവസാനത്തെ ആളിലേക്കും എത്തണം

സമൂഹത്തിലെ ഒരു വിഭാഗവും പിന്നിലാകാതിരിക്കാൻ സാങ്കേതികവിദ്യ എല്ലാവർക്കും ലഭ്യമാക്കേണ്ടത് അനിവാര്യമാണെന്ന് പ്രധാനമന്ത്രി പറഞ്ഞു. പ്രത്യേകിച്ച് ആഗോള ദക്ഷിണ മേഖലയിലെ രാജ്യങ്ങളിൽ സാങ്കേതികവിദ്യയും ഡിജിറ്റൽ സേവനങ്ങളും താങ്ങാനാകുന്ന നിരക്കിൽ എളുപ്പത്തിൽ ലഭിക്കണം. ഡിജിറ്റൽ അന്തരം വർധിക്കുന്നത് തടയാൻ ഇവ അവസാനത്തെ ആളിലേക്കും എത്തിക്കണമെന്നും അദ്ദേഹം നിർദേശിച്ചു. ഡിജിറ്റൽ പൊതു അടിസ്ഥാനസൗകര്യങ്ങൾക്ക് വികസ്വര രാജ്യങ്ങളിൽ വലിയ മാറ്റങ്ങൾ സൃഷ്ടിക്കാനാകുമെന്നും മോദി പറഞ്ഞു. വിവിധ ലോകനേതാക്കളുമായി നടത്തിയ ചർച്ചകൾ ഈ സംവിധാനങ്ങളുടെ ആഗോള പ്രസക്തി വർധിക്കുന്നതായി വ്യക്തമാക്കുന്നു. ആഗോള ദക്ഷിണ മേഖലയിലെ രാജ്യങ്ങൾക്ക് മുന്നേറ്റത്തിനുള്ള അടിത്തറയായി ഇത്തരം സംവിധാനങ്ങൾ മാറാനാകുമെന്നും അദ്ദേഹം ചൂണ്ടിക്കാട്ടി.

തട്ടിപ്പ് കോളുകൾക്കെതിരെ തുടർച്ചയായ മുന്നറിയിപ്പ് വേണം

വർധിച്ചുവരുന്ന ഡിജിറ്റൽ, സൈബർ തട്ടിപ്പുകൾക്ക് സാങ്കേതികവിദ്യ ഉപയോഗിച്ചുള്ള പരിഹാരങ്ങൾ കണ്ടെത്തണമെന്ന് പ്രധാനമന്ത്രി ആവശ്യപ്പെട്ടു. തട്ടിപ്പാകാൻ സാധ്യതയുള്ള ഫോൺകോളുകളെക്കുറിച്ച് ഉപയോക്താക്കൾക്ക് തുടർച്ചയായി ബോധവത്കരണ സന്ദേശങ്ങൾ നൽകണമെന്നും അദ്ദേഹം നിർദേശിച്ചു. പുതുതായി വരുന്ന സാങ്കേതികവിദ്യകൾക്ക് ആഗോള മാനദണ്ഡങ്ങളും പൊതുവായ ചട്ടങ്ങളും ആവശ്യമാണ്. ഡീപ്‌ഫേക്കുകളും നിർമിതബുദ്ധി ഉപയോഗിച്ച് സൃഷ്ടിക്കുന്ന ഉള്ളടക്കവും ഉയർത്തുന്ന ഭീഷണിയും അദ്ദേഹം ചൂണ്ടിക്കാട്ടി. ഇത്തരം ഉള്ളടക്കത്തിന്റെ ഉത്ഭവം ഉപയോക്താക്കൾക്ക് ഉടൻ തിരിച്ചറിയാൻ സഹായിക്കുന്ന സംവിധാനങ്ങളുടെ സാധ്യത പരിശോധിക്കണമെന്നും മോദി പറഞ്ഞു.

ഇന്ത്യയുടെ ഡിജിറ്റൽ മുന്നേറ്റത്തിന് അഭിനന്ദനം

ഡിജിറ്റൽ, മൊബൈൽ കണക്റ്റിവിറ്റിയിൽ ഇന്ത്യ ആഗോള നേതാവായി ഉയർന്നുവരുകയാണെന്ന് ജിഎസ്എംഎ ബോർഡ് അംഗങ്ങൾ വിലയിരുത്തി. ഫോർ ജി, ഫൈവ് ജി സേവനങ്ങളുടെ അതിവേഗ വ്യാപനം, ഡിജിറ്റൽ പൊതു അടിസ്ഥാനസൗകര്യങ്ങളുടെ വ്യാപ്തി, ടെലികോം മേഖലയുടെയും മൊബൈൽ നിർമാണ മേഖലയുടെയും വളർച്ച എന്നിവ അവർ എടുത്തുപറഞ്ഞു. നിക്ഷേപത്തിന് അനുകൂലമായ ഇന്ത്യയുടെ നയങ്ങളെയും അംഗങ്ങൾ അഭിനന്ദിച്ചു. ഡിജിറ്റൽ വളർച്ച തുടരാൻ സുരക്ഷിതവും പ്രതിസന്ധികളെ അതിജീവിക്കാൻ ശേഷിയുള്ളതും വിശ്വസനീയവുമായ അടിസ്ഥാനസൗകര്യങ്ങൾ പ്രധാനമാണെന്നും അവർ പറഞ്ഞു. ഫൈവ് ജി, സിക്സ് ജി, നിർമിതബുദ്ധി, സൈബർ സുരക്ഷ, എല്ലാവരിലേക്കുമുള്ള ഡിജിറ്റൽ സേവനവ്യാപനം, ഉപഗ്രഹ കണക്റ്റിവിറ്റി എന്നീ മേഖലകളിൽ ഇന്ത്യയുമായി അന്താരാഷ്ട്ര സഹകരണത്തിനുള്ള അവസരങ്ങൾ വർധിക്കുന്നതായും അംഗങ്ങൾ ചൂണ്ടിക്കാട്ടി.

ആഗോള ടെലികോം സഹകരണം ശക്തമാക്കി ഇന്ത്യ

ആഗോള സാങ്കേതികവിദ്യാ, ടെലികോം രംഗത്തെ പ്രമുഖരെ ഒരുമിപ്പിക്കുന്ന പത്താമത് ഇന്ത്യ മൊബൈൽ കോൺഗ്രസിന് ന്യൂഡൽഹി വേദിയാകാനിരിക്കെയാണ് കൂടിക്കാഴ്ച നടന്നത്. അടുത്ത തലമുറ കണക്റ്റിവിറ്റിയിലും ഡിജിറ്റൽ സാങ്കേതികവിദ്യകളിലും ഇന്ത്യയുടെ അന്താരാഷ്ട്ര ഇടപെടലുകൾക്ക് ജ്യോതിരാദിത്യ സിന്ധ്യയാണ് നേതൃത്വം നൽകുന്നത്. ബാഴ്‌സലോണയിൽ നടന്ന മൊബൈൽ വേൾഡ് കോൺഗ്രസ് രണ്ടായിരത്തി ഇരുപത്തിയാറിലും ആഗോള ടെലികോം മേഖലയുമായുള്ള ഇന്ത്യയുടെ ചർച്ചകൾക്ക് അദ്ദേഹം നേതൃത്വം നൽകി. കണക്റ്റിവിറ്റി കൂടുതൽ ചെലവുകുറഞ്ഞതും എല്ലാവരെയും ഉൾക്കൊള്ളുന്നതും ഭാവിയിലെ ആവശ്യങ്ങൾക്ക് സജ്ജവുമാക്കുന്നതിനെക്കുറിച്ച് ജിഎസ്എംഎ മന്ത്രിതല പരിപാടിയിലും സിന്ധ്യ സംസാരിച്ചു. സിക്സ് ജിയുടെ വികസനം, സുരക്ഷിത ഡിജിറ്റൽ അടിസ്ഥാനസൗകര്യങ്ങൾ, നിർമിതബുദ്ധി, വിവിധ രാജ്യങ്ങളിലെ സംവിധാനങ്ങൾ തമ്മിൽ ഒത്തുചേർന്ന് പ്രവർത്തിക്കാൻ സഹായിക്കുന്ന സാങ്കേതിക മാനദണ്ഡങ്ങൾ എന്നിവയിൽ ഇന്ത്യയുടെ പങ്ക് വർധിക്കുകയാണ്. അടുത്ത തലമുറ കണക്റ്റിവിറ്റിയെയും ഡിജിറ്റൽ പൊതു അടിസ്ഥാനസൗകര്യങ്ങളെയും കുറിച്ചുള്ള ആഗോള ചർച്ചകളിൽ ഇന്ത്യ കൂടുതൽ സംഭാവന നൽകുന്നതിനിടെ, ഈ കൂടിക്കാഴ്ച ആഗോള മൊബൈൽ മേഖലയുമായുള്ള രാജ്യത്തിന്റെ പങ്കാളിത്തം കൂടുതൽ ശക്തമാക്കുന്നു.