സേവന ഉൽപ്പാദന സൂചികയുടെ പരിധി വിപുലീകരിക്കാൻ കേന്ദ്രം; ഒക്ടോബർ 16 വരെ അഭിപ്രായം അറിയിക്കാം

ന്യൂഡൽഹി  /2026 / ഒക്ടോബർ 07

രാജ്യത്തെ സേവന ഉൽപ്പാദന സൂചികയുടെ പരിധി വിപുലീകരിക്കാൻ കേന്ദ്ര സ്ഥിതിവിവരക്കണക്ക്–പദ്ധതി നിർവഹണ മന്ത്രാലയം സമീപനരേഖ പ്രസിദ്ധീകരിച്ചു. വിദ്യാഭ്യാസം, മനുഷ്യാരോഗ്യവും താമസപരിചരണ സേവനങ്ങളും, പൊതുഭരണവും പ്രതിരോധവും എന്നീ മേഖലകൾ സൂചികയിൽ ഉൾപ്പെടുത്താനാണ് നിർദേശം. നിർദിഷ്ട രീതിശാസ്ത്രത്തിൽ ഒക്ടോബർ 16 വരെ അഭിപ്രായങ്ങളും നിർദേശങ്ങളും അറിയിക്കാം.

ഇന്ത്യയുടെ മൊത്ത മൂല്യവർധനയുടെ പകുതിയിലധികവും സംഭാവന ചെയ്യുന്ന സേവനമേഖലയുടെ പ്രകടനം കൃത്യമായി വിലയിരുത്തുകയാണ് ലക്ഷ്യം. 2024–25 അടിസ്ഥാനവർഷമാക്കി, ഔപചാരിക മേഖലയിലെ പ്രതിമാസ സേവന ഉൽപ്പാദന സൂചിക തയ്യാറാക്കുന്ന പരീക്ഷണാടിസ്ഥാനത്തിലുള്ള പ്രവർത്തനം 2026 ജൂലൈയിൽ മന്ത്രാലയം ആരംഭിച്ചിരുന്നു. നിലവിൽ 19 വിശാല സേവന ഉപമേഖലകളാണ് സൂചികയിൽ ഉൾപ്പെടുന്നത്. ഭരണപരമായ വിവരങ്ങളും ചരക്കുസേവന നികുതിക്ക് കീഴിലുള്ള പുറംവിതരണ വിവരങ്ങളും ഉപയോഗിക്കുന്ന ഈ സംവിധാനം സേവനമേഖലയുടെ മൊത്ത മൂല്യവർധനയുടെ ഏകദേശം 60 ശതമാനം ഉൾക്കൊള്ളുന്നു.

പ്രധാന സർക്കാർ പ്രവർത്തനങ്ങൾ, വിപണിയേതര പ്രവർത്തനങ്ങൾ, ചരക്കുസേവന നികുതിയിൽനിന്ന് ഒഴിവാക്കിയ സേവനങ്ങൾ എന്നിവ നിലവിലെ സംവിധാനത്തിൽ ഉൾപ്പെട്ടിട്ടില്ല. പുതുതായി ഉൾപ്പെടുത്താൻ നിർദേശിച്ച മൂന്ന് മേഖലകളും ചേർന്ന് 2024–25ലെ സേവനമേഖലയുടെ മൊത്ത മൂല്യവർധനയുടെ ഏകദേശം 21 ശതമാനം വരും. ഇവ ഉൾപ്പെടുത്തുന്നതോടെ പ്രതിമാസ സൂചികയുടെ ആകെ പരിധി ഏകദേശം 78.4 ശതമാനമായി ഉയരുമെന്നാണ് മന്ത്രാലയം വ്യക്തമാക്കുന്നത്.

ഉപമേഖലാ സൂചികകൾ സംയോജിപ്പിച്ച് സേവനമേഖലയിലെ ഹ്രസ്വകാല മാറ്റങ്ങൾ കൂടുതൽ പ്രാതിനിധ്യത്തോടെ പ്രതിഫലിപ്പിക്കുന്ന ഏകീകൃത സൂചിക രൂപപ്പെടുത്താനാണ് പദ്ധതി. വിദഗ്ധർ, അക്കാദമിക രംഗത്തുള്ളവർ, കേന്ദ്ര മന്ത്രാലയങ്ങളും വകുപ്പുകളും, സംസ്ഥാന സർക്കാരുകൾ, ധനകാര്യ സ്ഥാപനങ്ങൾ, മറ്റ് ബന്ധപ്പെട്ട വിഭാഗങ്ങൾ എന്നിവരിൽനിന്നാണ് അഭിപ്രായം ക്ഷണിച്ചിരിക്കുന്നത്.