ചെറുകിട, ഇടത്തരം സംരംഭങ്ങളുടെ വളർച്ചയ്ക്ക് പതിനായിരം കോടി രൂപയുടെ ഓഹരി നിക്ഷേപം; കേന്ദ്രമന്ത്രിസഭയുടെ അംഗീകാരം

ന്യൂഡൽഹി  / 2026  /  ഒക്ടോബർ 06

ചെറുകിട, ഇടത്തരം സംരംഭങ്ങളിൽ നേരിട്ട് ഓഹരി നിക്ഷേപം നടത്താനുള്ള എസ്‌എംഇ ഗ്രോത്ത് ഫണ്ട് സ്ഥാപിക്കുന്നതിന് കേന്ദ്രസർക്കാർ പതിനായിരം കോടി രൂപ നൽകും. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ഒക്ടോബർ ആറിന് ചേർന്ന കേന്ദ്രമന്ത്രിസഭായോഗം ഇതിന് അംഗീകാരം നൽകി. ഉൽപ്പാദനം, സേവനം, സാങ്കേതികവിദ്യ, പുതിയ ആശയങ്ങളെ അടിസ്ഥാനമാക്കിയുള്ള മേഖലകൾ, തന്ത്രപ്രധാന മൂല്യശൃംഖലകൾ എന്നിവയിൽ മുൻനിര ഇന്ത്യൻ സംരംഭങ്ങളെ വളർത്തിയെടുക്കുകയാണ് ലക്ഷ്യം. 2026–27 കേന്ദ്രബജറ്റിലെ ഇരുപത്തിയെട്ടാം ഖണ്ഡികയിൽ പ്രഖ്യാപിച്ച പദ്ധതിയാണിത്. സൂക്ഷ്മ, ചെറുകിട, ഇടത്തരം സംരംഭങ്ങൾക്ക് ഓഹരി മൂലധനവും പണലഭ്യതയും വിദഗ്ധ പിന്തുണയും ഉറപ്പാക്കാനുള്ള ബജറ്റ് പ്രഖ്യാപനങ്ങളുടെ ഭാഗമായാണ് തീരുമാനം.

വളരുന്ന സംരംഭങ്ങൾക്ക് മൂലധനത്തിന്റെ കുറവ് പരിഹരിക്കും

നിലവിലുള്ള ഓഹരി പിന്തുണാ ഫണ്ടുകളിൽ ഭൂരിഭാഗവും പ്രവർത്തനത്തിന്റെ തുടക്കഘട്ടത്തിലുള്ള സംരംഭങ്ങളിലാണ് ശ്രദ്ധ കേന്ദ്രീകരിക്കുന്നത്. ഇവയുടെ സഹായം പ്രധാനമായും സൂക്ഷ്മ സംരംഭങ്ങൾക്കാണ് ലഭിക്കുന്നത്. ചെറുകിട, ഇടത്തരം സംരംഭങ്ങൾക്ക് വളർച്ചയ്ക്കാവശ്യമായ ഓഹരി മൂലധനം ലഭിക്കുന്നതിൽ സംവിധാനപരമായ വിടവുണ്ട്. തൊഴിൽ സൃഷ്ടിക്കുന്നതിലും കയറ്റുമതിയിലും ഉൽപ്പാദനത്തിലും പുതിയ ആശയങ്ങൾ നടപ്പാക്കുന്നതിലും വലിയ പങ്കുവഹിക്കുന്ന ഈ സംരംഭങ്ങൾ ഇന്ത്യൻ സമ്പദ്‌വ്യവസ്ഥയുടെ നട്ടെല്ലാണ്. വായ്പ ലഭ്യത മെച്ചപ്പെടുത്താൻ വിവിധ നടപടികളെടുത്തിട്ടുണ്ടെങ്കിലും ദീർഘകാലത്തേക്ക് നിക്ഷേപിച്ച് ബിസിനസിലെ അപകടസാധ്യത ഏറ്റെടുക്കുന്ന മൂലധനത്തിന്റെ കുറവ് തുടരുകയാണ്.

ബിസിനസ് വിപുലീകരണത്തിന് ദീർഘകാല ഓഹരി പിന്തുണ

പ്രവർത്തനം വിപുലീകരിക്കാനും പുതിയ ആശയങ്ങൾ നടപ്പാക്കാനും വിദേശവിപണികളിലേക്ക് കടക്കാനും സംരംഭങ്ങൾക്ക് മൂലധനം ആവശ്യമാണ്. നൂതന സാങ്കേതികവിദ്യകൾ സ്വീകരിക്കാനും മറ്റു സ്ഥാപനങ്ങളെ ഏറ്റെടുക്കാനും സ്വന്തം മേഖലയിൽ മുൻനിരയിലെത്താനും ഇതേ പിന്തുണ വേണം. ബിസിനസ് വിജയകരമായി നടത്താനാകുമെന്നും പ്രവർത്തനം കൂടുതൽ വിപുലീകരിക്കാനാകുമെന്നും തെളിയിച്ച, വളർച്ചാസാധ്യതയുള്ള സംരംഭങ്ങൾക്കാണ് ഫണ്ട് ദീർഘകാല ഓഹരി മൂലധനം നൽകുക. ഉടൻ നേട്ടം പ്രതീക്ഷിക്കാതെ വളർച്ചയ്ക്ക് സമയം നൽകുന്ന നിക്ഷേപമായിരിക്കും ഇത്. സംരംഭങ്ങളുടെ വളർച്ചയിലെ നിർണായക വഴിത്തിരിവുകളിൽ വലിയ മാറ്റത്തിന് സഹായിക്കുന്ന സംവിധാനമായാണ് ഫണ്ട് വിഭാവനം ചെയ്തിരിക്കുന്നത്.

ഉൽപ്പാദന സംരംഭങ്ങൾക്കും ചെറുനഗരങ്ങൾക്കും പരിഗണന

ഫണ്ടിന്റെ ഭൂരിഭാഗവും ഉൽപ്പാദനത്തിൽ ശ്രദ്ധ കേന്ദ്രീകരിക്കുന്ന ചെറുകിട, ഇടത്തരം സംരംഭങ്ങൾക്കായി വിനിയോഗിക്കും. രണ്ടാംനിര, മൂന്നാംനിര നഗരങ്ങളിലെ വ്യവസായ ക്ലസ്റ്ററുകളിൽ പ്രവർത്തിക്കുന്ന സംരംഭങ്ങളെയും പരിഗണിക്കും. എസ്‌എംഇ ഗ്രോത്ത് ഫണ്ടിന്റെ ചട്ടക്കൂടിൽ സ്ഥാപിക്കുന്ന ആൾട്ടർനേറ്റീവ് ഇൻവെസ്റ്റ്‌മെന്റ് ഫണ്ടിലേക്കാണ് കേന്ദ്രസർക്കാർ ആകെ പതിനായിരം കോടി രൂപ നൽകുക. ഉൽപ്പാദനശേഷി കൂട്ടാനും നൂതന സാങ്കേതികവിദ്യകൾ സ്വീകരിക്കാനും പ്രവർത്തനത്തിന്റെ വ്യാപ്തി വർധിപ്പിക്കാനും ഈ നിക്ഷേപം സഹായിക്കുമെന്നാണ് പ്രതീക്ഷ. അതുവഴി ഉൽപ്പാദനക്ഷമതയും കയറ്റുമതിയിലെ മത്സരശേഷിയും മെച്ചപ്പെടും. വിവിധ നഗരങ്ങളിലെ വ്യവസായ ക്ലസ്റ്ററുകളിലേക്കുള്ള നിക്ഷേപം പ്രാദേശിക വ്യവസായവികസനത്തിൽ സന്തുലിതാവസ്ഥ ഉറപ്പാക്കാനും പ്രാദേശിക വിതരണശൃംഖലകൾ ശക്തിപ്പെടുത്താനും മികച്ച തൊഴിലവസരങ്ങൾ സൃഷ്ടിക്കാനും സഹായിക്കും.

ആഗോളവിപണിയിൽ മത്സരിക്കുന്ന ഇന്ത്യൻ കമ്പനികൾ

ദീർഘകാല മൂലധനം ലഭിക്കുന്നതോടെ സംരംഭങ്ങൾക്ക് പ്രവർത്തനം വിപുലീകരിക്കാനും സാങ്കേതികവിദ്യയിലും ഉൽപ്പാദനശേഷിയിലും നിക്ഷേപിക്കാനും കഴിയും. അന്താരാഷ്ട്ര വിപണികളിലേക്ക് കടക്കാനും ആഗോള മൂല്യശൃംഖലകളുടെ ഭാഗമാകാനും തന്ത്രപ്രധാന നിക്ഷേപങ്ങൾ നടത്താനും ഫണ്ട് പിന്തുണ നൽകും. ആവശ്യമായ പ്രവർത്തനവ്യാപ്തിയും പുതിയ ആശയങ്ങൾ നടപ്പാക്കാനുള്ള ശേഷിയും മത്സരക്ഷമതയുമുള്ള ഇന്ത്യൻ കമ്പനികളുടെ ശക്തമായ നിര ഇതിലൂടെ ഉയർന്നുവരുമെന്നാണ് സർക്കാരിന്റെ പ്രതീക്ഷ. രാജ്യത്തെ സംരംഭക സംവിധാനം ശക്തിപ്പെടുത്താനും വളർച്ചാഘട്ടത്തിലുള്ള സ്ഥാപനങ്ങൾക്കായി ആഭ്യന്തര മൂലധനവിപണി കൂടുതൽ വികസിപ്പിക്കാനും പദ്ധതി ലക്ഷ്യമിടുന്നു. ആഗോളതലത്തിൽ മത്സരിക്കാവുന്ന പുതിയ തലമുറ ഇന്ത്യൻ കമ്പനികളെ സൃഷ്ടിക്കുന്നതിലൂടെ വികസിത ഭാരതം 2047 എന്ന ലക്ഷ്യത്തിലേക്ക് മുന്നേറാനാണ് ശ്രമം.

നിലവിലെ പിന്തുണയ്ക്കൊപ്പം പുതിയ വളർച്ചാവഴി

ചെറുകിട, ഇടത്തരം സംരംഭങ്ങളെ ശക്തിപ്പെടുത്താൻ സർക്കാർ നടത്തുന്ന പരിഷ്‌കാരങ്ങൾ, ഡിജിറ്റൽവൽക്കരണം, വായ്പാ പിന്തുണ, ബിസിനസ് നടത്തിപ്പ് എളുപ്പമാക്കുന്ന നടപടികൾ എന്നിവയ്ക്കൊപ്പം ഈ ഫണ്ടും പ്രവർത്തിക്കും. സർക്കാർ സംഭരണത്തിലെ പരിഷ്‌കാരങ്ങൾ, സ്റ്റാർട്ടപ്പുകൾക്കുള്ള പ്രോത്സാഹനം, ഉൽപ്പാദനവുമായി ബന്ധിപ്പിച്ച പ്രോത്സാഹന പദ്ധതികൾ എന്നിവയ്ക്കും ഇത് അനുബന്ധ പിന്തുണയാകും. ഇന്ത്യൻ സംരംഭകരെ ശക്തിപ്പെടുത്താനും മത്സരക്ഷമതയുള്ള പുതിയ സംരംഭങ്ങളെ വളർത്താനും സർക്കാർ പ്രതിബദ്ധത ആവർത്തിച്ചു. അതിവേഗ വളർച്ചാസാധ്യതയുള്ള സംരംഭങ്ങളിലേക്ക് നിക്ഷേപം എത്തിക്കുന്നതിലൂടെ മുൻനിര കമ്പനികളെ സൃഷ്ടിക്കാനും പുതിയ ആശയങ്ങൾ നയിക്കുന്ന വ്യവസായവൽക്കരണം മുന്നോട്ടുകൊണ്ടുപോകാനും രാജ്യത്തുടനീളം മികച്ച തൊഴിലവസരങ്ങൾ ഒരുക്കാനും ലക്ഷ്യമിടുന്നു. വികസിത ഭാരതം 2047 എന്ന കാഴ്ചപ്പാട് മുന്നോട്ടുകൊണ്ടുപോകുന്ന പ്രധാന തൂണുകളിലൊന്നാകും ഈ പദ്ധതി.

.