ന്യൂഡൽഹി / 2026 /സെപ്റ്റംബർ 30
ഇന്ത്യയുടെ ഖനന, ധാതുമേഖലയിൽ കൂടുതൽ രാജ്യങ്ങളുടെ പങ്കാളിത്തവും നിക്ഷേപവും ഉറപ്പാക്കാൻ 19 രാജ്യങ്ങളുടെ നയതന്ത്ര പ്രതിനിധികളെ പങ്കെടുപ്പിച്ച് ‘ഇന്ത്യ മൈനിങ്: ഗ്ലോബൽ കണക്ട്’ ചർച്ച സംഘടിപ്പിച്ചു. നവംബർ 15 മുതൽ 17 വരെ ന്യൂഡൽഹിയിലെ യശോഭൂമിയിൽ നടക്കുന്ന ഇന്ത്യ മൈനിങ് വീക്ക് 2026ന്റെ മുന്നൊരുക്കമായാണ് കൂടിക്കാഴ്ച നടന്നത്. കൽക്കരി, ഖനി സഹമന്ത്രി സതീഷ് ചന്ദ്ര ദുബെയും കൽക്കരി മന്ത്രാലയം അഡീഷണൽ സെക്രട്ടറി രൂപീന്ദർ ബ്രാറും ചർച്ചയ്ക്ക് ആതിഥേയത്വം വഹിച്ചു. ഖനനമേഖലയിലെ അന്താരാഷ്ട്ര പങ്കാളിത്തം, നിർണായക ധാതുക്കൾ, സാങ്കേതികവിദ്യ, നിക്ഷേപം എന്നിവയിലെ സഹകരണസാധ്യതകളാണ് പരിശോധിച്ചത്.
ഖനന കമ്പനികൾക്കും നിക്ഷേപകർക്കും ക്ഷണം
ഖനന, ധാതുമേഖലയിലെ ഇന്ത്യയുടെ ഏറ്റവും വലിയ സമ്മേളനവും പ്രദർശനവുമാണ് ഇന്ത്യ മൈനിങ് വീക്ക്. കേന്ദ്ര കൽക്കരി മന്ത്രാലയവും ഖനി മന്ത്രാലയവും ഖനന വ്യവസായമേഖലയുമായി ചേർന്നാണ് പരിപാടി സംഘടിപ്പിക്കുന്നത്. വിവിധ രാജ്യങ്ങളുടെ നയതന്ത്ര പ്രതിനിധികളും ഖനന, ധാതുമേഖലയുമായി ബന്ധപ്പെട്ടവരും അതത് രാജ്യങ്ങളുടെ പങ്കാളിത്തസാധ്യതകൾ ചർച്ച ചെയ്തു.
ആഗോള ഖനന സമൂഹത്തിന്റെ സജീവ സഹകരണവും പങ്കാളിത്തവും സതീഷ് ചന്ദ്ര ദുബെ അഭ്യർഥിച്ചു. പ്രമുഖ ഖനന കമ്പനികൾ, വലിയ നിക്ഷേപകർ, പ്രധാന പ്രതിനിധികൾ എന്നിവരുടെ പങ്കാളിത്തം ഉറപ്പാക്കാൻ സഹകരിക്കുന്ന രാജ്യങ്ങൾ മുന്നോട്ടുവരണമെന്ന് അദ്ദേഹം ആവശ്യപ്പെട്ടു. ഇത്തരം പങ്കാളിത്തം ഇരുപക്ഷത്തിനും ഗുണകരമാകുമെന്നും ഖനന, ധാതുമേഖലയിലെ സഹകരണം ശക്തിപ്പെടുത്തുമെന്നും അദ്ദേഹം പറഞ്ഞു.
പങ്കാളി രാജ്യങ്ങളിലെ ഖനന ചുമതലയുള്ള മന്ത്രിമാരും പ്രമുഖ നിക്ഷേപകരും വ്യവസായ പ്രതിനിധികളും പങ്കെടുക്കണമെന്ന താൽപര്യവും അദ്ദേഹം അറിയിച്ചു. നവംബർ 15ന് യശോഭൂമിയിൽ നടക്കുന്ന ഉദ്ഘാടനച്ചടങ്ങിലേക്ക് വിശിഷ്ടാതിഥികളെയും മേഖലയുമായി ബന്ധപ്പെട്ട എല്ലാവരെയും ക്ഷണിച്ചു.
ആഗോള സഹകരണത്തിന് ഇന്ത്യൻ സന്ദേശം
ലോകം ഒരു കുടുംബമാണെന്ന ‘വസുധൈവ കുടുംബകം’ ആശയം രൂപീന്ദർ ബ്രാർ പ്രസംഗത്തിൽ ചൂണ്ടിക്കാട്ടി. പങ്കാളിത്തവും സഹകരണവും ആഗോള ഖനനമേഖലയുടെ ഭാവി രൂപപ്പെടുത്താൻ സഹായിക്കുമെന്ന് അവർ പറഞ്ഞു. ലോകത്തിലെ നാലാമത്തെ വലിയ സമ്പദ്‌വ്യവസ്ഥയായി ഇന്ത്യ മുന്നേറുമ്പോൾ രാജ്യത്തിന്റെ വളർച്ചയ്ക്കും ആഗോള ലക്ഷ്യങ്ങൾക്കും ഖനന, ധാതുമേഖല നിർണായകമാണെന്നും വ്യക്തമാക്കി.
നവംബറിലെ ഇന്ത്യ മൈനിങ് വീക്കിൽ ആശയങ്ങൾ കൈമാറാനും പരിചയസമ്പത്ത് പങ്കുവയ്ക്കാനും സഹകരണസാധ്യതകൾ കണ്ടെത്താനും ആഗോള ഖനന സമൂഹത്തെ അവർ ക്ഷണിച്ചു. കൂടുതൽ നൂതനവും സുസ്ഥിരവും ലോകവുമായി ബന്ധപ്പെട്ടു പ്രവർത്തിക്കുന്നതുമായ ഖനനമേഖല രൂപപ്പെടുത്താൻ വിവിധ രാജ്യങ്ങളുടെ ആശയങ്ങളും അനുഭവവും പിന്തുണയും ഇന്ത്യ പ്രതീക്ഷിക്കുന്നതായി രൂപീന്ദർ ബ്രാർ പറഞ്ഞു.
മലാവി, ശ്രീലങ്ക, മൊസാംബിക്ക്, അൾജീരിയ, അമേരിക്ക, ചിലി, ഭൂട്ടാൻ, ഇന്തോനേഷ്യ, എത്യോപ്യ, റഷ്യ, ഇറാഖ്, മൊറോക്കോ, വെനസ്വേല, സ്പെയിൻ, പോളണ്ട്, മംഗോളിയ, സാംബിയ, ഫ്രാൻസ്, ഘാന എന്നീ രാജ്യങ്ങളുടെ പ്രതിനിധികൾ ചർച്ചയിൽ പങ്കെടുത്തു. യുഎസ് ചേംബർ ഓഫ് കൊമേഴ്‌സ് പ്രതിനിധികളും പങ്കാളികളായി.
നിർണായക ധാതുക്കൾ മുതൽ സാങ്കേതികവിദ്യ വരെ
രാജ്യങ്ങളുടെ ഔദ്യോഗിക സംഘങ്ങൾ, സർക്കാർ–സ്ഥാപന പ്രതിനിധികൾ, വ്യാപാര സംഘങ്ങൾ, പ്രഭാഷകർ, സാങ്കേതിക വിദഗ്ധർ എന്നിവരുടെ പങ്കാളിത്തസാധ്യതകൾ ചർച്ച ചെയ്തു. ഖനന, ധാതു കമ്പനികൾ, സാങ്കേതികവിദ്യ നൽകുന്ന സ്ഥാപനങ്ങൾ, ഉപകരണ നിർമാതാക്കൾ, നിക്ഷേപകർ, ഗവേഷണ സ്ഥാപനങ്ങൾ, വ്യവസായ സംഘടനകൾ എന്നിവരെ പങ്കെടുപ്പിക്കുന്നതും പരിഗണിച്ചു.
ഇന്ത്യ മൈനിങ് വീക്കിന്റെ വ്യാപ്തിയും പരിപാടികളും കൂടിക്കാഴ്ചയിൽ വിശദീകരിച്ചു. നിർണായക ധാതുക്കൾ, ധാതുപര്യവേക്ഷണം, ഖനന സാങ്കേതികവിദ്യ, വലിയ ഖനന ഉപകരണങ്ങൾ, പുതുമകൾ, നിക്ഷേപം, വ്യാപാരം, വിഭവ വികസനം എന്നിവയിലെ പൊതുതാൽപര്യങ്ങൾ പരിശോധിച്ചു. അതത് രാജ്യങ്ങളിലെ ബന്ധപ്പെട്ട കമ്പനികൾ, സർക്കാർ ഏജൻസികൾ, സ്ഥാപനങ്ങൾ, വ്യവസായ സംഘടനകൾ എന്നിവരുടെ പങ്കാളിത്തം ഉറപ്പാക്കാൻ നയതന്ത്ര പ്രതിനിധികളെ ക്ഷണിച്ചു.
നിർണായക ധാതുക്കൾ, വിഭവസുരക്ഷ, അടിസ്ഥാനസൗകര്യ വികസനം, ആഭ്യന്തര ഉൽപ്പാദനം എന്നിവയിൽ ഇന്ത്യ കൂടുതൽ ശ്രദ്ധ കേന്ദ്രീകരിക്കുകയാണ്. ഇതോടെ ഖനനവുമായി ബന്ധപ്പെട്ട വിവിധ ഘട്ടങ്ങളിൽ അന്താരാഷ്ട്ര സഹകരണത്തിന്റെ പ്രസക്തിയും വർധിക്കുന്നു. രാജ്യങ്ങൾക്കും കമ്പനികൾക്കും തങ്ങളുടെ ശേഷി അവതരിപ്പിക്കാനും വ്യാപാരസാധ്യതകൾ കണ്ടെത്താനും സമ്മേളനം വേദിയാകും. ഇന്ത്യൻ നയരൂപകർത്താക്കൾ, ഖനന കമ്പനികൾ, നിക്ഷേപകർ, സാങ്കേതികവിദ്യ നൽകുന്ന സ്ഥാപനങ്ങൾ എന്നിവരുമായി നേരിട്ട് ഇടപഴകാനും അവസരമുണ്ടാകും.
അമ്പതിലേറെ രാജ്യങ്ങളുടെ പങ്കാളിത്തം പ്രതീക്ഷിക്കുന്നു
മൂന്നുദിവസത്തെ ഇന്ത്യ മൈനിങ് വീക്കിൽ 25,000ത്തിലേറെ വ്യവസായമേഖലാ പ്രൊഫഷണലുകളും തീരുമാനമെടുക്കുന്നവരും പങ്കെടുക്കും. 500ത്തിലേറെ പ്രദർശകരും സാങ്കേതികവിദ്യ നൽകുന്ന സ്ഥാപനങ്ങളും 200ത്തിലേറെ പ്രഭാഷകരും വ്യവസായ വിദഗ്ധരും ഒത്തുചേരും. നൂറിലേറെ സമ്മേളന സെഷനുകളും സാങ്കേതിക അവതരണങ്ങളും ഉണ്ടാകും. ആയിരത്തിലേറെ സർക്കാർ, പൊതുമേഖലാ സ്ഥാപന പ്രതിനിധികളും മുന്നൂറിലേറെ ഖനന, ധാതു കമ്പനികളും പങ്കെടുക്കും. അമ്പതിലേറെ രാജ്യങ്ങളിൽനിന്നുള്ള പങ്കാളിത്തമാണ് പ്രതീക്ഷിക്കുന്നത്.
ഉന്നതതല സമ്മേളനം, അന്താരാഷ്ട്ര പ്രദർശനം, സാങ്കേതിക സെഷനുകൾ, നേതൃത്വതല ചർച്ചകൾ, കമ്പനികൾ തമ്മിലുള്ള വ്യാപാര കൂടിക്കാഴ്ചകൾ എന്നിവ പരിപാടിയിലുണ്ടാകും. സാങ്കേതികവിദ്യകളുടെ പ്രദർശനവും പുതിയ ഉൽപ്പന്നങ്ങളുടെ അവതരണവും നടക്കും. കൽക്കരി, ലോഹങ്ങൾ, നിർണായക ധാതുക്കൾ, പര്യവേക്ഷണം, ഖനന സാങ്കേതികവിദ്യ, യന്ത്രവത്കരണം, ഖനി സുരക്ഷ, സുസ്ഥിരത, ധാതു സംസ്കരണം, വിഭവങ്ങളുടെ കാര്യക്ഷമമായ ഉപയോഗം എന്നിവ ചർച്ചാവിഷയങ്ങളാകും.
നവംബറിലെ സമ്മേളനത്തിന് മുന്നോടിയായുള്ള അന്താരാഷ്ട്ര സമ്പർക്കപരിപാടിയുടെ ഭാഗമാണ് ‘ഇന്ത്യ മൈനിങ്: ഗ്ലോബൽ കണക്ട്’. വരും ദിവസങ്ങളിൽ വിദേശ സർക്കാരുകൾ, ഖനന കമ്പനികൾ, സാങ്കേതികവിദ്യ നൽകുന്ന സ്ഥാപനങ്ങൾ, നിക്ഷേപകർ, വ്യവസായ സംഘടനകൾ എന്നിവരുമായി കൂടുതൽ ആശയവിനിമയം നടത്താനും പദ്ധതിയുണ്ട്.
