ന്യൂഡൽഹി  /2026 / ഓഗസ്റ്റ് 16

രാജ്യത്തെ ആദിവാസി വികസന പദ്ധതികളുടെ താഴെത്തട്ടിലെ നടത്തിപ്പ് കൂടുതൽ ശക്തമാക്കാൻ കേന്ദ്ര ആദിവാസികാര്യ മന്ത്രാലയം രണ്ട് പ്രധാന രേഖകൾ പുറത്തിറക്കി. കേന്ദ്ര ആദിവാസികാര്യ മന്ത്രി ജുവൽ ഓറാമും നീതി ആയോഗ് അംഗം ഡോ. ആർ. ബാലസുബ്രഹ്മണ്യവും ചേർന്നാണ് ദേശീയ ചട്ടക്കൂടും പ്രവർത്തന മാർഗരേഖയും ന്യൂഡൽഹിയിൽ പുറത്തിറക്കിയത്. സമഗ്ര ആദിവാസി വികസന ഏജൻസികളുടെയും പദ്ധതികളുടെയും പ്രവർത്തനം മെച്ചപ്പെടുത്തുകയാണ് ഇതിന്റെ ലക്ഷ്യം.

ആദിവാസികാര്യ സെക്രട്ടറി രഞ്ജന ചോപ്ര, അഡീഷണൽ സെക്രട്ടറി മനീഷ് ഠാക്കൂർ, മന്ത്രാലയത്തിലെ മറ്റ് മുതിർന്ന ഉദ്യോഗസ്ഥർ എന്നിവരുടെ സാന്നിധ്യത്തിലായിരുന്നു പ്രകാശനം. സർക്കാർ പദ്ധതികളും ആദിവാസി സമൂഹങ്ങളും തമ്മിലുള്ള പ്രധാന കണ്ണിയാണ് ഈ സ്ഥാപനങ്ങളെന്ന് ജുവൽ ഓറാം പറഞ്ഞു. ധർത്തി ആബാ ജനജാതീയ ഗ്രാമ ഉത്കർഷ് അഭിയാനും പി.എം.-ജൻമൻ പദ്ധതിയും വ്യാപകമായതോടെ ഇവയുടെ ഉത്തരവാദിത്വം കൂടുതൽ ഉയർന്നതായും അദ്ദേഹം ചൂണ്ടിക്കാട്ടി.

പിന്നാക്ക ജില്ലകളിലും ബ്ലോക്കുകളിലും ഫലം നൽകിയ റാങ്കിങ്, തത്സമയ വിവരങ്ങളുടെ അടിസ്ഥാനത്തിലുള്ള നിരീക്ഷണം, വകുപ്പുകൾ തമ്മിലുള്ള ഏകോപനം എന്നിവ പുതിയ പരിഷ്കാര ഘടനയിലും ഉൾപ്പെടുത്തിയിട്ടുണ്ടെന്ന് ഡോ. ആർ. ബാലസുബ്രഹ്മണ്യം പറഞ്ഞു. അർഹമായ ആനുകൂല്യങ്ങൾ അവസാന വ്യക്തിയിലേക്കും എത്തിക്കാൻ സമഗ്ര ആദിവാസി വികസന ഏജൻസികളെ പ്രധാന സംവിധാനമാക്കുകയാണ് ലക്ഷ്യം.

ഏപ്രിലിൽ തുടങ്ങിയ രാജ്യവ്യാപക പഠനം

മന്ത്രാലയം 2026 ഏപ്രിലിലാണ് വിശദമായ പഠനപ്രക്രിയ ആരംഭിച്ചത്. വിശദീകരണ രേഖപ്രകാരം ആദ്യഘട്ടത്തിൽ 17 സംസ്ഥാനങ്ങളും കേന്ദ്രഭരണ പ്രദേശങ്ങളിലുമുള്ള 214 സമഗ്ര ആദിവാസി വികസന ഏജൻസികളെയും പദ്ധതികളെയും പഠനത്തിൽ ഉൾപ്പെടുത്തി. അതേസമയം പ്രസിദ്ധീകരണങ്ങളുടെ സംഗ്രഹത്തിൽ രാജ്യത്തെ 19 സംസ്ഥാനങ്ങളും കേന്ദ്രഭരണ പ്രദേശങ്ങളിലുമുള്ള 217 സ്ഥാപനങ്ങളെ ഉൾപ്പെടുത്തിയ രാജ്യവ്യാപക കൂടിയാലോചനയാണ് പരിഷ്കാര ചട്ടക്കൂടിന് അടിസ്ഥാനമായതെന്ന് പറയുന്നു.

പദ്ധതി ഉദ്യോഗസ്ഥർ, സംസ്ഥാന ആദിവാസി ക്ഷേമ വകുപ്പുകൾ, ആദിവാസി ഗവേഷണ സ്ഥാപനങ്ങൾ എന്നിവരുമായി നേരിട്ട് കൂടിയാലോചന നടത്തി. സംസ്ഥാനതല ശില്പശാലകളും സ്ഥലപരിശോധനകളും സംഘടിപ്പിച്ചു. താഴെത്തട്ടിലെ പ്രശ്നങ്ങളും വിജയകരമായ പ്രവർത്തനരീതികളും ദേശീയ മാർഗരേഖയിൽ ഉൾപ്പെടുത്തുകയായിരുന്നു ലക്ഷ്യം.

പതിനഞ്ച് മാനദണ്ഡങ്ങളിൽ സ്ഥാപനങ്ങളുടെ പരിശോധന

ധർത്തി ആബാ ജനജാതീയ ഗ്രാമ ഉത്കർഷ് അഭിയാൻ വിഭാഗം ഡയറക്ടർ ഡോ. വർണാലി ഡേകയും ഇ.എം.ആർ.എസ്. ഡെപ്യൂട്ടി സെക്രട്ടറി ജാഫർ മാലിക്കും ഏപ്രിൽ, മേയ് മാസങ്ങളിലെ കൂടിയാലോചനകൾക്ക് നേതൃത്വം നൽകി. എല്ലാ പദ്ധതി ഉദ്യോഗസ്ഥരുമായും സംസ്ഥാന ആദിവാസി ഗവേഷണ സ്ഥാപനങ്ങളുമായും നടത്തിയ ചർച്ചകളിലൂടെ വിവരങ്ങൾ ശേഖരിച്ചു. പിന്നീട് അവ പരിശോധിച്ച് സ്ഥിരീകരിച്ചു.

ഇതിന്റെ അടിസ്ഥാനത്തിൽ അഞ്ച് സ്ഥാപന മേഖലകളിലെ പതിനഞ്ച് മാനദണ്ഡങ്ങൾ ഉപയോഗിച്ചുള്ള തെളിവ് അധിഷ്ഠിത പരിശോധനാ മാതൃക തയ്യാറാക്കി. സ്ഥാപനങ്ങളുടെ ശേഷി, പ്രവർത്തനത്തിലെ പോരായ്മകൾ, താഴെത്തട്ടിലെ യാഥാർഥ്യങ്ങൾ എന്നിവ വിലയിരുത്തിയാണ് ദേശീയ ചട്ടക്കൂടും പ്രവർത്തന മാർഗരേഖയും രൂപപ്പെടുത്തിയതെന്ന് മന്ത്രാലയം അറിയിച്ചു.

രാഷ്ട്രപതി പങ്കെടുത്ത ദേശീയ സമ്മേളനം

ഈ നടപടിയുടെ പ്രധാന ഘട്ടമായി 2026 ജൂൺ 3ന് ന്യൂഡൽഹിയിലെ വിജ്ഞാൻ ഭവനിൽ ദേശീയ സമ്മേളനം നടന്നു. രാഷ്ട്രപതി ദ്രൗപദി മുർമു സമ്മേളനത്തിൽ പങ്കെടുത്തു. ആദിവാസികാര്യ സെക്രട്ടറി രഞ്ജന ചോപ്രയുടെ മേൽനോട്ടത്തിലാണ് മുഴുവൻ നടപടിക്രമവും നടന്നത്. എല്ലാ പ്രദേശങ്ങൾക്കും ഒരേ മാതൃക അടിച്ചേൽപ്പിക്കാതെ പ്രാദേശിക സാഹചര്യങ്ങൾക്ക് അനുയോജ്യമായ സ്ഥാപനപരിഷ്കാരമാണ് ലക്ഷ്യമിട്ടത്.

ദേശീയ ചട്ടക്കൂട് വിലയിരുത്തൽ രീതിയും തന്ത്രപരമായ ദിശയും വ്യക്തമാക്കുന്നു. പ്രവർത്തന മാർഗരേഖ സ്ഥാപന പുനഃസംഘടന, വകുപ്പുകളുടെ ഏകോപനം, തെളിവ് അധിഷ്ഠിത ആസൂത്രണം, ഡിജിറ്റൽ ഭരണനിർവഹണം, ഫലാധിഷ്ഠിത നിരീക്ഷണം, ശേഷിവികസനം എന്നിവയ്ക്ക് പ്രായോഗിക നിർദേശങ്ങൾ നൽകുന്നു. ഓരോ സ്ഥാപനത്തിനും സ്വന്തം പോരായ്മ തിരിച്ചറിഞ്ഞ് പ്രത്യേക പ്രവർത്തന മെച്ചപ്പെടുത്തൽ പദ്ധതി തയ്യാറാക്കാൻ പൊതുവായ വിലയിരുത്തൽ രീതി ആദ്യമായാണ് സംസ്ഥാനങ്ങൾക്ക് നൽകുന്നത്.

ത്രൈമാസ നിരീക്ഷണവും നേരിട്ടുള്ള ഫണ്ട് കൈമാറ്റവും

സ്ഥാപനങ്ങളെ റാങ്ക് ചെയ്യുക മാത്രമല്ല, തുടർച്ചയായ പ്രവർത്തന മെച്ചപ്പെടുത്തലിന്റെ സംസ്കാരം സൃഷ്ടിക്കുകയാണ് ലക്ഷ്യമെന്ന് ജുവൽ ഓറാം പറഞ്ഞു. എല്ലാ പദ്ധതി ഉദ്യോഗസ്ഥരുമായും സംസ്ഥാനതല അവലോകനം നടത്താനും ഓരോ സ്ഥാപനത്തിനും പ്രത്യേക പ്രവർത്തനപദ്ധതി തയ്യാറാക്കാനും ത്രൈമാസ അടിസ്ഥാനത്തിൽ പ്രകടനം പരിശോധിക്കാനും സംസ്ഥാനങ്ങളോട് അദ്ദേഹം ആവശ്യപ്പെട്ടു.

ഫണ്ട് കൈമാറ്റം കൂടുതൽ കാര്യക്ഷമമാക്കണമെന്നും ആവശ്യമായിടത്ത് ഏജൻസികൾക്ക് നേരിട്ട് ഫണ്ട് നൽകാനുള്ള സാധ്യത പരിശോധിക്കണമെന്നും മന്ത്രി നിർദേശിച്ചു. പദ്ധതിനടത്തിപ്പിന് കൂടുതൽ സാങ്കേതിക ജീവനക്കാരെ നിയമിക്കണം. തദ്ദേശ സ്വയംഭരണ പ്രതിനിധികളും മുതിർന്ന സംസ്ഥാന ഉദ്യോഗസ്ഥരും സജീവമായി പങ്കെടുക്കുന്ന ഭരണസമിതി യോഗങ്ങൾ സ്ഥിരമായി നടത്തണമെന്നും അദ്ദേഹം ആവശ്യപ്പെട്ടു.

പഠനത്തിലും കൂടിയാലോചനയിലും പങ്കെടുത്ത സംസ്ഥാനങ്ങൾ, പദ്ധതി ഉദ്യോഗസ്ഥർ, ആദിവാസി ഗവേഷണ സ്ഥാപനങ്ങൾ, മന്ത്രാലയ ഉദ്യോഗസ്ഥർ എന്നിവരെ ജുവൽ ഓറാമും ഡോ. ആർ. ബാലസുബ്രഹ്മണ്യവും അഭിനന്ദിച്ചു.

.