വാഷിങ്ടൺ, ജൂലൈ 9-

അമേരിക്കയിലെ എച്ച്-1ബി, പെർം (PERM) തൊഴിൽ വിസകളുമായി ബന്ധപ്പെട്ട് ഉയർന്നുവന്ന വൻ തട്ടിപ്പ് ആരോപണങ്ങളിൽ ഫെഡറൽ ഭരണകൂടം സമഗ്ര അന്വേഷണം ആരംഭിച്ചു. ബുധനാഴ്ചയാണ് ഇത് സംബന്ധിച്ച ഔദ്യോഗിക നടപടികൾക്ക് തുടക്കമായത്. നിരവധി പ്രമുഖ കമ്പനികളാണ് നിലവിൽ അന്വേഷണ പരിധിയിലുള്ളത്. പ്രമുഖ ഐടി കമ്പനിയായ കോഗ്നിസന്റും നിരീക്ഷണ വലയത്തിലുണ്ടെന്ന് അമേരിക്കൻ തൊഴിൽ വകുപ്പിലെ ഉയർന്ന ഫെഡറൽ ഉദ്യോഗസ്ഥൻ സ്ഥിരീകരിച്ചു.

അമേരിക്കൻ തൊഴിൽ വകുപ്പിന് കീഴിലുള്ള ഇൻസ്പെക്ടർ ജനറൽ ഓഫീസാണ് (OIG) കേസ് ഡയറി തയ്യാറാക്കി അന്വേഷണം നടത്തുന്നത്. തൊഴിലുടമകളും വിസ ഇടനിലക്കാരും ചേർന്ന് വ്യാജ രേഖകൾ ചമച്ച് അപേക്ഷകൾ സമർപ്പിച്ചെന്ന പരാതിയാണ് പ്രധാനമായും പരിശോധിക്കുന്നത്. വിദേശ തൊഴിലാളികളെ നിർബന്ധിത വേതന തിരിച്ചടവ് രീതികളിലൂടെ ചൂഷണം ചെയ്തതായും, കുറഞ്ഞ ശമ്പളത്തിൽ വിദേശികളെ നിയമിച്ചതിലൂടെ അമേരിക്കൻ സ്വദേശികളുടെ തൊഴിലവസരങ്ങൾ നഷ്ടപ്പെടുത്തിയതായും കമ്പനികൾക്കെതിരെ ഗുരുതര ആരോപണമുണ്ട്.

അമേരിക്കൻ വൈസ് പ്രസിഡന്റ് ജെ.ഡി. വാൻസ് തലവനായുള്ള ‘ആന്റി ഫ്രോഡ് ടാസ്‌ക് ഫോഴ്‌സിന്റെ’ (തട്ടിപ്പ് വിരുദ്ധ സമിതി) നേരിട്ടുള്ള മേൽനോട്ടത്തിലാണ് നടപടികൾ. അന്വേഷണത്തിന്റെ ഭാഗമായി ഇതിനകം തന്നെ ഒട്ടനവധി കമ്പനികൾക്ക് സബ്‌പീനകൾ (ഹാജരാകാനുള്ള നോട്ടീസ്) അയച്ചിട്ടുണ്ടെന്ന് തൊഴിൽ വകുപ്പ് ഇൻസ്പെക്ടർ ജനറൽ ആന്തണി ഡി എസ്പോസിറ്റോ വ്യക്തമാക്കി. തൊഴിൽ വിസാ പദ്ധതികളുടെ വിശ്വാസ്യത തകർക്കുന്ന രീതിയിലുള്ള ഏത് ദുരുപയോഗവും കർശനമായി തടയുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു.

ലക്ഷ്യം വിസ പദ്ധതികളുടെ ദുരുപയോഗം തടയൽ

അമേരിക്കയിലെ തദ്ദേശീയമായ തൊഴിൽ ക്ഷാമം പരിഹരിക്കുന്നതിനാണ് ഇത്തരം തൊഴിൽ വിസാ പദ്ധതികൾ രൂപകൽപ്പന ചെയ്തിട്ടുള്ളതെന്ന് തൊഴിൽ വകുപ്പ് ഓർമ്മിപ്പിച്ചു. എന്നാൽ, ചില കോർപ്പറേറ്റ് കമ്പനികൾ ഇത് നിയമവിരുദ്ധമായ ലാഭമുണ്ടാക്കാനും തൊഴിലാളികളെ ചൂഷണം ചെയ്യാനുമുള്ള ആയുധമാക്കിയ പശ്ചാത്തലത്തിലാണ് കടുത്ത നടപടികളിലേക്ക് രാജ്യം കടക്കുന്നത്.

കമ്പനികൾക്ക് സബ്‌പീന; രേഖകൾ പരിശോധിക്കും

അന്വേഷണത്തിന്റെ ഭാഗമായി കമ്പനികളിൽ നിന്ന് നിർണായക വിവരങ്ങൾ ശേഖരിക്കാൻ തുടങ്ങിയിട്ടുണ്ട്. വിസ അപേക്ഷകളുടെ വിശദാംശങ്ങൾ, തൊഴിലാളികളുടെ കൃത്യമായ വേതന വിവരങ്ങൾ, ഏജൻസികളുടെയും മറ്റ് ഇടനിലക്കാരുടെയും ഇടപെടലുകൾ എന്നിവയാണ് ഫെഡറൽ ഏജൻസികൾ പ്രധാനമായും പരിശോധിക്കുക.

വിദേശ തൊഴിലാളികളുടെ ചൂഷണം തടയും

വിദേശ അതിഥി തൊഴിലാളി വിസാ സംവിധാനത്തെ ദുരുപയോഗം ചെയ്ത് നടത്തുന്ന മനുഷ്യക്കടത്തും നിർബന്ധിത തൊഴിൽ ശൃംഖലകളും പൂർണ്ണമായും തകർക്കുമെന്ന് ഇൻസ്പെക്ടർ ജനറൽ ഓഫീസ് മുന്നറിയിപ്പ് നൽകി. നിയമത്തിന്റെ പഴുതുകൾ ഉപയോഗിച്ച് ദുർബലരായ വിദേശ തൊഴിലാളികളെ ചൂഷണം ചെയ്യുന്ന എല്ലാ അനധികൃത സംവിധാനങ്ങളും കണ്ടെത്താനാണ് ശ്രമം.

അമേരിക്കൻ തൊഴിലാളികളുടെ അവകാശ സംരക്ഷണം

കുറഞ്ഞ വേതനത്തിൽ വിദേശികളെ വൻതോതിൽ നിയമിച്ചത് മൂലം അമേരിക്കൻ തൊഴിലാളികളുടെ ന്യായമായ ജോലി അവസരങ്ങൾ നഷ്ടപ്പെട്ടിട്ടുണ്ടോയെന്നും ടാസ്‌ക് ഫോഴ്‌സ് പ്രത്യേകം അന്വേഷിക്കും. തൊഴിൽ വകുപ്പിന്റെ വിസാ പദ്ധതികൾ യഥാർത്ഥ ലക്ഷ്യത്തിൽ നിന്നും വ്യതിചലിച്ച് മറ്റ് ആവശ്യങ്ങൾക്കായി വകമാറ്റിയിട്ടുണ്ടോ എന്ന ചോദ്യത്തിനാണ് അന്വേഷണ സംഘം ഉത്തരം തേടുന്നത്.