ഗാന്ധിനഗർ, 2026 ജൂൺ 26
രാജ്യത്തെ ആദ്യത്തെ സഹകരണ അധിഷ്ഠിത ടാക്സി സേവനമായ ഭാരത് ടാക്സി ജൂൺ 27ന് ഗുജറാത്തിലെ ഗാന്ധിനഗറിലെ മഹാത്മാ മന്ദിർ സമ്മേളന-പ്രദർശന കേന്ദ്രത്തിൽ കേന്ദ്ര ആഭ്യന്തര-സഹകരണ മന്ത്രി അമിത് ഷാ ഉദ്ഘാടനം ചെയ്യും. 2025 ഡിസംബറിലാണ് ഈ സേവനം പ്രാരംഭമായി ആരംഭിച്ചത്. സഹകരണ മാതൃകയിൽ പ്രവർത്തിക്കുന്ന ഈ ഡിജിറ്റൽ യാത്രാസേവനത്തിൽ ടാക്സി ഡ്രൈവർമാർ സേവനദാതാക്കൾ മാത്രമല്ല, ഉടമസ്ഥരായ പങ്കാളികളും കൂടിയാണ്. ഇതിലൂടെ സാമ്പത്തിക ശാക്തീകരണവും സാമൂഹിക സുരക്ഷയും ഉടമസ്ഥാവകാശത്തിന്റെ നേട്ടവും ലഭിക്കുമെന്ന് അധികൃതർ അറിയിച്ചു.
ഗുജറാത്ത് മുഖ്യമന്ത്രി ഭൂപേന്ദ്രഭായ് പട്ടേൽ, സംസ്ഥാന ഉപമുഖ്യമന്ത്രി ഹർഷ് സംഘവി, കേന്ദ്ര സഹകരണ മന്ത്രാലയ സെക്രട്ടറി ഡോക്ടർ ആശിഷ് കുമാർ ഭുതാനി എന്നിവരടക്കം നിരവധി പ്രമുഖർ പരിപാടിയിൽ പങ്കെടുക്കും. നാലായിരത്തിലധികം സാരഥിമാരും ചടങ്ങിൽ സന്നിഹിതരാകും. മികച്ച പ്രകടനം കാഴ്ചവെച്ച സാരഥിമാർക്ക് ഓഹരി സർട്ടിഫിക്കറ്റുകൾ നൽകും. വിവിധ സ്ഥാപനങ്ങൾ തമ്മിൽ ധാരണാപത്രങ്ങളും കൈമാറും. ഗുജറാത്തിൽ ഇതിനകം ഒന്നര ലക്ഷത്തിലധികം സാരഥിമാരും ഏഴു ലക്ഷത്തിലധികം ഉപഭോക്താക്കളും ഈ സേവനത്തിന്റെ ഭാഗമായിട്ടുണ്ട്. പ്രതിദിനം മൂവായിരത്തി അഞ്ഞൂറിലധികം യാത്രകൾ പൂർത്തിയാകുന്നതായും അറിയിച്ചു.
ബഹുരാജ്യ സഹകരണ സംഘ നിയമപ്രകാരം രജിസ്റ്റർ ചെയ്ത ഭാരത് ടാക്സി 2025 ജൂൺ ആറിനാണ് രൂപീകരിച്ചത്. സേവനവരുമാനത്തിൽ ഇടനില കമ്മിഷൻ ഈടാക്കാത്ത മാതൃകയാണ് പിന്തുടരുന്നത്. സാരഥിമാർക്ക് ഇൻഷുറൻസ്, വായ്പ, പെൻഷൻ, വിവിധ സാമൂഹിക സുരക്ഷാ പദ്ധതികളുടെ ആനുകൂല്യങ്ങളും ലഭിക്കും. ഗുജറാത്തിലെ പതിനാലു പ്രധാന നഗരങ്ങളിലാണ് ആദ്യഘട്ട സേവനം ലഭ്യമാകുന്നത്. അടുത്ത ഒരു മാസത്തിനുള്ളിൽ സംസ്ഥാനമൊട്ടാകെ വ്യാപിപ്പിക്കുകയാണ് ലക്ഷ്യം. തുടർന്നുള്ള വർഷങ്ങളിൽ രാജ്യത്തെ എല്ലാ സംസ്ഥാനങ്ങളിലേക്കും പ്രധാന നഗരങ്ങളിലേക്കും സേവനം വ്യാപിപ്പിക്കാനും പദ്ധതിയുണ്ട്.
