ആലപ്പുഴ, 2026 ജൂൺ 25 –

കുട്ടനാട്ടിലെ പ്രാദേശിക അവധി വിവാദത്തിൽ പ്രതികരണവുമായി കുട്ടനാട് എം.എൽ.എ റെജി ചെറിയാൻ രംഗത്തെത്തി. മുഖ്യമന്ത്രി നൽകിയ മറുപടി വിഷമമുണ്ടാക്കിയെന്ന് പറഞ്ഞു. ഇക്കാര്യം മുഖ്യമന്ത്രിയോട് നേരിട്ട് ചോദിക്കുമെന്നും മുന്നണിയിലും വിഷയം ഉന്നയിക്കുമെന്നും വ്യക്തമാക്കി. പ്രാദേശിക അവധി അനുവദിക്കുമെന്ന പ്രതീക്ഷയും പങ്കുവച്ചു.

ചമ്പക്കുളം മൂലം വള്ളംകളി നടക്കുന്ന ഇരുപത്തൊൻപതാം തീയതി തിങ്കളാഴ്ച പ്രാദേശിക അവധി പ്രഖ്യാപിക്കണമെന്ന് നിയമസഭയിൽ ആവശ്യപ്പെട്ടിരുന്നു. അത് പരിഗണിക്കാമെന്നായിരുന്നു മുഖ്യമന്ത്രിയുടെ മറുപടി. എന്നാൽ പിന്നീട് ഇരിപ്പിടത്തിൽ എത്തിയ ശേഷം തൊട്ടടുത്തിരുന്ന കുഞ്ഞാലിക്കുട്ടിയോട് ഒരു കാരണവശാലും അവധി നൽകില്ലെന്ന് പറഞ്ഞതായി പ്രചരിച്ച ദൃശ്യമാണ് വിവാദത്തിന് വഴിവെച്ചത്. മുഖ്യമന്ത്രി ഏത് സാഹചര്യത്തിലാണ് അങ്ങനെ പറഞ്ഞതെന്ന് അറിയില്ലെന്നും റെജി ചെറിയാൻ പറഞ്ഞു.

നിയമസഭയിലെ ഈ സംഭവത്തിന്റെ ദൃശ്യങ്ങൾ വ്യാപകമായി പ്രചരിച്ചതോടെയാണ് വിവാദം ശക്തമായത്. പ്രാദേശിക അവധി സംബന്ധിച്ച അന്തിമ തീരുമാനത്തിനായി ഇപ്പോഴും കാത്തിരിക്കുകയാണെന്നും അവധി അനുവദിക്കുമെന്നാണ് പ്രതീക്ഷയെന്നും റെജി ചെറിയാൻ പറഞ്ഞു.