മഴക്കാല രോഗങ്ങൾ തടയാൻ കർശന നിർദ്ദേശം; സ്കൂളുകളിലും തൊഴിലിടങ്ങളിലും ഡ്രൈ ഡേ നിർബന്ധം

തിരുവനന്തപുരം, 2026 ജൂൺ 25 –

മഴക്കാല രോഗങ്ങൾക്കെതിരെ ജില്ലയിൽ പ്രതിരോധ പ്രവർത്തനങ്ങൾ ശക്തമാക്കാൻ ജില്ലാ കളക്ടർ അനുകുമാരി കർശന നിർദ്ദേശം നൽകി. കൊതുകിന്റെ ഉറവിടങ്ങൾ ഇല്ലാതാക്കാൻ എല്ലാ വെള്ളിയാഴ്ചയും സ്കൂളുകളിലും ശനിയാഴ്ചകളിൽ പൊതുമേഖലയിലെയും സ്വകാര്യ മേഖലയിലെയും തൊഴിലിടങ്ങളിലും ഡ്രൈ ഡേ ആചരിക്കണം. സ്ഥാപനങ്ങളുടെ അകത്തും പുറത്തും വെള്ളം കെട്ടിക്കിടക്കുന്നില്ലെന്ന് ഉറപ്പാക്കി ആഴ്ചതോറും റിപ്പോർട്ട് നൽകാനും നിർദ്ദേശമുണ്ട്.

സ്കൂൾ പരിസരങ്ങളിൽ മലിനജലം കെട്ടിക്കിടക്കാൻ അനുവദിക്കരുതെന്നും കുട്ടികൾ അത്തരം വെള്ളത്തിൽ കളിക്കാതിരിക്കാൻ അധ്യാപകർ ശ്രദ്ധിക്കണമെന്നും നിർദ്ദേശിച്ചിട്ടുണ്ട്. സ്കൂൾ പരിസരങ്ങളിലെ തട്ടുകടകളിൽ പരിശോധന ശക്തമാക്കാനും ആരോഗ്യ വകുപ്പിനും തദ്ദേശസ്ഥാപനങ്ങൾക്കും നിർദ്ദേശം നൽകി. ഡെങ്കിപ്പനി, എലിപ്പനി തുടങ്ങിയ രോഗങ്ങളുടെ ലക്ഷണങ്ങൾ കണ്ടാൽ സ്വയം ചികിത്സ ഒഴിവാക്കി ഉടൻ വൈദ്യസഹായം തേടണമെന്നും മുന്നറിയിപ്പുണ്ട്. സ്കൂളുകളിലെ കിണറുകളും വാട്ടർ ടാങ്കുകളും ക്ലോറിനേറ്റ് ചെയ്യുക, ജലസാമ്പിളുകൾ പരിശോധിക്കുക, തിളപ്പിച്ച വെള്ളം മാത്രം നൽകുക, ഭക്ഷണം പാകം ചെയ്യുന്ന ജീവനക്കാർക്ക് ഹെൽത്ത് കാർഡ് ഉറപ്പാക്കുക തുടങ്ങിയ നിർദ്ദേശങ്ങളും നൽകിയിട്ടുണ്ട്.

മഴക്കാലത്ത് പകർച്ചവ്യാധികൾ വ്യാപിക്കാനുള്ള സാധ്യത കണക്കിലെടുത്താണ് ജില്ലാതലത്തിൽ മുൻകരുതൽ നടപടികൾ ശക്തമാക്കുന്നത്. സ്കൂളുകളും തൊഴിലിടങ്ങളും ഉൾപ്പെടെ എല്ലാ സ്ഥാപനങ്ങളും നിർദ്ദേശങ്ങൾ കൃത്യമായി പാലിക്കണമെന്നാണ് ജില്ലാ ഭരണകൂടത്തിന്റെ നിർദേശം.