കണ്ണൂർ, 2026 ജൂൺ 19 –

കണ്ണൂർ വാണിയപ്പാറ ഇൻഫാന്റ് ജീസസ് ചർച്ചിലെ ഒരു കല്ലറ തുറന്ന് പരിശോധിച്ചപ്പോൾ പായയിൽ പൊതിഞ്ഞ വസ്തുക്കൾ കണ്ടെത്തിയത് ദുരൂഹതയ്ക്ക് ഇടയാക്കി. കണ്ടെത്തിയ വസ്തുക്കൾക്കുള്ളിൽ മൃതദേഹമാണെന്ന സംശയമാണ് ഉയരുന്നത്. സംഭവത്തെ തുടർന്ന് കരിക്കോട്ടക്കരി പൊലീസ് അന്വേഷണം ആരംഭിച്ചു.

കല്ലറയിലെ അടക്കം സംബന്ധിച്ച് ദുരൂഹതയുണ്ടെന്നാണ് പ്രദേശവാസികളുടെ ആരോപണം. ക്രിസ്ത്യൻ ആചാരപ്രകാരം ഇത്തരത്തിൽ മൃതദേഹം അടക്കം ചെയ്യാറില്ലെന്നും സംഭവം അറിഞ്ഞവർ ഇതുവരെ വിവരങ്ങൾ പുറത്തുപറഞ്ഞില്ലെന്നും പ്രദേശവാസികൾ പറയുന്നു. സംഭവത്തെക്കുറിച്ച് പള്ളി അധികൃതരാണ് പൊലീസിനെ അറിയിച്ചതെന്ന് പള്ളി വികാരി ഫാ. ജിൽബർട്ട് കൊന്നയിൽ വ്യക്തമാക്കി.

കണ്ടെത്തിയ വസ്തു മൃതദേഹമാണോയെന്ന കാര്യത്തിൽ വ്യക്തത വന്നിട്ടില്ല. പോസ്റ്റ്മോർട്ടം നടത്തിയ മൃതദേഹമാണോയെന്നും സംശയമുണ്ടെന്ന് വികാരി പറഞ്ഞു. സംഭവത്തിന്റെ യാഥാർഥ്യം കണ്ടെത്താൻ പൊലീസ് അന്വേഷണം തുടരുകയാണ്. അന്വേഷണത്തോട് പൂർണമായി സഹകരിക്കുമെന്നും പള്ളി അധികൃതർ അറിയിച്ചു.