തിരുവനന്തപുരം, 2026 ജൂൺ 18 –

തിരുവനന്തപുരം പാപ്പനംകോട് പാറയിൽക്കടവ് റോഡിൽ കാറിനുള്ളിൽ വച്ച് യുവതിയെ കുത്തിക്കൊലപ്പെടുത്താൻ ശ്രമിച്ച കേസിൽ പ്രതിയെ പൊലീസ് അറസ്റ്റ് ചെയ്തു. കരിമഠം സ്വദേശി ബിജുവാണ് പിടിയിലായത്. ബുധനാഴ്ച രാത്രിയായിരുന്നു സംഭവം. കിള്ളിപ്പാലത്ത് നിന്ന് യുവതിയെ ബലമായി കാറിൽ കയറ്റിക്കൊണ്ടുപോയ ശേഷമാണ് ആക്രമണമുണ്ടായതെന്ന് പൊലീസ് പറയുന്നു.

തമലം ഭാഗത്തേക്കുള്ള പാറയിൽക്കടവ് റോഡിൽ എത്തിച്ച ശേഷം പ്രതി കത്തികൊണ്ട് യുവതിയെ കുത്തി പരിക്കേൽപ്പിക്കുകയായിരുന്നു. ആക്രമണത്തിനിടെ യുവതി കാറിൽ നിന്ന് പുറത്തിറങ്ങി ഓടി രക്ഷപ്പെടുകയായിരുന്നു. ഗുരുതരമായി പരിക്കേറ്റ യുവതി ചികിത്സയിലാണ്.

സംഭവത്തിന് ശേഷം പ്രതി കാറിൽ രക്ഷപ്പെടാൻ ശ്രമിച്ചെങ്കിലും കരുമം ഭാഗത്ത് വച്ച് നാട്ടുകാർ പിടികൂടി പൊലീസിന് കൈമാറി. പിന്നീട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സംഭവത്തിന്റെ കൂടുതൽ വിവരങ്ങൾ പൊലീസ് അന്വേഷിച്ചുവരികയാണ്.