പട്ടിമറ്റം, 2026 ജൂൺ 15 –

പട്ടിമറ്റം ചെങ്ങരയിലെ റബർതോട്ടത്തിൽ നോർത്ത് വലമ്പൂർ ആക്കാംപാറ തെക്കേക്കര ജിജോ (ജോൺ-53)യെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയ സംഭവത്തിൽ രണ്ട് സുഹൃത്തുക്കളെ കുന്നത്തുനാട് പൊലീസ് അറസ്റ്റ് ചെയ്തു. നോർത്ത് വലമ്പൂർ ആക്കാംപാറ വാലാടിയിൽ വിനു (38), വി.കെ. ജിനീഷ് (34) എന്നിവരെയാണ് കുറ്റകരമല്ലാത്ത നരഹത്യ കുറ്റം ചുമത്തി അറസ്റ്റ് ചെയ്തത്. വെള്ളിയാഴ്ച രാവിലെ 8.30 ഓടെയാണ് ജിജോയെ റബർതോട്ടത്തിൽ മരിച്ച നിലയിൽ കണ്ടെത്തിയത്.

വ്യാഴാഴ്ച രാവിലെ മുതൽ മൂന്ന് പേരും മദ്യലഹരിയിലായിരുന്നുവെന്നാണ് പൊലീസ് കണ്ടെത്തൽ. വൈകീട്ട് വീണ്ടും മദ്യപിക്കുന്നതിനായി ചെങ്ങരയിലെ ആളൊഴിഞ്ഞ റബർതോട്ടത്തിലെത്തിയപ്പോൾ തർക്കമുണ്ടായി. കുട്ടികളില്ലാത്തതിന്റെ പേരിൽ ജിജോയെ ആക്ഷേപിച്ചതിനെ തുടർന്നുണ്ടായ വാക്കുതർക്കം കൈയാങ്കളിയിലേക്ക് മാറിയെന്നാണ് അന്വേഷണ വിവരം. ഗുരുതരമായി പരിക്കേറ്റ് അബോധാവസ്ഥയിലായ ജിജോയെ ആശുപത്രിയിലെത്തിക്കാതെ സമീപത്തെ ടാർപോളിൻ കെട്ടിയ സ്ഥലത്ത് കിടത്തിയശേഷം പ്രതികൾ മടങ്ങിയതായും പൊലീസ് കണ്ടെത്തി.

രാത്രി വൈകിയും വീട്ടിലെത്താതിരുന്നതിനെ തുടർന്ന് ഭാര്യ ഫ്ലോറി വിവരമറിയിച്ചിരുന്നു. ആദ്യം അസ്വാഭാവിക മരണത്തിനാണ് പൊലീസ് കേസെടുത്തത്. എന്നാൽ ജിജോയുടെ തലയ്ക്ക് ഗുരുതര പരിക്കേറ്റതും തലച്ചോറിൽ അമിത രക്തസ്രാവമുണ്ടായതും കണ്ടെത്തി. സുഹൃത്തുക്കളുടെ മൊഴികളിലെ വൈരുധ്യവും അന്വേഷണത്തിൽ നിർണായകമായി. ജിജോ സഞ്ചരിച്ച ബൈക്ക് അപകടത്തിൽപ്പെട്ടതാണെന്നായിരുന്നു ആദ്യ വിശദീകരണമെങ്കിലും തുടർ അന്വേഷണത്തിലാണ് സംഭവത്തിന്റെ യഥാർഥ വിവരം പുറത്തുവന്നത്.