കോഴിക്കോട്, 2026 ജൂൺ 15 –
ജില്ലയിൽ വീണ്ടും മലേറിയ സ്ഥിരീകരിച്ചു. ഒളവണ്ണ സ്വദേശിയായ 63 വയസുകാരനാണ് രോഗബാധ സ്ഥിരീകരിച്ചത്. ചുമട്ടുതൊഴിലാളിയായ ഇദ്ദേഹം നിലവിൽ ബീച്ച് ആശുപത്രിയിൽ ചികിത്സയിലാണ്. സ്വകാര്യ ആശുപത്രിയിൽ ചികിത്സയിലിരിക്കെ പനി ശക്തമായതിനെ തുടർന്ന് നടത്തിയ പരിശോധനയിലാണ് മലേറിയ കണ്ടെത്തിയത്.
അതിഥി തൊഴിലാളികൾ തിങ്ങിപ്പാർക്കുന്ന പ്രദേശത്താണ് രോഗബാധിതനും താമസിക്കുന്നത്. ഇവിടെ താമസിക്കുന്ന ആർക്കെങ്കിലും മലേറിയ ഉണ്ടായിരിക്കാമെന്നും അതുവഴിയാകാം രോഗം പകർന്നതെന്നുമാണ് ആരോഗ്യവകുപ്പിന്റെ പ്രാഥമിക നിഗമനം. പ്രദേശത്ത് പ്രതിരോധ പ്രവർത്തനങ്ങൾ ആരംഭിച്ചിട്ടുണ്ട്. കഴിഞ്ഞ ദിവസം തിക്കോടിയിൽ മധ്യപ്രദേശ് സ്വദേശിയായ ഒരു ഇതരസംസ്ഥാന തൊഴിലാളിക്കും മലേറിയ സ്ഥിരീകരിച്ചിരുന്നു. അദ്ദേഹം കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്.
അനോഫിലിസ് വിഭാഗത്തിൽപ്പെട്ട പെൺകൊതുകിലൂടെ പകരുന്ന സാംക്രമിക രോഗമാണ് മലേറിയ. ശക്തമായ പനി, വിറയൽ, തലവേദന, ശരീരവേദന, അമിത വിയർപ്പ് എന്നിവയാണ് പ്രധാന ലക്ഷണങ്ങൾ. രോഗപ്രതിരോധത്തിനായി വീടും പരിസരവും വൃത്തിയായി സൂക്ഷിക്കുക, വെള്ളം കെട്ടിക്കിടക്കുന്നത് ഒഴിവാക്കുക, കൊതുകുവല ഉപയോഗിക്കുക, ശരീരം മൂടുന്ന വസ്ത്രങ്ങൾ ധരിക്കുക തുടങ്ങിയ മുൻകരുതലുകൾ സ്വീകരിക്കണമെന്ന് ആരോഗ്യവകുപ്പ് നിർദേശിച്ചു.
