ഇൻഡോർ, 2026 ജൂൺ 14

മധ്യപ്രദേശിലെ ഇൻഡോറിൽ ജൂൺ 12, 13 തീയതികളിലായി നടന്ന ബ്രിക്സ് കൃഷിമന്ത്രിമാരുടെ പതിനാറാമത് യോഗം സമാപിച്ചു. ഇന്ത്യയുടെ അധ്യക്ഷതയിൽ നടന്ന യോഗത്തിൽ ഭക്ഷ്യസുരക്ഷ, പോഷണം, ഉപജീവനം, കാർഷിക വ്യാപാര സഹകരണം, കാലാവസ്ഥയെ അതിജീവിക്കുന്ന സുസ്ഥിര കൃഷി, കാർഷിക മേഖലയെ ഭാവിക്ക് സജ്ജമാക്കാനുള്ള നിക്ഷേപ-നവീകരണ പങ്കാളിത്തം എന്നീ നാല് പ്രധാന വിഷയങ്ങളാണ് ചർച്ചയായത്. അംഗരാജ്യങ്ങളുടെ ഏകകണ്ഠ സമ്മതത്തോടെ സംയുക്ത പ്രഖ്യാപനവും അംഗീകരിച്ചു.

ബ്രിക്സ് അംഗരാജ്യങ്ങളിലെ കൃഷിമന്ത്രിമാരും മുതിർന്ന ഉദ്യോഗസ്ഥരും പ്രതിനിധികളും ഉൾപ്പെടെ ഏകദേശം നൂറോളം പേർ യോഗത്തിൽ പങ്കെടുത്തു. കർഷകരെ കേന്ദ്രബിന്ദുവാക്കി ആഗോള ഭക്ഷ്യസുരക്ഷയും സുസ്ഥിര കാർഷിക രീതികളും ശക്തിപ്പെടുത്തുകയാണ് പ്രഖ്യാപനത്തിന്റെ ലക്ഷ്യം. കാർഷിക പരിസ്ഥിതിശാസ്ത്രത്തിനും പുനരുജ്ജീവന കൃഷിക്കുമായി മികവിന്റെ കേന്ദ്രങ്ങളുടെ ശൃംഖല, ഡിജിറ്റൽ കാർഷിക ശൃംഖല, വിത്ത് സംവിധാനങ്ങളിലെ കർഷകാവകാശങ്ങൾക്കായുള്ള ആഗോള വേദി, വിത്തുകളും കാർഷിക വിഭവങ്ങളും സംബന്ധിച്ച സഹകരണ ചട്ടക്കൂട് എന്നിവ സ്ഥാപിക്കാനും തീരുമാനമായി.

കഴിഞ്ഞ മൂന്ന് മാസങ്ങളായി നടന്ന ചർച്ചകളുടെ തുടർച്ചയായാണ് ഈ തീരുമാനങ്ങൾ ഉണ്ടായത്. നിലവിലുള്ള കാർഷിക ഗവേഷണ വേദിയെ കൂടുതൽ ശക്തിപ്പെടുത്താനും ഗവേഷണ ഫലങ്ങൾ നേരിട്ട് കർഷകർക്ക് പ്രയോജനപ്പെടുന്ന രീതിയിലേക്ക് മാറ്റാനും യോഗം തീരുമാനിച്ചു. ഭക്ഷ്യനഷ്ടം കുറയ്ക്കൽ, കന്നുകാലി സാങ്കേതികവിദ്യ, ജലകൃഷി, ജൈവവൈവിധ്യ സംരക്ഷണം, മത്സ്യ-കന്നുകാലി വികസനം തുടങ്ങിയ മേഖലകളിലും സഹകരണം വർധിപ്പിക്കും. അംഗരാജ്യങ്ങളും പങ്കാളി രാജ്യങ്ങളും ഒരുമിച്ച് പങ്കെടുത്ത ആദ്യ ബ്രിക്സ് കൃഷിമന്ത്രിമാരുടെ യോഗം എന്ന പ്രത്യേകതയും ഇത്തവണത്തെ സമ്മേളനത്തിനുണ്ടായിരുന്നു.